LECCIÓN 10
Reunionesniyku mayta yanapasonqa
Reunionesniykoqa yanapasonqa kausayniykipi, Diosman astawan qayllaykunaykipajpis. Ichá uj testigo tantakuyniykuman wajyarisorqaña. Jinapis niraj ni ujta rinkichu chayqa, manchachikushankichá riyta. Ichá nishanki: “¿Imaynataj reunionesninku kanman? ¿Imaraykú tantakunku? ¿Rinaypunichu kanman?”, nispa. Chaykunamanta kaypi yachakusun.
1. ¿Imapajtaj reunionesta ruwayku?
Reunionesta ruwayku Diosta yupaychanaykupaj, chaytaj mayta kusichiwayku. Bibliata qhelqajkunamanta uj runa jinata nerqa: “Ashkha tantasqa runas ukhupi Jehová Diosta yupaychasaj”, nispa (Salmo 26:12). Kunanpis Jehovaj testigosnenqa sapa semana tantakuyku Diosta jatunchanaykupaj, takispa yupaychanaykupaj, paymanta mañakunaykupaj ima. Sapa watataj jatuchaj asambleasta ruwallaykutaj.
2. ¿Imasmantataj reunionesniykupi yachachikun?
Reunionesniykupeqa Diospa Palabranmanta yachachikun, ‘sumajtataj sutʼinchakun ima niytachus munasqanta’ (Nehemías 8:8 leey). Reunionesniykupeqa Jehová Diosmanta, imaynachus pay kasqanmantawan yachakunki. Mayta munakususqanta yachaspataj, payman astawan qayllaykunki. Yachakullankitaj Jehová Diosqa kusisqa kausakunaykipaj yanapasuyta munasqanta (Isaías 48:17, 18).
3. ¿Imaraykutaj reunionesniykuman rinayki may sumaj?
Reunionesniykupeqa purajmanta munanakoj runasta rejsinki. Paykunaqa qan jinallataj Diosmanta astawan yachakuyta munanku. Reunionesniykupeqa kallpacharinapaj jinapuni Bibliamanta yachachikun (Romanos 1:11, 12 leey). Chantapis ashkha hermanasta, hermanosta rejsinki. Paykunamanta wakin solteros chayri casados kaspapis llakiykunasniyoj kanku. Jinapis kusisqa kausakunku. Chayrayku Jehovaqa, kamachisnin tantakunankuta munan. Payllataj Biblianejta niwanchej: ‘Ujkuna ujkunawan purajmanta qhawarinakuychej, ajinamanta astawan munakuy kananpaj, allin ruwaykunatataj ruwanaykichejpaj. Amataj tantakuykunaman riyta saqeychejchu’, nispa (Hebreos 10:24, 25).
ASTAWAN YACHAKUNA
Kaypi yachakusun imaynachus tantakuykunasniyku kasqanta, imaraykuchus chaykunaman rina kasqantapis.
4. Reunionesniyku
Ñaupa tiempomanta cristianosqa, Jehová Diosta yupaychanankupaj sapa kuti tantakoj kanku (Romanos 16:3-5). Colosenses 3:16 leeriychej, chantá yachakojta tapuriy:
¿Imastataj ñaupa tiempomanta cristianos ruwasqanku Diosta yupaychanankupaj?
Kunanpis Jehovaj testigosnenqa sapa semana tantakuyku. Imaynachus tantakuykuna kasqanta yachanapaj VIDEOTA qhawariychej, chantá reunionesmanta dibujota qhawariychej. Chaymantataj yachakojta tapuriy:
Kay videopi rikusqanchejman jina, ¿imaynataj reunionesniyku ruwakoj kasqa? ¿Colosenses 3:16 nisqanman jinapunichu ruwakoj kasqa?
¿Imastaj videomanta chayri dibujomanta astawan gustasunki?
