Jacobwan Esauwan allinyakapunku

Jehová Diosqa Jacobta nerqa cuidananta, imaynatachus Abrahanta, Isaactawan cuidarqa ajinata. Jacobqa Harán jallpʼapi qhepakaporqa. Payqa chaypi casarakorqa, ashkha wawasniyoj karqa, may qhapajmantaj tukorqa.

Aswan qhepamantaj, Jehová Diosqa Jacobta nerqa tatasninpa jallpʼankuman kutinanta. Chayrayku Jacobwan familianwanqa chayman purirerqanku. Ñanpitaj wakin kamachisnin nerqanku: “Hermanoyki Esaú qanta taripasoj jamushanña 400 runaswan”, nispa. Jacobqa mancharikorqa, yuyarqataj payta, familianta ima hermanon wañuchinanta. Chayrayku orakorqa: “Diosníy, libraway ari hermanoy Esaujpa makinmanta”, nispa. Qʼayantintaj Esauman apacherqa ashkha ovejasta, cabrasta, wakasta, camellosta, burrosta ima.

Chay chʼiseqa Jacob sapallan qhepakorqa. Jinallapitaj uj angelta rikorqa. Chay angeltaj paywan maqanakuyta qallarerqa. Jinapi sutʼiyanankama maqanakorqanku. Jacobta chay ángel nanaykuchejtinñapis, Jacobqa maqanakullarqapuni. Chayrayku chay ángel nerqa: “Kachariway”, nispa. Jacobtajrí nerqa: “Bendeciwayraj, manachayqa manapuni kacharisqaykichu”, nispa.

Chayrayku chay angelqa Jacobta bendicerqa. Ajinamanta Jacobqa sutʼita yacharqa Jehová Dios yanapananta hermanon payta mana ni imanananpaj.

Chay paqarintaj, Jacobqa rikorqa Esauta, 400 runasninwan jamushajta. Chayrayku ñaupaykuspa hermanon Esauwan tinkumorqa, qanchis kutitataj pampakama kʼumuykukorqa. Esautajrí correspa Jacobta abrazaykorqa. Chantá iskayninku waqarikorqanku, allinyakaporqankutaj. Jehová Diosqa chayta rikuspa maytachá kusikorqa.

Chaymanta Esauqa wasinman kutiporqa, Jacobwan familianwantaj rillarqankupuni. Jacobpa wawasnenqa 12 karqanku. Sutisninkutaj karqa: Rubén, Simeón, Leví, Judá, Dan, Neftalí, Gad, Aser, Isacar, Zabulón, José, Benjamín ima. Aswan qhepamantaj Jehová Diosqa llajtanta salvarqa Josenejta. Qhepan capitulopi chaymanta yachakusunchej.