¿YACHARQANKICHU?

Ñaupa tiempopi, ¿imaynatá kʼuyuna librosta ruwakoj chantá imaynatá apaykachakoj?

Lucas libropi nin, Jesús Isaiaspa kʼuyuna libronta leespa kʼuyuykapusqanta. Chantá apóstol Juanpis nillantaj libronta qhelqayta tukuchashaspa, Jesús milagrosta ruwasqanta mana tukuynintachu kʼuyuna libronpi qhelqasqanta (Lucas 4:16-20; Juan 20:30; 21:25).a

¿Imaynatá ruwaj kanku kʼuyuna librosta? Juchʼuy qarasta chayri papiro nisqata jatun chhoqo hojas kanankama kʼaskachej kanku. Chaymantataj qhelqasqa ladomanta uj kʼaspipi kʼuyoj kanku. Qhelqasqataj kasharqa saytʼunman parrafospi jina. Kʼuyuna libro jatun kajtenqa, pichus leej, ujnin makinwan kʼuyuraj ujninwantaj kʼuyuykoj maskʼashasqan versiculota tarinankama.

Uj libro nisqanman jinaqa “uj kʼuyuna libro 10 metros jina kajtin Bibliamanta uj libritun yaykuyta atej, kʼuyusqatataj maymanpis waqaychakuyta atillaj”. Lucas librotapis 9 metros khuskanniyojpi jina qhelqakorqa. Wakin kʼuyuna librostaqa kantusninta kʼuturaj kanku, qhashqa rumiwan lluskʼachaj kanku, tiñejtaj kanku.

Griegopi Qhelqasqaspi nisqanman jina, ¿pikunataj karqanku “kuraj sacerdotes”?

Israelpi sacerdotesta ajllakuyta qallarikusqanmantapacha, uj runata churakunan karqa paytaj wañupunankama chay cargoyoj kanan karqa (Números 35:25). Ñaupaj kuraj kaj sacerdoteqa Aarón karqa, chay cargotataj japʼinan karqa kuraj kaj wawan (Éxodo 29:9). Mirayninmanta qhari wawasqa casi tukuynin sacerdotes karqanku, jinapis wakillan kuraj kaj sacerdotesqa.

Israel llajta waj suyuspa atiyninpi kashajtenqa, kuraj kaj sacerdotewan munasqankuman jina ruwaj kanku. Chaywanpis, mosoj kuraj kaj sacerdotesqa Aaronpa familianmantapuni kaj kanku. Chantapis ‘kuraj sacerdotes’ nispaqa aswan rejsisqa sacerdotesmantasina parlashan. Wakin kuraj sacerdotesqa, ichá 24 sacerdotespi rakʼisqa kajkunamanta karqanku: paykunaqa kuraj kaj sacerdotejpa ayllunmanta karqanku, Anaspa ayllunmanta jina (1 Crónicas 24:​1-​19; Mateo 2:4; Marcos 8:​31; Hechos 4:⁠6).