¿Pikunataj Jesusmanta qhelqarqanku?

Kay dibujopi kaj runasta qhawariy. Paykunaqa kanku, Mateo, Marcos, Lucas, Juan, Pedro, Santiago, Judas, Pablo ima. Jesuspa tiempollanpitaj kausarqanku. Paymantataj qhelqarqanku. Qhelqasqankoqa, Bibliapi kashan. ¿Paykunamanta astawan yachakuyta munawajchu wawáy?...

Paykunamanta kinsaqa, sumaj amigosnin karqanku. Paywantaj willaj kanku. Paykunaqa apóstol Mateo, Juan, Pedro ima karqanku. ¿Dibujopi rikuchiwankimanchu?.... Mateowan Juanwanqa, Jesusta allinta rejserqanku. Sapa ujninkutaj Jesuspa kausayninmanta qhelqarqanku. Apóstol Juanqa, Apocalipsis librota qhelqarqa. Chantá kinsa cartastawan nisunman Ñaupaj kaj Juan, Iskay kaj Juan, Kinsa kaj Juan. Apóstol Pedrotaj iskay cartasta qhelqarqa: Ñaupaj kaj Pedrota, Iskay kaj Pedrotawan. Iskay kaj cartanpeqa, Jehová cielomantapacha parlamusqanta qhelqarqa. Maypichus Jesusmanta nerqa: “Kaymin munasqa wawayqa. Paywan may kusisqa kani”, nispa.

Kay wajkunapis, Jesusmanta qhelqallarqankutaj. Ujnenqa Marcos karqa. Payqa Jesusta presochashajtinku, tukuy imatasina rikorqa. Ujnintaj Lucas karqa. Payqa doctor karqa, Jesús wañupusqanmanta qhepamanrajsina cristianomanpis tukorqa.

Jesuspa iskay hermanosninpis paymanta qhelqallarqankutaj. ¿Sutisninta yachankichu?... Paykunapis kay dibujopi kashanku. Ujninpa sutenqa Santiago, ujninpatataj Judas. Paykunaqa, qallariypi Jesuspa yachachisqanta mana creerqankuchu. ¡Locoyapusqantataj yuyarqanku! Aswan qhepamantaj paypi creespa cristianoman tukorqanku.

Pablomantañataj parlarina. ¿Dibujopi rikunkichu? Payqa, niraj cristiano kashaspa Saulo sutikorqa. Cristianostataj mayta chejnispa qhatiykachaj. ¿Imaynatachus cristianoman tukusqanta yachayta munawajchu?... Payqa uj kuti, ñanta rishaspa cielomanta parlapamusqankuta uyarerqa. ¿Pitaj karqa? Jesús karqa. Taporqataj: “¿Imaraykutaj noqapi creejkunata qhatiykachashanki?”, nispa. Pabloqa ruwashasqan, mana allin kasqanta reparakorqa. Chayrayku cristianoman tukorqa. Chantapis Bibliaj 14 libritosninta qhelqarqa, Romanos cartamanta Hebreos cartakama.

¿Bibliata sapa día leeriyta maytacharí munanchej?... Chaypeqa Jesuspa kausayninmanta mayta yachakunchej. ¿Jesusmanta astawan yachakuyta munankichu wawáy?...