Llampʼu sonqo kayqa yachayniyoj kasqanchejta rikuchin
Toñi sutiyoj hermanaqa, machitusta, onqosqasta ima qhawaspa llankʼan. Uj kuti uj wasiman rejtin, uj señora llojsimorqa. Chay señoraqa mamanta qhawananpaj Toñi mana aswan ñaupajta chayasqanmanta rimaykorqa. Toñi horanpi chayajtinpis, perdonta mañakorqa.
ASWAN qhepaman, chay señoraqa Toñita watej rimaykullarqataj. ¿Imatá Toñi ruwarqa? Pay nin: “Qhasimanta rimaykuwarqa, chaytaj mana allinchu karqa”, nispa. Jinapis Toñiqa watejmanta perdonta mañakorqa, nerqataj imaynachus kashasqanta entiendesqanta.
Qan Toñi kawaj karqa chay, ¿imatataj ruwawaj karqa? ¿Phiñakuyniykita ñitʼiykukuwajchu karqa? ¿Llampʼu sonqowanchu kutichiwaj karqa? ¿Kallpachakuwajchu karqa mana rabiakunaykipaj? Ajinapi rikukuspaqa, mana atillanchejchu sonqonchejta ñitʼiykukuyta, astawanraj pillapis phiñachiwajtinchej chayri chʼampaykunasniyoj kajtinchej.
Chaywanpis Bibliaqa llampʼu sonqo kananchejta niwanchej. Astawanpis kʼacha, mana usqhayllata phiñarparikoj runata, yachayniyoj kasqanta nin. Santiago 3:13 nin: “Sichus qankunamanta mayqellampis yachayniyoj kanman chayqa, yachayninta rikuchichun sumaj kawsayninwan, llampʼu sonqo yachaypi ruwasqasninwan ima”, nispa. ¿Imaraykú Biblia chayta nin? ¿Imaynatá llampʼu sonqoyoj kasqanchej rikuchin Jehová yachayniyoj kasqanta? ¿Imataj yanapawasun llampʼu sonqo kanapaj?
YACHAYNIYOJQA LLAMPʼU SONQO
Llampʼu sonqoyojqa mana phiñakunchu. “Miskʼi simiwan kuticheyqa phiñakuyta thasnun; sinchʼi palabraswan kutichiyrí astawan phiñarichin” (Pro. 15:1).
Phiñakuspa parlajtinchejqa chʼajwata astawan jatarichisun (Pro. 26:21). Astawanpis kʼachamanta kuticheyqa, mana phiñanakunapaj yanapawanchej. Phiñakoj runaj sonqontapis tiyaykuchin.
Toñiqa kausayninpi chayta rikorqa. Chay señoraqa, Toñi mana phiñakuspalla kutichisqanmanta waqarikorqa. Nerqataj kausayninpi, familianpi ima ashkha chʼampaykunasniyoj kashasqanta. Toñiqa Diosmanta willarerqa, Bibliamantataj yachachiyta qallarerqa. ¿Imaraykú? Toñi llampʼu sonqo kasqanrayku, mana usqhayllata phiñakusqanrayku ima.
Llampʼu sonqoyojqa kusisqa kausakun. “Kusikuyniyojmin kanku llampʼu sonqoyojkunaqa, imaraykuchus paykuna kay pachata herenciankupaj japʼenqanku” (Mat. 5:5).
Ashkhasqa phiña runas karqanku. Kunantaj llampʼu sonqos kasqankurayku, may kusisqas kanku. Imajtinchus aswan sumajta kausakunku, yachankutaj uj sumaj suyakuyniyoj kasqankuta (Col. 3:12). Hermano Adolfoqa Españapi congregacionesta waturispa Jehovapaj llankʼan. Payqa ñaupa kausayninta saqeporqa. ¿Imaynataj pay ñaupajta karqa?
Pay nin: “Kausayneyqa llakiy karqa. Mayta phiñakusqayrayku, wapulla purisqayrayku ima, amigosneyqa manchachikuwaj kanku. Uj kuti, uj maqanakuypi sojta kutitapuni cuchillowan tʼojsiykuwarqanku, ashkha yawartataj pierderqani, kausayniypis wañuy patapi kasharqa. Chaymantapacha kausayniyta tijracherqani”, nispa.
Jinapis kunanqa, Adolfoqa wajkunaman llampʼu sonqo kayta yachachishan, nitaj simillamantachu manaqa kausayninwanpis. Ashkhastaj paywan kayta munanku. Imajtinchus payqa kʼacha, munakuyniyojtaj. Kausayninta tijrachisqanmanta may kusisqa kashan. Jehová llampʼu sonqo runa kananpaj yanapasqanmantataj, mayta agradecekun.
Llampʼu sonqoyojqa Jehovata kusichin. “Yachayniyoj kay, wawáy, kusichiwankitaj; ajinamanta allinta kutichisaj pischus ñakʼarichiwayta munajkunata” (Pro. 27:11).
Jehovaj enemigonqa Satanás. Paytaj tukuy imata ruwashan Jehovaj contranpi. Ajinapi rikukuspa Jehovaqa phiñakuyta atin. Jinapis Bibliaqa nin Jehová “imamantapis mana usqhayta phiñarparikojlla” kasqanta (Éxo. 34:6). Jehová jina pacienciakojtinchej, llampʼu sonqo kajtinchej ima, yachayniyoj kasqanchejta rikuchinchej. Chaytaj Jehovata mayta kusichin (Efe. 5:1).
Sajra pachapi kausashanchej. Chayrayku kay jina runas tiyan: “Runaykachajkuna, tukuypa contranta millayta rimajkuna, jatunchakojkuna [...] qhasimanta tumpajkuna, aychaj sajra munayninta mana atipayta atejkuna, mana khuyarispa sajrata ruwajkuna” ima (2 Tim. 3:2-4). Ajina runas chaupipi kausakuspapis, llampʼu sonqo kanapaj kallpachakunallapuni tiyan. Bibliaqa niwanchej, ‘Diosmanta jamoj yachayqa, kʼacha, khuyakuywan juntʼasqataj’ kasqanta (Sant. 3:17). Kʼachas, khuyakuyniyojtaj kasunchej chayqa, rikuchisunchej Jehovaj yachayninta. Chay yachayqa yanapawasunchej, pillapis imatapis niwajtinchej kʼacha simiwan kutichinapaj. Ajinamantataj may yachayniyoj Jehová Diosman qayllaykusunchej.