Davidwan Saulwan

David Goliatta wañuchisqanmanta qhepaman, rey Saulqa payta soldadosta kamachinanpaj churarqa. Davidqa may rejsisqa karqa ashkha maqanakuspi atipasqanrayku. Maqanakusqanmanta kutimojtintaj warmisqa takispa, tususpa ima taripamoj kanku, nejtaj kanku: “Saulqa waranqasta wañurachin, Davidtaj chunka waranqasta wañurachin”, nispa. Saultaj envidiakuspa “Davidta wañuchisaj” nerqa.

Davidqa arpata sumajta tocaj. Uj diataj, arpata tocapushajtin Saulqa tʼojsina lanzanwan payman choqarqa. Davidtaj kʼumuykorqa, lanzataj perqaman clavakorqa. Chaymantapacha Saulqa ashkha kutispi Davidta wañuchiyta munarqa. Davidtaj chʼin lugarman pakakoj ayqekorqa.

Saultaj 3.000 soldadoswan Davidta maskʼamorqa. Maskʼashaspataj uj cuevaman yaykorqa, chaypitaj Davidwan soldadosninwan kasharqanku. Soldadosqa calmitallawan Davidta nerqanku: “Saulta wañuchiy”, nispa. Davidtaj Saulman qayllaykuspa, mana reparanallanta ropanpa kantunta kʼuturparerqa. Chayta ruwasqanraykutaj sonqon mayta juchacharqa. Chantapis Davidqa mana saqerqachu soldadosnin Saulta wañuchinankuta. Saúl cuevamanta llojsipojtintaj, qhaparispa payman nerqa: “Wañuchiykiman karqa, nitaj wañucherqaykichu”, nispa. Saultajrí payta qhatiykachallarqapuni.

Uj chʼisi, Davidqa sobrinon Abisaiwan Saúl puñusharqa chayman pakayllamanta yaykorqa. Saulta qhawaj soldado Abnerqa puñurpasqa. Abisaitaj nerqa: “Kunan atikushajtin Saulta wañuchejta saqeway”, nispa. Davidtaj nerqa: “Jehová Diosman chayta saqepuna. Chay tʼojsina lanzata sikʼiy, chay yaku yurutawan oqhariy. Jaku ripuna”, nispa.

Chantá Davidqa chay qayllapi kaj orqomanta qhaparimorqa: “Abner, ¿imaraykutaj mana qhawankichu reyniykitari? ¿Maytaj tʼojsina lanzanri, maytaj yaku yurunpis?”, nispa. Saultaj Davidpa parlasqanta rejsirparerqa, qhaparerqataj: “Wañuchiwankiman karqa. Reparani qan Israelpi qhepan kaj rey kanaykita”, nispa. Chantá Saulqa kamachina wasiman kutiporqa. Davidtaqa mana Saulpa tukuy familiaresninchu chejnikorqanku.