Reyestaj, sacerdotestaj kankichej

1, 2. ¿Imaraykutaj warmej miraynin jarkʼasqa kayta necesitarqa?

BIBLIAJ ñaupaj kaj profecianqa, Jehovaj munaynin imaynatachus juntʼakunanta rikuchiwanchej. Jehovaqa Edén huertapi tratota ruwashaspa, Satanasman nerqa: “Qantawan, warmitawan chejninachisqaykichej. Jinallataj mirayniykiwan, mirayninwampis chejninakonqanku”, nispa. ¿Imaynatapuni chejninakunanku karqa? Jehovaqa warmej miraynin Satanaspa ‘umanta’ saruspa pʼaltarparinanta nerqa. Chantapis nillarqataj Satanás, warmej mirayninta “chaki talonninmanta” khaninanta (Gén. 3:15). Iskayninku maytapuni chejninakunanku karqa. Satanasqa warmej mirayninta chinkachiyta munaspa tukuy imata ruwanan karqa.

² Chayraykuchá uj salmista nerqa: “Qhaway ari imaynatachus enemigosniyki chejnikususpa chʼajwasqankuta, contraykipi oqharikuspa. Paykunaqa aylluykej contrampi trampasta wakichinku, munakusqasniykita urmachiyta munaspa. Jamuspa, tukuchiyta munawayku, amaña nación jina kanaykupaj”, nispa (Sal. 83:2-4). Satanasqa, pinejtachus warmej miraynin jamunan karqa chay familiata chinkachiyta, chʼichichayta ima munarqa. Jehovataj warmej mirayninta jarkʼananpaj, Cristoj kamachiynin munayninta juntʼakunanpaj ima contratosman rijchʼakoj tratosta ruwarqa.

WARMEJ MIRAYNINTA JARKʼAJ TRATO

3, 4. 1) ¿Maykʼajtaj Leypa traton qallarerqa, imata ruwanankutataj israelitas nerqanku? 2) ¿Imapajtaj Leypa traton ruwakorqa?

³ Abrahampa, Isaacpa, Jacobpa mirayninku may chhikaman tukojtinku, Jehová uj nacionman paykunata tukucherqa, chaytaj karqa ñaupa tiempomanta Israel llajta. Jehovaqa, Moisesnejta chay llajtawan uj tratota ruwarqa. Chaytaj ni imawanpis kikinchakorqachu. Jehovaqa chay llajtaman Leyta qorqa, chay llajtamanta kajkunataj chay Leyta juntʼanankuta nerqanku. Biblia nin: “Moisesqa [...], chay trato ruwasqan libro qhelqasqanta runasman leeykorqa. Chaypachataj runasqa nerqanku: Noqaykoqa Tata Diospa nisqasninta, kamachisqasninta ima ruwasqayku, nispa. Chantá Moisés [torospa yawarninta] japʼiytawan, runasman chʼajchuspa, nerqa: Kay yawarqa Tata Dios qankunawan uj tratota ruwasqan yawar, tukuy kay nisqaman jina”, nispa (Éxo. 24:3-8).

⁴ Leypa tratonqa, israelitas Sinaí orqopi kashajtinku qallarerqa, 1513 watapi Jesús niraj jamushajtin. Chay tratonejtataj Jehovaqa, Israel llajtata ayllun kananpaj ajllakorqa. Chaymantapachataj Juezninku, leyesta Churapojninku, Reyninku ima karqa (Isa. 33:22). Israel llajtaj kausaynenqa sutʼita rikuchiwanchej, Diospa cheqan kamachiykunasninta kasukojtinchej chayri mana kasukojtinchej imapichus rikukunanchejta. Chay Leyqa warmej mirayninta jarkʼananpaj ruwasqa karqa, chayrayku waj llajtayoj runaswan casarakuyta, waj dioskunata yupaychayta ima juchacharqa (Éxo. 20:4-6; 34:12-16).

5. 1) Israelitas Diospa kamachiykunasninta kasukuspa, ¿imataj kayta atinkuman karqa? 2) ¿Imaraykú Jehová israelitasta qhesacharqa?

