Jerusalén chinkachisqa karqa

Judiosqa Jehová Diosmanta sapa kuti karunchakorqanku, santostataj yupaycharqanku. Jehová Diostaj ashkha profetasninta paykunaman kacharqa. Jinapis judiosqa chay wataspi mana kasukorqankuchu, profetasmantataj burlakorqanku. Santosta yupaychayta imaynatachus Dios chinkachisqanta yachakuna.

Babiloniamanta rey Nabucodonosorqa Judá nacionpa llajtasninta ujmanta uj japʼikaporqa. Ñaupaj kutipi Jerusalenta japʼikapushaspa rey Joaquinta, kuraj runasta, soldadosta, herrerosta ima Babiloniaman apakaporqa. Chantapis Jehová Diospa templonmanta tukuy imata apakaporqa. Chaymantataj Sedequiasta Judapi rey kananpaj churarqa.

Sedequiasqa qallariypi Nabucodonosorta kasorqa. Jinapis llulla profetas, waj llajtasmanta runas ima nerqanku manaña kasukunanta. Chayrayku Jeremías nerqa: “Niña kasukunkichu chayqa, Judapi wañuchinakus, yarqhay, onqoykuna ima kanqa”, nispa.

Sedequiasqa 8 watastaña gobernashaspa Nabucodonosorpa contranpi oqharikorqa. Payqa Egiptoj reyninpa yanapanta mañakorqa. Nabucodonosortaj soldadosninta kacharqa Jerusalenta japʼikapunankupaj. Chay soldadostaj Jerusalenpa muyuyninpi jarakorqanku. Jeremiasqa Sedequiasman nerqa: “Jehová Diosqa nin: ‘Babiloniamanta reyta kasojtiyki ni qanpis, ni Jerusalenmanta runaspis wañonqankuchu. Mana kasojtiykeqa Jerusalenta ruphaykuchenqanku, qantataj presochasonqankuʼ, nispa”. Sedequiastaj nerqa: “Mana kasusajchu”, nispa.

Babiloniosqa Jerusalenta wata partiyojta muyuykorqanku. Chantá perqasninta thuñiykuspa llajtata, templota ima ruphaykucherqanku, ashkha runasta wañucherqanku, ashkha runastataj presocharqanku.

Sedequiasqa Jerusalenmanta ayqekorqa. Babiloniostaj qhatiykuspa Jericó chʼin pampaspi japʼerqanku. Chantá rey Nabucodonosorman aparqanku. Nabucodonosortaj Sedequiaspa ñaupaqenpi wawasninta wañuchicherqa, paypa ñawisninta orqhocherqa, carcelmantaj wisqʼaykucherqa. Sedequiasqa chaypi wañorqa. Jinapis Jehová Diosqa Judá llajtayojkunaman nerqa: “70 watasmanta Jerusalenman kutipunkichej”, nispa.

Qhepan capitulopi yachakusunchej Babiloniaman apasqa karqanku chay jovenesmanta, paykuna Jehová Diosta kasukusqankumanta ima.