8 YACHAQANA
Josiasqa sumaj amigosniyoj karqa
¿Allin kajta ruwayta atillanchejchu?... Ashkha runasqa, mana atikusqanta ninku. Bibliapirí mana jinachu kasqanta yachachiwanchej. Chantapis Josiaspa kausayninmanta yachachiwanchej. Chay yoqallitoqa, Jehovata yupaychananpaj mayta kallpachakorqa. Chaypajtaj sumaj amigosniyoj kasqan yanaparqa. Kunanqa Josiasmanta astawan yachakuna, amigosninmantapis.
Josiaspa tatanqa Amón sutikorqa, Judá llajtata kamachejtaj karqa. Amonqa sajra karqa, llulla diosespa santosninkutataj yupaychaj. Wañupojtenqa cuentanmanta Judapi Josías kamacherqa. Payqa pusaj watitayoj kamachiyta qallarerqa. ¿Tatan jinallatajchu sajra kamachej karqa?... Mana.
Sofoniasqa runasman nerqa, mana allinchu llulla diosesta yupaychay kasqanta
Josiasqa wawamantapacha, Diosta yupaychayta munarqa. Chayrayku Diosta yupaychajkunawan masichakoj. Paykunataj Jehovata kasukunanpaj yanaparqanku. ¿Pikunataj Josiaspa amigosnin karqanku?
Ujnin amigonqa Sofonías karqa. Payqa Jehovaj profetan karqa. Judá llajtapi tiyakoj runastataj llulla diosesta yupaychajtinku, mana allinchu rinanta ninan karqa. ¿Imatá Josías ruwarqa? ¿Sofoniasta kasukorqachu? Arí. Chayrayku payqa, Jehová Diosllata yupaychaj nitaj llulla diosespa santosnintachu.
Jeremiaspis, Josiaspa amigollantaj karqa. Payqa mitallanmantataj karqa. Jóvenes kashaspaqa qayllapurapi tiyakorqanku. Jeremiaswan Josiaswanqa, Jehovata yupaychaypi yanapanakorqanku. Sumaj amigos kasqankuraykutaj Jeremiasqa, Josías wañupojtin uj llakiy takiyta wakicherqa Josiaspa wañupusqanmanta llakisqa kashasqanta rikuchinanpaj.
Jeremiaswan Josiaswanqa purajmanta Jehovata yupaychaypi yanapanakorqanku
¿Imatá Josiasmanta yachakunchej wawáy?... Payqa, wawamantapacha Diosta kasukuyta munarqa. Chaypajtaj, Jehovata munakoj amigosniyoj kanan karqa. Qanpis, Jehovata yupaychajkunawan masichakuy, ajinamanta yanapasonqanku.