⁵ Leypa tratonejta Jehovaqa, Israel llajtapi sacerdotesta churarqa. Chay sacerdotes kasqankutaj, aswan qhepaman waj sacerdotes runasta astawan yanapanankuta rikucherqa (Heb. 7:11; 10:1). Cheqamantapuni israelitasqa Diospa kamachiykunasninta kasukuspalla, “reyestaj, sacerdotestaj” kankuman karqa (Éxodo 19:5, 6 leey). Chaywanpis paykunaqa, chay kamachiykunata mana kasukorqankuchu. Imaraykuchus Abrahampa mirayninmanta ñaupaj kaj mirayta, nisunman Mesiasta qhesacharqanku. Chayraykutaj Jehovaqa paykunata qhesacharqa.

6. ¿Imapajtaj Ley ruwakorqa?

⁶ Israelitas Diosta mana kasukusqankurayku, mana reyeschu nitaj sacerdoteschu karqanku. Chaytaj mana ninayanchu Dios Leyta qosqan, qhasipaj kasqanta. Diospa Leynenqa, warmej mirayninta jarkʼananpaj, pichus Mesías kasqanta rikuchinanpaj ima ruwasqa karqa. Jesucristo kay Jallpʼaman jamojtin, pichus kasqanta yachakojtin ima chay Leyqa juntʼakorqa. Chayraykutaj Biblia nin: “Leyqa Cristopi juntʼakun”, nispa (Rom. 10:4). Jina kajtin, ¿pikunataj reyes, sacerdotestaj kankuman karqa? Jehovaqa, waj tratota ruwarqa uj mosoj llajtata rikhurichinanpaj.

UJ MOSOJ LLAJTA RIKHURERQA

7. ¿Imatataj profeta Jeremiasnejta Jehová nerqa?

⁷ Leypa traton niraj juntʼakushajtin, Jehovaqa profeta Jeremiasnejta “mosoj tratota” Israel llajtawan ruwananta nerqa (Jeremías 31:31-33 leey). Mosoj tratoqa, Leypa tratonwan mana kikinchu karqa. Imaraykuchus mosoj tratopeqa, runaj juchan perdonasqa kananpaj mana uywa wañusqastachu qʼolachikunan karqa. ¿Imaynataj chay kanman karqa?

8, 9. 1) ¿Imastaj kan Jesús yawarninta jichʼasqanrayku? 2) ¿Imataj kayta atinku mosoj tratomanta kajkuna? (13 paginapi dibujota qhawariy.)

⁸ Ashkha watas qhepaman Jesusqa 33 wata 14 nisán pʼunchaypi Señorpa Cenanta ruwarqa, vinomanta parlaspataj 11 cheqa sonqo apostolesninman nerqa: “Kay copaqa yawarniypi mosoj tratomin, qankunarayku jichʼasqa”, nispa (Luc. 22:20). Mateo libro nisqanman jinataj, Jesús nerqa: “Kayqa tratomanta yawarniy, chaytaj jichʼasqa kanqa ashkha runaspa juchasninku pampachasqa kanampaj”, nispa (Mat. 26:27, 28).

⁹ Jesús yawarninta jichʼasqanqa, mosoj trato valorniyoj kasqanta rikucherqa. Chantapis yawarninta jichʼasqanrayku, juchamanta wiñaypaj perdonasqa kayta atinchej. Jehovaqa mana Jesuswanchu chay mosoj tratota ruwarqa, imaraykuchus Jesuspi mana ni ima jucha kanchu, chayraykutaj mana perdonasqa kayta necesitanchu. Chaywanpis Jehovaqa, Jesuspa yawarninnejta Adanpa mirayninta yanapayta atin. Chantapis espíritu santonwan wakin cheqa sonqo runasta ajllaspa, “wawasnin[paj]” rejsikapuyta atillantaj (Romanos 8:14-17 leey). Chay ajllasqa kajkunataj ñaupaqenpi mana juchayoj kasqankurayku, Jesús jina kayta atinku. “Cristowan khuska[taj] herenciata” japʼiyta atinku. Israel llajtamanta nisqaqa “reyestaj, sacerdotestaj” kayta atinku. Paykunamanta parlaspa apóstol Pedro nerqa: “Qankunaqa Diospa ajllakusqan ayllu kankichej, [reyestaj, sacerdotestaj], juchamanta tʼaqasqa nación, Diospa rantikusqan ayllu, willanaykichejpaj tʼukuna may sumaj ruwasqasninmanta, pichus laqhamanta wajyasorqachej sumaj kʼanchayninman, chaypata”, nispa (1 Ped. 2:9). Rikunchej jina mosoj tratoqa may sumajpuni. Imaraykuchus chaynejta Jesuspa wakin yachachisqasnin, Abrahampa mirayninmanta iskay kaj miray kayta atinku.

