BIBLIAJ KUTICHIYKUNASNIN

¿Imaynataj Dios?

Diosqa uj espíritu, chayrayku mana rikuyta atinchejchu. Payqa cielota, Jallpʼata, tukuy ima kausajtawan ruwarqa. Diostaqa ni pipis ruwarqachu. Payqa “wiñaymanta wiñaykama” (Salmo 90:2). Diosqa munan, runas payta maskʼanankuta, paymantataj cheqa kajta yachanankuta. (Hechos 17:24-27 leey.)

Diosqa sutiyoj. Ruwasqasninta qhawarispa, imaynachus kasqanta yachasunman (Romanos 1:20). Astawan allinta rejsinapajtaj, Palabranta nisunman Bibliata ukhunchananchej tiyan. Ajinamanta Dios imaynachus kasqanta yachasun. (Salmo 103:7-10 leey.)

¿Dios llakikunchu sajra ruwaykunata rikuspa?

Jehovaqa sajra ruwaykunata chejnikun (Deuteronomio 25:16). Rijchʼayninman ruwawasqanchejraykutaj, noqanchejpis sajra ruwaykunata chejnikullanchejtaj. Diosqa sajra ruwaykuna kasqanmanta, mana juchayojchu. Chantapis Payqa, runata ajllayta atinanpaj ruwarqa. Llakikunapaj jinataj, ashkhas sajra kajta ruwayta ajllanku. Jehovaqa chayta rikuspa sonqonta nanachikun. (Génesis 6:5, 6; Deuteronomio 32:4, 5 leey.)

Jehovaqa cheqa kajta munakusqanrayku, mana wiñaypajchu sajra ruwaykuna kananta saqenqa (Salmo 37:28, 29). Bibliaqa, Jehová Dios tumpamantawan sajra ruwaykunata chinkachinanta nin. (2 Pedro 3:7-9, 13 leey.)