Leejkunaj tapuyninku

Mateo 19:10-12 versiculospi, ¿soltero qhepakuyta munajkuna milagropi jina chay atiyta japʼisqankutachu Jesús nisharqa?

Imamanta parlashaspachus Jesús chayta solterosmanta nisqanta qhawarina. Jesusqa wakin fariseos divorciakuymanta tapojtinku, ima kamachiytachus Dios casarasqasman qosqanta sutʼita nerqa. Leyman jinaqa, uj qhari warminpi “ima pʼenqaytapis” tarispa tʼaqakuy papelta warminman jaywapuyta aterqa, chaywanpis qallariypeqa mana jinachu karqa (Deu. 24:1, 2). Chayrayku Jesús nerqa: “Sichus pipis warminmanta tʼaqakun mana pay wajwan wasanchaspa khuchichakojtillan, waj warmiwantaj casarakun chayqa, khuchichakuspa qhenchachakun”, nispa (Mat. 19:3-9).

Jesuspa yachachisqasnenqa, chayta uyarispa jinata nerqanku: “Sichus ajinata qhari kawsanan kashan warminwan chayqa, mana allinchu casarakunaqa”, nispa. Jesustaj kuticherqa: “Mana tukuy runaschu kay yachachiytaqa japʼeqayta atinku; pikunamanchá kay [atiy] qosqa kashan, chaykunalla atinku. Wakin qharisqa nacesqankumantapacha mana casarakunankupajchu kanku, wakintataj runas capanku; wakintaj paykunaj munayninkumanta, janaj pacha reinorayku mana casarakunkuchu. Pichus chayta japʼeqayta atejqa japʼichun”, nispa (Mat. 19:10-12).

Uj qhareqa, nacesqanmantapacha mana casarakunanpaj jinachu karqa chayri imanarpakusqanrayku chaytajrí capasqa kasqanrayku. Chaywanpis, wakenqa casarakuyta atispapis, mana munayninkuwan atipachikuspa, “janaj pacha reinorayku” mana casarakorqankuchu. Paykunaqa Jesús jina, Reinorayku astawan llankʼanankupaj solteros qhepakorqanku. Chaywanpis, mana nacesqankumantapachachu chaypaj jina karqanku, nitaj milagropi jinachu chay atiyta japʼerqanku. Astawanqa, paykuna kikin munasqankurayku solteros qhepakuyta ajllarqanku.

Apóstol Pabloqa, tukuy cristianos casarasqaspis chayri solterospis, Diosta sirviyta atisqankuta nerqa. Chaywanpis Jesús nisqanman jinallataj, “[sonqonpi sumaj sayasqa, NM]” kaspa soltero qhepakojqa “aswan allinta” ruwasqanta nerqa. ¿Imaraykú? Imaraykuchus casarasqa kajkunaqa, qosankuta chayri warminkuta kusichinankupaj, qhawanankupaj ima tiempochakunanku, kallpachakunankutaj tiyan. Solterostajrí, mana ajinapichu rikukusqankurayku Señorpaj astawan llankʼayta atinku. Chayrayku, soltero qhepakojkunaqa chay “atiyta”, Diospa regalonta jina qhawanku (1 Cor. 7:7, 32-38).

Rikunchej jina Bibliaqa solteros qhepakojkuna, nisunman solteros kaspa kusisqa kayta atejkuna, mana uj milagronejtachu chay atiyta japʼisqankuta nishan. Manaqa, pay kikin soltero kayta ajllan, ajinamanta Reinorayku astawan llankʼananpaj. Ashkha cristianosqa, chayrayku solteros qhepakuyta ajllanku, waj hermanostaj chayta juntʼanankupaj yanapankuman.