MOSOJ TRATO QALLARIN

10. ¿Maykʼajtaj mosoj trato qallarerqa, imaraykutaj mana astawan ñaupajta qallarerqachu?

¹⁰ ¿Maykʼajtaj mosoj trato qallarerqa? Chay tratoqa mana qallarerqachu, Jesús wañunan pʼunchaymanta ñaupaj chʼisin chay tratomanta parlashajtin. Imaraykuchus mosoj trato qallarinanpajqa, Jesús yawarninta jichʼanan karqa, chaywantaj janaj pachaman kutispa Diospa ñaupaqenman yaykunan karqa. Chantapis “Cristowan khuska herenciata” japʼejkuna espíritu santowan ajllasqa kananku karqa. Chayrayku Jesuspa wakin cheqa sonqo yachachisqasnin Pentecostés 33 watapi espíritu santowan ajllasqas kasqankutawan, mosoj trato qallarerqa.

11. 1) ¿Imaynatá judiosta, mana circuncidasqa kajkunatapis mosoj trato yanaparqa Diospa mosoj llajtanmanta kanankupaj? 2) ¿Mashkha runastaj mosoj tratopi kanku?

¹¹ Jehovaqa Jeremiasnejta uj mosoj tratota Israel llajtawan ruwananta nerqa. Chayta nisqanmantapacha Leypa traton “mawkʼaña” kaspapis, manaraj chay kutipi tukukorqachu. Manaqa mosoj trato qallarejtinraj tukukorqa (Heb. 8:13). Jehovaqa mosoj trato qallarisqantawan, judiosta, waj llajtayoj mana circuncidasqa runastapis uj rejllapajña qhawarqa. Imaraykuchus chaymantapacha “circuncidasqa ka[yqa] Espíritu Santonejta sonqopi circuncidasqa [...] manataj qhelqasqa leynejtachu” karqa (Rom. 2:29). Chantapis Jehovaqa paykunaj “yuyayninku[pi], sonqosninkupitaj” mosoj tratonejta leyesninta qhelqanan karqa (Heb. 8:10). Mosoj tratopi kajkunaqa 144.000 runas kananku karqa. Paykunataj mosoj llajta “Diospa nacionnin Israel” kananku karqa (Gál. 6:16; Apo. 14:1, 4).

12. ¿Imapitaj Leypa tratonwan, mosoj tratowan kikillan kanku?

¹² ¿Imapitaj Leypa tratonwan, mosoj tratowan kikillan kanku? Leypa tratontaqa Jehová Israel llajtawan ruwarqa. Mosoj tratotataj Jehová ajllasqa cristianoswan ruwarqa. Iskaynin tratospitaj uj allinyachej tiyan. Leypa tratonpeqa Moisés karqa, mosoj tratopitaj Jesús. Iskaynin tratos valorniyoj kananpajtaj yawar jichʼakorqa. Leypa tratonpeqa animalespa yawarnin jichʼakorqa, mosoj tratopitaj Jesuspa yawarnin. Leypa tratonman jina Israel llajtata kamachejqa Moisés karqa. Mosoj tratoman jinataj, mosoj llajtaj kamachejnenqa Jesús, pichus qotuchakuypa Uman (Efe. 1:22).

13, 14. 1) ¿Imaynatá rikuchin mosoj trato Diospa Reinon jamunantapuni? 2) ¿Imataj necesitakun ajllasqa cristianos Jesucristowan khuska kamachimunankupaj?

¹³ ¿Imaynatá mosoj trato rikuchin Diospa Reinon jamunantapuni? Mosoj tratoman jinaqa Diospaj uj tʼaqasqa llajta rikhurin. Chay llajtamanta kajkunataj Diospa Reinonpi reyestaj, sacerdotestaj kayta atinku. Abrahampa mirayninmanta iskay kaj miraytaj kanku (Gál. 3:29). Mosoj tratoqa Abrahamwan Dios tratota ruwasqan juntʼakunantapuni rikuchin.

