TAPANMANTA | BIBLIATA LEEYQA YANAPASUNKIMAN

¿Imaynatá leewaj astawan gustasunanpaj jina?

Bibliata leespa mana saykʼuna, gustachikunataj noqallanchejmanta kashan. Chaypajtaj imastachus ruwanata qhawarina.

Entiendenapaj jina allin tijrachisqa Bibliata ajllay. Leeshaspa mana rejsisqa palabrasta chayri manaña kay tiempopi parlakusqan palabrasta tarispaqa leeshaspa saykʼupuwaj. Chayrayku entiendenaykipaj jina Bibliata ajllakuy, leesqayki sonqoykiman chayananpaj. Chantapis chay Bibliaqa atienekunapaj jina kanan tiyan.a

Imaschus rikhurimusqanwan yanapachikuy. Bibliaqa Internetpipis kallantaj. Chaymantapacha leeyta atikun chayri uraqachikunman computadorapi, tabletapi chayri celularpi. Internetpi kaj wakin Bibliasqa sumaj yanapasniyoj kikin versiculota waj Bibliaspiwan leenapaj chayri kikinchanapaj. Wakin parlaykunapeqa grabasqata uyarinapajpis kallantaj. Wakin runasqa uyariyta yachanku trabajonkuman rishaspa, ropata tʼajsashaspa chayri waj imasta ruwashaspa. Qanpis imaynatachus leeyta munasqaykita ajllakuwaj.

Estudianapaj kaj yanapaswan yanapachikuy. Bibliata estudianapaj kaj yanapasqa yanapasonqa leesqaykita aswan sumajta entiendenaykipaj. Leeshaspa ima lugaresmantachus parlashasqanta rejsinaykipaj mapas tiyan, imaschus chay lugarpi pasasqanpipis tʼukurinaykipaj. Chantapis kay revistapi wakin yachaqanas, Internetpitaj jw.org nisqapi “Bibliaj yachachiykunasnin” nisqa Bibliaj wakin versiculosninta astawan entiendenaykipaj yanapasonqa.

Mana qallariymantapachapunichu leey. Bibliata qallariymantapacha tukukuykama leeyta qhellakuspaqa, mayqen partechá astawan gustasunki chaytaraj leewaj. Ichá ñaupa tiempo runasmanta mayqellanmantapis yachayta munasqaykita leeriwaj. Imamantachus yachayta munasqaykita leenaykipaj, “Bibliamanta astawan yachakuy ñaupa tiempo runasmanta leespa” nisqa recuadro yanapasunkiman. Chayri imamantachus yachayta munasqaykimanta leeriwaj chayri maychus qhelqakusqanman jina. Chay yuyaychaykunaman jina leeriwaj.

a Ashkha runas ninku Traducción del Nuevo Mundo de las Santas Escrituras nisqa Biblia maychus kajta nisqanta, leeyta atinapaj jinallataj kasqanta. Kaytaqa Jehovaj testigosnin orqhonku, 130 kuraj parlaykunapiñataj kashan. Internetmanta jw.org nisqamanta uraqachiwaj chayri JW Library nisqa programata. Munajtiykeqa Jehovaj testigosnin uj Bibliata wasiykiman apanpusunkuman.

BIBLIAMANTA ASTAWAN YACHAKUY ÑAUPA TIEMPO RUNASMANTA LEESPA

**Wakin cheqa sonqo warmis**
Abigail	1 Samuel, capítulo 25
Ana	1 Samuel, capítulos 1, 2
Ester	Ester, capítulos 2-5, 7-9
María	(Jesuspa maman) Mateo, capítulos 1, 2; Lucas capítulos 1, 2; chantapis Juan 2:1-12; Hechos 1:12-14; 2:1-4
Rahab	Josué, capítulos 2, 6; chantapis Hebreos 11:30, 31; Santiago 2:24-26
Rebeca	Génesis, capítulos 24-27
Sara	Génesis, capítulos 17, 18, 20, 21, 23; chantapis Hebreos 11:11; 1 Pedro 3:1-6

**Wakin cheqa sonqo qharis**
Abraham	Génesis, capítulos 11-24; chantapis 25:1-11
David	1 Samuel, capítulos 16-30; 2 Samuel capítulos 1-24; 1 Reyes capítulos 1, 2
Jesús	Evangelios Mateo, Marcos, Lucas, Juan
Moisés	Éxodo, capítulos 2-20, 24, 32-34; Números, capítulos 11-17, 20, 21, 27, 31; Deuteronomio, capítulo 34
Noé	Génesis, capítulos 5-9
Pablo	Hechos, capítulos 7-9, 13-28
Pedro	Mateo, capítulos 4, 10, 14, 16, 17, 26; Hechos, capítulos 1-5, 8-12

JEHOVAJ TESTIGOSNIN BIBLIATA ESTUDIANAPAJ YANAPASTA ORQHOSQANKU

JW.ORG. Kaypeqa tarinki ashkha yanapasta, “Bibliamanta tapuykuna” nisqata jina. Chaypi sutʼinchallantaj imaynatachus JW Library nisqa programata uraqachinata.
Veamos “la buena tierra”. Kay folletopeqa Bibliapi parlasqan lugaresmanta mapas, fotos ima tiyan. Kay folletoqa mana quechuapi kanchu.
Perspicacia para comprender las Escrituras. Kayqa iskay jatuchaj libros. Sutʼinchan Bibliapi parlasqan runasmanta, lugaresmanta, palabrasmanta ima. Kay librosqa mana quechuapi kanchu.
“Toda Escritura es inspirada de Dios y provechosa”. Kay libroqa sutʼinchan maykʼajchus, maypichus chantá imaraykuchus Bibliaj sapa librosnin qhelqakusqanta, sapa libromantataj sutʼinchan. Kay libroqa mana quechuapi kanchu.
La Biblia... ¿la Palabra de Dios, o palabra del hombre? Kay libritutaqa sumajta estudiaspa ruwarqanku, sutʼinchashantaj Biblia Diospa Palabranpuni kasqanta. Kay libroqa mana quechuapi kanchu.
La Biblia y su mensaje. Kay folletoqa 32 paginasnillayoj kajtinpis, Biblia imamantapunichus parlasqanta sutʼinchan. Kay folletoqa mana quechuapi kanchu.