2 Corintios 9:7 leeriychej, chantá yachakojta tapuriy:
Leerisqanchejman jina, ¿reunionesniykuman jamojkunata qolqeta qonankupaj obligajchu kasqayku?
Yachachejpaj: Bibliamanta yachakojman willariy imasmantachus qhepan reunionpi parlakunanta. Chantá yachakojta tapuriy:
Kay qhawarisqanchejmanta, ¿mayqenmantataj astawan yacharikuyta munawaj?
Astawan yachanaykipaj
Internetpi jw.org nisqaman yaykuspa, maypichus, ima horachus reunionesniyku ruwakusqanta yachawaj.
Reunionesniykupeqa wakin hermanos Bibliamanta yachachimunku, videos rikuchikun, waj imaspis kallantaj. Sapa reunionniyku uj takiywan mañakuywan ima qallarin.
Reunionniykuman jamojkunaqa makita oqharispa parlariyta atinku.
Reunionesniykumanqa tukuy jamuyta atinku: qharis, warmis, kuraj runas, jóvenes, wawaspis.
Reunionesniykupeqa mana pimantapis qolqeta mañaykuchu, yaykunapajpis mana pagakunchu.
5. Reunionesman rinapaj tukuy atisqanchejta ruwana
Jesuspa familianmanta parlarina. Paykunaqa Nazaretpi tiyakorqanku, sapa watataj Jerusalenman Diosta yupaychaj rej kanku. Paykunaqa chayman chayanankupaj kinsa diata jina purej kanku lomarara lugaresninta. Lucas 2:39-42 leeriychej, chantá yachakojta tapuriy:
Jesuspa familianpaj, ¿Jerusalenman rinanku facilchu kanman karqa?
Qanrí, ¿imastataj ruwanayki kanman reunionesman rinaykipaj?
Tantakuykunaman rinaykipaj kallpachakusqayki, ¿qhasipajchu kanqa? ¿Imaraykú chayta ninki?
Bibliaqa yachachiwanchej Jehová Diosta yupaychanapajqa tantakunapuni kasqanta. Hebreos 10:24, 25 leeriychej, chantá yachakojta tapuriy:
¿Imaraykutaj reunionesman rinapuni kasqa?
WAKIN RUNAS NINKU: “Noqamantaqa mana uj iglesiamanpunichu rina tiyan, wasillanchejpi Bibliata leekuspa Diosta yupaychasunman”, nispa.
¿Ajinata nejkunaman imatá niwaj chayri ima versiculota rikuchiwaj?
¿IMASTÁ YACHAKUNCHEJ?
Kaypi yachakunchej reunionesman rispa Jehová Diosta astawan rejsiyta atisqanchejta, paymantaj astawan qayllaykuyta atisqanchejta. Yachakullanchejtaj wajkunawan khuska payta yupaychayta atisqanchejta.
Yuyarikunapaj
¿Imaraykutaj Jehová Dios tantakunanchejta munan?
¿Imastá reunionesniykupi yachakuwaj?
¿Reunionesniyku waj imaspipis yanapasunkimanchu?
ASTAWAN YACHAKUNAYKIPAJ
Uj runaqa reunionesniykuman jamuyta manchachikorqa. ¿Imataj yanaparqa niña manchachikunanpaj? Chayta yachanaykipaj kay videota qhawariy.
Kʼachamanta parlapawasqaykutaqa ni jaykʼaj qonqasqaykuchu (4:16)
Uj jovenman reunionesniyku mayta gustaj. Mana faltakunanpaj imatachus ruwasqanta yachanaykipaj kay videota qhawariy.
Imatachus waj runas reunionesniykumanta nisqankuta yachanaykipaj kayta leeriy.
Imaynatachus tantakuykunasniyku uj pandillerota yanapasqanta yachanaykipaj kayta leeriy.
“Pistolaywanpuni purej kani” (Torremanta Qhawaj, 1 de julio de 2014)