‘Bendecisqa kay, sumajta umachakusqaykimanta’

DAVIDQA, Abigailman nerqa: ‘Bendecisqa kay, sumajta umachakusqaykimanta’, nispa. ¿Imaraykú David chayta nerqa? ¿Imatataj Abigailmanta yachakusunman? Chayta qhawarina.

Davidqa rey Saulmanta ayqekushajtin Abigailta rejserqa. Abigailqa Nabalpa warmin karqa. Nabaltaj may qhapaj karqa, Maón llajtapitaj tiyakorqa. Davidqa kamachisninwan, Nabalpa may chhika ovejasninta, ovejerosnintawan waqaychaj kanku. Chayrayku uj kuti Davidqa kamachisninta Nabalpaman kacharqa, mikhunata qorichikamunankupaj (1 Sam. 25:8, 15, 16).

Nabaltajrí Davidpa mañakusqanta mana kasorqachu, astawanqa asikorqa. Sutinman jinataj “wampu” runa jina ruwarqa. Chayrayku Davidqa Nabal mana khuyarikusqanrayku, wañuchinanpaj kachaykukorqa. Nabal wampu jina kutichisqanrayku wañunman karqa, jinallataj wasinpi kajkunapis (1 Sam. 25:2-13, 21, 22).

Abigailqa yacharqa wasinpi kajkuna wañunankuta, David mayta phiñarikusqanrayku. Chayrayku Abigailqa mana manchachikuspa Davidwan parlaj rerqa. Reparacherqataj Jehová allinpaj qhawanallanpajpuni ama Nabalta wañuchispa juchallikunanta. Chantá Abigailqa Davidman, kamachisninmanwan ashkha mikhunata qorqa. Davidqa repararqa Abigailta Dios kachamusqanta, mana juchapi urmananpaj. David Abigailman nerqa: ‘Bendecisqa kay, sumajta umachakusqaykimanta. Jinamanta qan jarkʼawarqanki wañuchimunay kashajtin’, nispa (1 Sam. 25:18, 19, 23-35).

Reparanchej jina Nabalqa mana agradecekoj runa karqa. Chayrayku ama pay jina kanachu. Chantá pillapis ima juchapi urmananpaj jina kashajtin, allin yuyaywan reparachina. Salmista jinataj Diosmanta mañakuna: “Yachayniyojtaj, sumaj yuyayniyojtaj kanaypaj yachachiway”, nispa (Sal. 119:66).

Ichapis wakin runasqa reparanqanku, sumaj yuyaywan imatapis ruwasqanchejta. Chayta niwajtinchejpis manapis, ichá David jina nenqanku: ‘Bendecisqa kay, sumajta umachakusqaykimanta’, nispa.