Jesusta presochanku

Jesuswan apostolesninwanqa, Cedrón wayqʼonta Olivos orqoman rerqanku. Chaypachaqa chaupi tuta pasayña karqa, killa juntʼataj kasharqa. Jesusqa Getsemaní huertaman chayasqankutawan nerqa: “Kaypi quedakuychej, rijchʼarisqataj kaychej”, nispa. Payqa llakisqa kasharqa, aswan jaqaynejman rispataj qonqoriykukuspa orakorqa: “Munayniyki ruwakuchun”, nispa. Jehová Diostaj payta kallpachananpaj ujnin angelninta kachamorqa. Chantá Jesusqa kutispa kinsa apostolesninta puñushajta tariparqa. Chayrayku nerqa: “Rijchʼariychej, mana puñuna horaschu. Enemigosniyman jaywaykunawankupaj hora chayamunña”, nispa.

Chay ratopachataj, Judasqa ashkha runaswan chayman chayarqa. Chay runastaj espadasniyoj, kʼaspisniyoj karqanku. Judasqa yacharqa Jesús chaypi kashasqanta, imajtinchus ashkha kutista Jesuswan chayman rerqaña. Judasqa soldadosman nerqa jina, Jesusman cheqanta chimpaytawan, “imaynalla Yachachejníy” nispa muchʼaykorqa. Jesustajrí taporqa: “Judas, ¿ujta muchʼaykuwaspachu japʼichiwanki?”, nispa.

Jesusqa ñaupajman rispa Judaswan jamojkunata nerqa: “¿Pitá maskʼashankichej?”, nispa. Paykunataj “Nazareno Jesusta” nerqanku. Paytaj nerqa: “Noqa kani”, nispa. Paykunataj suchurispa choqakorqanku. Jesustaj tapullarqataj: “¿Pitá maskʼashankichej?”, nispa. Paykunataj nerqanku: “Nazareno Jesusta”, nispa. Jesustaj nerqa: “Noqa kani niykichejqa. Saqeychej kay runas ripunankuta”, nispa.

Pedrotaj espadanta orqhoytawan kuraj kaj sacerdotej kamachin Malcoj ninrinta mururparerqa. Jesustaj ninrinta llankharispa sanoyacherqa. Chantá Pedrota nerqa: “Espadaykita waqaychay. Espadata oqharejkunaqa, espadallawantaj wañuchisqa kanqanku”, nispa. Chantá soldadosqa Jesuspa makisninta wataykorqanku, apostolestaj ayqekorqanku. Jesustaqa kuraj sacerdote Anaspaman pusarqanku. Paytaj Jesusta tapuykachaytawan, kuraj kaj sacerdote Caifaspaman pusacherqa. Qhepan capitulopi apostolesmanta yachakusunchej.