Wawasta yachachinapaq
¿Imaraykutaq Dorcas may munasqa karqa?
TUKUYPIS munakunawanchikta necesitanchik. ¿Imatá chaymanta yuyanki?a... Bibliaqa Dorcas warmimanta willawanchik, pitachus tukuy runas mayta munakurqanku.
Payqa Jesuspa ñawpaq kaq discipulasninmanta juknin karqa, Jerusalenmanta 56 kilometrosninmanjina mama quchaq kantunpi, Jope llaqtapi tiyakuq.
¿Imaraykutaq Dorcasta chayjinatapuni munakurqanku?... Bibliaqa may chhika regalosta qusqanta chantá wakkunata yanapasqanta willawanchik. Viudaspaq kʼachitu pʼachasta ruwaq karqa. Chantapis, Jehová Diosmanta Jesusjina tukuyman willaq.
¿Imachus Dorcasta pasasqanta yachankichu?... Mayta unquykuspa wañupurqa. Tukuy amigosnintaq mayta llakikurqanku, chayraykutaq Pedrota waqyachirqanku, pichus 16 kilometrosmanjina kachkarqa, usqhayllata jamunanpaq. Apóstol Pedro chayamusqantawan altopata wasiman wicharirqa, maypichus Dorcas wañusqa kachkarqa, warmistaq waqaspa Dorcap ruwasqasnin pʼachasta rikuchirqanku.
Chantá tukuyninku jawaman lluqsinankuta Pedro nirqa. Pay, wak apóstoles ima milagrosta ruwarqankuña, chaywanpis ni mayqin wañusqata kawsarichirqachu. ¿Imatataq Pedro chaymanta ruwanman karqarí?...
Wañusqap ladonpi qunqurikuspa Jehovamanta mañakurqa. Chantá Dorcasman sayarinanta kamachirqa, paytaq sayarikurqa. Pedrotaq makinmanta aysarirqa. Dorcas kawsarimusqanta rikunankupaq viudasta waqyarqa. ¿Imayná kusisqachus tukuyninku kachkasqankuta yuyankichu?...
Dorcas kawsarimusqanmanta imatachus yachakunanchikta qhawarina. Wakkunata yanapanki chayqa mayta munakusunqanku. Astawanpis Dios munakusunqa, nitaq allin ruwasqaykimanta qunqapunqachu chantá Paraisopi wiñaypaq kawsakunaykita saqisunqa.
Bibliata Ñawirinapaq
[Sutʼinchaynin]
a Juk wawitawan kay yachaqanata ñawirichkanki chayqa, kimsa puntitos rikhuriptin, chay puntitospa ñawpaqinpi rikhuriq tapuyman kutichinanta mañay.