Milagrospi, ¿Imaraykú interesakuna tiyan?
“Milagrosqa, cienciaj yachachiyninta iskayrayachin.” (RICHARD DAWKINS, EX CATEDRÁTICO PARA LA COMPRENSIÓN PÚBLICA DE LA CIENCIA)
“Milagrospi creenapaj pruebas tiyan. Religionniyojkunaqa, milagrospi creesqankumanta mana pʼenqakunankuchu tiyan. Milagros kan, Diospa munakuyninrayku, ruwasqasninpi interesakusqanrayku ima.” (ROBERT LARMER, CATEDRÁTICO DE FILOSOFÍA)
¿MILAGROS, kanchu? Kay iskay runas nisqankoqa, mana tukuy runaschu kikinta yuyasqankuta rikuchin. Qanrí, ¿ima ninkitaj?
Ichá milagrospi creesqaykita mana niyta atillankichu. Wakinkuna jinataj, imapipis creejlla kasqaykita, chayri pisi yachayniyoj kasqaykita rikuchisusqanta ichá yuyawaj.
Chayri milagros kasqantapuni creenki. Ichapis mana Biblia milagrosmanta parlasqallanpichu creenki, nisunman Moisés Puka qochata iskayman khallarparisqanpi, manaqa kay tiempopi milagros ruwakusqanpipis. Kunallanraj uj willay sutʼinchasqanman jina, “Estados Unidospi pachaj runasmanta qanchis chunka phishqayoj, Gran Bretañapitaj pachaj runasmanta kinsa chunka pusajniyoj milagrospi creenku” (The Cambridge Companion to Miracles [Guía Cambridge de los milagros], editada por Graham H.Twelftree). Chaywanpis mana cristianosllachu milagrospi creenku. Uj Diccionario nisqanman jina “ashkha religiones milagrospi creenku”.
Chayri wajkuna jina ichá niwaj: “Milagrosmanta mana yachanichu, nitaj interesawanchu. Noqapajqa mana milagros kanchu”, nispa. Chaywanpis, ¿imaraykutaj milagrosmanta yachananchej tiyan?
Sutʼincharinapaj, mana jampiyta atina onqoyniyoj kasqaykipi tʼukuriy, chantá onqoyniykimanta sanoyakunaykipaj uj jampi kasqanta uj revistanejta yachanki. Chay jampimanta astawan yachanaykipaj, ¿manachu tiempochakuwaj, kallpachakuwaj ima? Bibliaqa, uj chhikamantawan tʼukunapaj jina milagros kay Jallpʼapi ruwakunanta nin. Chay nisqan cheqachus manachus kasqanta yachanaykipaj, ¿manachu allin kanman tiempochakunayki, kallpachakunayki ima?
Manaraj mayqenkunachus tʼukunapaj jina milagros kasqanmanta yachakushaspa, milagrospi mana creejkuna, imastachus nisqankuta ukhuncharinachej.
[3 paginapi recuadro]
¿IMATAJ UJ MILAGRO?
Milagroqa, mayta tʼukunapaj jina ruwaykuna, chaytaj mana rejsisqa chayri mana sutʼinchay atina imasmanta rikhurin, manataj runamantachu jamun.