¿Yachachinachu wawasman Diosmanta?

KAY tiempopi religionmanta wawasman yachachinapaq achkha yuyaychaykuna tiyan, chaywanpis tatas wawasninkuman Diosmanta mana parlana kasqanta wakin runas yuyanku. Religionniyuq familiaspi wawas uywakunku chayqa mana allinchu kasqanta ninku.

¿Imatá yuyanki? ¿Mayqintaq kay yuyasqankumanta chiqan kasqanta niwaq?

● Tatas wawasninkuman Diosmanta parlayta mana saqikunanchu tiyan.

● Tatas wawasninkuman religionmanta parlanankupaq, wiñanankutaraq suyananku tiyan.

● Tatasqa wawamantapacha religionninkuta yachachinanku tiyan. Wiñaptinkutaq sapallankumantaña ukhunchanankupaq kallpachananku tiyan.

● Wawas tatasninkup religionninkuta mana imata nispalla yachakunanku tiyan.

¿Allinchu Religión wawaspaq?

Allin tataqa wawasninpa allinninta maskʼan. Chayrayku wawas religionmanta mana yachanankuchu tiyan nisqanku, ¿chiqachu? Yachayniyuq runasqa tataspa religionnin imaynatachus wawasta yanapasqanta achkha watastaña ukhunchanku. ¿Ima yuyaymantaq chayanku?

Wawasta religión mana allinman tukuchinanmantaqa, wiñasqankumanjina sumaqmanta yanapayta atisqanta reparanku. Kay 2008 watapi Social Science Research, nisqa revistapi nirqanku: “Religionqa wawapura chantá tatasninkuwan allinta apanakunankupaq mayta yanapasqanta reparayku”, nispa.a Nillankutaq: “Religión, Diosta yupaychay ima tukuy wawaspa kawsayninkupi mayta yanapan, familiankuwan allinta apanakunankupaqpis.” Jinata nisqanku Jesucristop nisqanman kikinchakun: “Diospa Palabranta uyarispa kasojkunamari kusikuyniyojqa kanku”, nispa (Luc. 11:28).

Diosmanta, religionmanta ima wawasman yachachinapaq, wiñanankutaraq ­suyanamanta, ¿imatá nisunman? Ajinata yuyaqkunaqa wawaspa yuyayninku mana qillqasqa papelman rikchʼakusqanta mana reparankuchu. Chayrayku tatas iskayniqmanta ruwayta atisqankuta nisunman: Llimphu kawsayniyuq kaymanta, creenciasninkumanta ima “qillqayta” atinku chayri wak yachachiykuna, wawasninkup yuyayninman, sunqunman ima juntʼananta saqillanku.

¿Imatá ruwana kanman?

Religionqa unaymantapacha runata chiqninachiyta, churanachiyta ima atisqanta rikuchin. Wawasninku kayjinapi mana rikukunankupaq, ¿imatá tatas ruwankuman? ¿Imaynatá runa masinkuta munakunankupaq yachachisunman?

Kay kimsa tapuykuna imatachus tatas ruwayta atisqankuta rikuchin: 1) ¿imastá yachachina tiyan?; 2) ¿pitaq yachachinan tiyan?, chantá 3) ¿imaynatá allinta yachachisunman?

[Sutʼinchaynin]