Diospa Reinonmanta escuelas: Reypa kamachisninta wakichikun

QOTUCHAKUYNIYKIMANTA uj joven hermanota, jatun tantakuypi ñaupaj kutirayku parlarimushasqanta rikuspa mayta kusirikunki. Parlarimusqanta uyarishaspataj tʼukurinki, Diospa llajtanpi wakichisqa kasqanchejqa may sumaj kasqanpi. Chay joven hermano ñaupaj kutispi tantakuypi umallirichinanpaj mayta kallpachakusqanmanta yuyarikunki, maytataj kusikunki kunanqa jatun tantakuypiña umallirichishasqanmanta. Payqa astawan ñauparerqa Precursorespaj Escuelaman riytawan, paywan warminwantaj Reinomanta Willajkunapaj Escuelaman kunallanraj rerqanku. Umallirichiyta tukojtin sumajta parlarimusqanmanta tʼajllarikunki, muyuyniykita qhawarispataj Diospa llajtanpi kajkunaqa sumaj wakichisqa kasqankupi tʼukurinki.

Bibliaqa ñaupajmantaña nerqa, Jehovaqa llajtanpi kajkunata yachachinanta (Isa. 54:13). Kunantaj chay tiempopi kausashanchej. Mana publicacionesnejllatachu yachachisqa kanchej, manaqa tantakuykunanejta, jatun tantakuykunanejta, escuelasnejta ima. Chaykunataj Jehovaj llajtanpi ruwayninchejta juntʼanapaj wakichiwanchej. Kay rakʼiypi yachakusunchej, wakichisqa kasqanchejqa Diospa Reinon kamachishasqantaña sutʼita rikuchisqanta.