Juanqa Jesusmanta astawan yachayta munan

Juan Bautistaqa watata jinaña carcelpi kasharqa. Jinapis Jesuspa milagrosninmanta uyarerqa. Payqa may kusisqachá kasharqa, Jesús Naín llajtapi uj viudaj wawanta kausarichisqanta yachaspa. Payqa Jesuspa siminmantapuni uyariyta munarqa, paychus Mesías kasqanta chayri manachus. Chayrayku iskay yachachisqasninta wajyacherqa. Paykunatataj Jesusman kacharqa, tapucherqataj: “¿Qanchu kanki Jamunan Karqa chay, chayri wajtachu suyasqayku?”, nispa (Lucas 7:19).

¿Imajtintaj Juan chayta tapuchimorqa? ¿Creeyninchu pisiyapusharqa? Mana. Creeynin pisiyanman karqa chayqa, nichá Jesús paymanta allintachu parlanman karqa. Jinapis Jesusqa, paymanta allinta parlarqa chay kutipi. Juanqa Diosta tukuy sonqo yupaychaj. Chantapis iskay wata ñaupajta jina Jesusta bautizarqa. Chay kutipitaj Diospa atiyninta Jesuspa patanman uraykamojta rikorqa, uyarerqataj Dios cielomanta nimusqanta: “Kaymin munasqa Wawayqa, paytaqa allinpaj qhawani”, nispa. Chanta, ¿imajtintaj yachachisqasninta Jesusman kacharqa?

Payqa ichapis suyarqa Jesuspuni ninanta: “Noqa Mesías kani”, nispa. Chayta yachayqa carcelpi kasqanrayku mayta kallpachanman karqa. Juanqa ichapis yachayta munallarqataj Biblia Mesiasmanta parlasqanta tukuynintachus Jesús juntʼananta, chayri wajchus chayta juntʼananta. Chantapis payqa Diospa Palabranpi yachakorqa, Diospa Ajllakusqanqa rey kananta, runastataj librananta. Juantajrí carcelllapipuni kasharqa, Jesusta bautizasqanmanta iskay wata jinaña pasajtinpis.

Jesusqa Juanpa yachachisqasninman niyta aterqa: “Arí, noqa Diospa ajllakusqan kani”, nispa. Jinapis mana chaytachu ruwarqa, astawanpis Diospa Ajllakusqan kasqanta rikucherqa, imaymana onqoyniyoj runasta sanoyachispa. Chantá Jesusqa Juanpa yachachisqasninman nerqa: “Rispa Juanman willamuychej uyarisqaykichejta, rikusqaykichejtawan: Ciegos rikunku, suchus puririnku, lepra onqoyniyojkuna sanoyachisqa kanku, lojtʼus uyarinku, wañusqas kausarinku, wajchasmanpis sumaj willaykuna willakun”, nispa (Mateo 11:4, 5).

Juanqa yachachisqasninta Jesuspaman kachaspa ichapis suyasharqa astawan milagrosta ruwananta, carcelmantataj orqhonanta. Jesustajrí imatachus Juanman kutichisqanwan, payman entiendechisharqa chay milagrosllata ruwananta.

Juanpa yachachisqasnin ripusqankutawan, Jesusqa chaypi kaj runasman Juanmanta nerqa: “Payqa profetamantapis aswan kurajraj”, nispa. Arí, Juanqa ‘Diospa willajnin’ karqa (Malaquías 3:1). Chantapis payqa profeta Elías karqa, pichus jamunan karqa chay (Malaquías 4:5, 6). Chayrayku Jesusqa nerqa: “Cheqatapuni niykichej: Tukuy nacekojkunamanta mana ujpis Juan Bautistamanta aswan kurajqa rikhurimorqachu, chaywanpis cielopi kaj Gobiernopi sullkʼa kajqa, paymanta aswan kuraj”, nispa (Mateo 11:11).

Jesusqa nerqa, “cielopi kaj Gobiernopi sullkʼa kajqa”, Juan Bautistamanta aswan kuraj kasqanta. Chaywanqa nisharqa, Juanqa cieloman rinanpaj mana ajllasqachu kasqanta. Juanqa Cristo chayamunanta runasman willaspa, Cristo chayamunanpaj ñanta wakicherqa. Jinapis cieloman rejkunapaj ñan niraj kicharikushajtin wañuporqa. Chay ñantaqa Juan wañupusqanmanta qhepamanraj Jesús kicharerqa (Hebreos 10:19, 20). Juanqa wañupunankama Diosta kasukorqa. Chayrayku payqa Diospa Gobiernonpi kay jallpʼapi kausakonqa.