TAPANMANTA | ¿IMAYNATÁ LLAKIYTA ATIPASUNMAN?
Llakiykunaqa jallpʼantinpi tiyan
Zimbabuemanta Paul, nin: “Mikhunata rantej rejtiy galletaslla karqa. May valesqataj. Qʼayantinrí ni ima karqañachu”.
Estados Unidosmanta Janet, nin: “Qosay saqerparinawanta niwajtin, ni imanakuyta aterqanichu. Wawasniywan imachus kanantataj mana yacharqanichu”.
Israelmanta Alona, nin: “Guerrapi alarma sonayta qallarejtinkama maypichus pakakuna tiyan chayman ayqeni, pasanankama. Pasajtinñapis mancharisqallapuni kashani”.
Llakiy tiempopi kausanchej “manchay sajra pʼunchaykuna[pitaj]” (2 Timoteo 3:1). Ashkhasqa llakikunku qolqemanta, familiankumanta, guerrasmanta, onqoykunamanta, waj sajra ruwaykuna kasqanmantataj. Sapa ujtaj llakiyniyoj kanchej. Wakenqa llakikunku doctorman rispa cancerniyoj kasqankuta yachanankumanta. Wakintaj llakikunku wawasninku, allchhisninku ima imaynatachus kausanankumanta.
Chaymantaqa tukuy llakikunchej. Chantapis llakikusunman examenta niraj qoshaspa, ashkha runaj ñaupaqenpi parlaymanta chayri llankʼayta tarispa patronwan parlaymanta. Tumpata llakikoyqa yanapawanchej imatapis allinta ruwanapaj. Jinapis anchata llakikoyqa mana allinchu. Imajtinchus niraj wañunapi wañupusunman, chaytataj yachakorqa 68.000 kuraj runaspa kausayninkupi. Chayraykuchá Jesús nerqa: “Astawan causayta munaspa, llaquicuspapis ¿uj chhicatawan causayta atiwajchejchu?”. Chantá: “Amaña anchata llaquicuychejchu”, nispa (Mateo 6:25, 27, Dios Parlapawanchej [DP]). Jinapis, ¿llakiyta atipasunmanchu?
Chaypajqa kallpachakuna. Diosmanta mañakuna, imatachus qhepaman ruwananta nisqanpitaj atienekuna. Kay revistapitaj imaschus Paulta, Janetta, Alonata ima llakiyninkuta atipanankupaj yanapasqanta qhawarisun. Chaytaj yanapawasun, chay jina llakiykunapi rikukojtinchej.