Timoteoqa runasta yanapayta munarqa

Timoteoqa, runasta yanapaspa kusisqa kasharqa. Ashkha lugaresmantaj rerqa runasta yanapaj. Chayta ruwaspataj kusisqa kausakorqa. ¿Paymanta astawan willarisunayta munawajchu wawáy?...

Timoteoqa, Listra llajtapi tiyakorqa. Mamanqa, Eunice sutikorqa, abuelitantaj Loida. Paykunaqa, Timoteoman wawitamantapacha Jehovamanta yachacherqanku. Chayrayku wawamantapacha runasta yanapayta munarqa, Jehovata rejsinankupaj.

Timoteo jovencitoña kashajtintaj, Pablo nerqa: “Waj lugaresman Diosmanta willaj risaj. ¿Noqawan riyta munawajchu?”, nispa. Timoteotaj kusisqa, “arí” nerqa, runasta yanapayta munasqanrayku.

Timoteoqa, Pablowan rerqa Greciaman, Tesalónica llajtaman. Chayman chayanankupajqa karuta purerqanku, barcopi ima rerqanku. Chayaytawantaj ashkha runasta yanaparqanku, Jehovata rejsinankupaj. Jinapis wakenqa, mayta phiñakorqanku maqaytataj munarqanku. Chayrayku Pablowan Timoteowanqa waj lugaresman riporqanku Jehovamanta willaj.

Killasninmantaj Pabloqa, Timoteota Tesalonicaman kutinanta nerqa. Pabloqa imaynachus hermanos kashasqankuta yachayta munarqa. Tesalonicapeqa, wakin runas cristianosta qhatiykacharqanku. Chayrayku Timoteoqa, chay llajtaman kutinanpaj sumaj kallpachasqa kanan karqa. Timoteoqa rerqa, hermanosmanta llakisqa kashasqanrayku. Kutimuspataj Pabloman nerqa, Tesalonicamanta hermanosqa, Jehová Diosta yupaychashallasqankutapuni.

Timoteoqa, Pablowan khuska ashkha watasta Jehovata yupaycharqa. Chayrayku Pabloqa, Timoteomanta nerqa: “Mana pay jina kanchu. Chayrayku hermanosta yanapaj kachani. Payqa, Jehovata munakun, runastapis”, nispa.

Qanpis runasta munakunki, ¿icharí? ¿Jehovata rejsinankupaj yanapayta munawajchu?... Jina kajtenqa, Timoteo jina kusisqa kausakunki.