Samarikuna pʼunchaypi sanoyachin

Fariseosqa Jesusta chejnikusqankurayku imallamantapis presochayta munarqanku. Nejtaj kanku samarikuna pʼunchaypi onqosqasta mana sanoyachinanta. Jesustaj samarikuna pʼunchaypi uj runata rikorqa qolqeta mañakushajta. Discipulosninmantaj nerqa: “Rikunkichej imaynatachus Dios atiyninwan kay runata yanapananta”, nispa. Chantá thoqayninwan tʼuruta ruwaspa cieguito runaj ñawisninta jawiykorqa, Siloam estanquepi mayllakamunantataj nerqa. Chay runataj mayllakamorqa, chaymantapachataj rikuyta aterqa.

Runasqa tʼukuspa nerqanku: “Kay runaqa qolqeta mañakoj, ¿icharí? ¿Nichu pay?”, nispa. Chay runataj nerqa: “Noqapuni kani”, nispa. Runastaj taporqanku: “¿Imaynamantataj qhawarerqankiri?”, nispa. Cieguito karqa chay runataj tukuy imata paykunaman willarqa. Chantá chay runasqa fariseosman pusarqanku.

Chay cieguito runaqa fariseosman nerqa: “Jesusqa ñawisniyman tʼuruwan jawiykuwaspa mayllakamuy niwarqa. Mayllakamuspataj rikorqani”, nispa. Fariseosqa nerqanku: “Samarikuna pʼunchaypi onqosqasta sanoyachin chayqa, mana Diospa atiyninwanchu sanoyachishan”, nispa. Wajkunataj nerqanku: “Mana Diospa atiyninwan kajtenqa mana onqosqasta sanoyachinmanchu”, nispa.

Fariseosqa chay runaj tatasninta wajyachispa nerqanku: “¿Imaynamantataj wawaykichej qhawashanri?”, nispa. Fariseosqa nisqanku pillapis Jesuspi creeni nejtaqa sinagogamanta qharqonankuta. Chayrayku chay runaj tatasnin manchikuspa nerqanku: “Mana yachaykuchu. Payta tapuychej”, nispa. Fariseostaj chay runata tapullarqankupuni, paytaj nerqa: “Willaykichejña. ¿Imajtintaj tapushallawankichejpuni?”, nispa. Fariseostaj phiñakuspa payta sinagogamanta qharqorqanku.

Jesustaj chay runawan tinkuspa nerqa: “¿Mesiaspi creenkichu?”, nispa. Chay runataj nerqa: “Pichus kasqanta yachayman chayqa, paypi creeyman”, nispa. Jesustaj nerqa: “Noqa kani Mesías”, nispa. Jesusqa chay runawan may kʼacha karqa, payta sanoyacherqa, paypi creenanpajpis yanaparqa.