¹⁴ Yachakunchej jina mosoj tratoqa, Diospaj uj mosoj llajtata rikhuricherqa. Chantapis chay llajtamanta kajkuna “Cristowan khuska herenciata” japʼinankupaj uj contrato jina karqa. Jinapis uj imatawanraj ruwakunan karqa. Ajllasqa kajkuna “Cristowan khuska herenciata” japʼinankupaj, nisunman reyestaj sacerdotestaj kanankupajqa, uj tratopiwan, chayri uj contratopiwan necesitakorqa.

CRISTOWAN KHUSKA WAJKUNA KAMACHIMUNANKUPAJ TRATO

15. ¿Ima tratotataj Jesús cheqa sonqo apostolesninwan ruwarqa?

¹⁵ Jesusqa Señorpa cenanta ruwaytawan apostolesninwan uj tratota ruwarqa. Chaytaj uj Reinopaj trato sutikun (Lucas 22:28-30 leey). Chay tratotaqa mana Jehovachu ruwarqa chay waj tratosta jina. Astawanpis Jesús chay tratota apostolesninwan ruwarqa. Chantá “imaynatachus Tatay noqawan uj tratota ruwarqa, NM” nispaqa, ichapis paywan “Melquisedecpa tʼaqanman jina” sacerdote kananpaj Jehová tratota ruwasqanmanta parlasharqa (Heb. 5:5, 6).

16. Uj Reinopaj trato ruwakusqanrayku, ¿imatá ajllasqa cristianos ruwayta atinku?

¹⁶ Jesuspa 11 apostolesnenqa, Jesús pruebaspi rikukushajtin payman cheqa sonqosllapuni karqanku. Uj Reinopaj tratotaj, paykuna Jesuswan khuska Diospa Reinonpi kamachina tiyanaspi tiyaykuspa reyestaj, sacerdotestaj kanankuta rikucherqa. Chantapis mana paykunallachu chay ruwaykunata japʼinanku karqa. Imaraykuchus Jesucristoqa uj mosqoypi jina apóstol Juanman rikhurispa nerqa: “Atipajtaqa kamachina tiyanaypi noqawan tiyanampaj jina ruwasaj, imaynatachus noqapis atipaytawan Tataywan khuska kamachina tiyanampi tiyaykorqani, ajinata”, nispa (Apo. 3:21). Arí, uj Reinopaj tratopeqa 144.000 ajllasqa cristianos kashanku (Apo. 5:9, 10; 7:4). Chayraykutaj paykuna Jesuswan khuska janaj pachamanta kamachimuyta atinku. Uj reywan casarakoj noviapi tʼukurina. Noviaqa reywan casarakusqanrayku reywan khuska kamachiyta qallarin. Bibliaqa ajllasqa cristianosmanta parlaspa Cristoj ‘novian’, “qharejpa mana chayasqan sipas” casarakunanpaj wakichisqa kasqanta nin (Apo. 19:7, 8; 21:9; 2 Cor. 11:2).

DIOSPA REINONPI SINCHʼITA CREENA

17, 18. 1) Diospa Reinon jamunantapuni rikuchej sojta tratosmanta parlariy. 2) ¿Imaraykutaj Diospa Reinonpi sinchʼita creenchej?

¹⁷ Kay iskay yachaqanaspi tratosmanta ukhuncharqanchej. Sapa uj tratotaj Jehová Diospa Reinon jamunantapuni rikuchin (12 paginapi “¿Imaynatá Dios munayninta juntʼanqa?”, nisqa recuadrota qhawariy). Chaytaj Diospa Reinon contratospi sumaj sayasqa kasqanta rikuchin. Chayraykutaj Jesucristoj kamachiyninpi sinchʼita creeyta atinchej. Chantapis Jehovaqa Jesucristoj kamachiyninnejta kay Jallpʼapaj, runaspaj ima munayninta juntʼanqa (Apo. 11:15).

¹⁸ Diospa Reinollan wiñaypaj bendicionesta apamunanmanta, ¿iskayrayasunmanchu? Cheqamantapuni nisunman Jehová Diospa Reinollan tukuy chʼampaykunasninchejta wiñaypaj chinkachinanta. Chayrayku chay Reinomanta sumaj willaykunata sonqo kʼajaywan runasman willamunallapuni (Mat. 24:14).