Bibliata sumajta estudiaspa miskʼirichikuna

Josueqa leyta leeshan; Jericó llajtaj perqasnin urmaykushan, Rahabpa wasintaj pachitan sayashan; Josué Diosmanta mañakushan makisninta pataman oqharispa

JOSUEQA uj jatun cargoyoj karqa. Payqa israelitasta Sumaj Jallpʼaman pusaykunan karqa. Chaytaj mana atinanpaj jinallachu karqa, imajtinchus waj nacioneswan maqanakunan karqa. Chaywanpis Jehová Diosqa, allin rinanpaj nerqa sinchʼita kallpachakunanta, waputaj kananta. Chantá nillarqataj leyninta kasukunanta, tuta pʼunchaytaj leenanta chay leyta sumajta juntʼananpaj. Ajinamanta tukuy ima ruwasqanpi allin rinanpaj (Jos. 1:7, 8).

Noqanchejpis ashkha llakiykunapi rikukunchej, kay qhepa pʼunchaykunapi “kausay may llakiy” kasqanrayku, ‘maytataj sajrayasqanrayku’ (2 Tim. 3:1). Jehová Diosta kasukusunchej chayqa, noqanchejtapis allin riwasunchej. Chaypajqa Bibliata tuta pʼunchay leena, ajinamanta ima llakiypi rikukuspapis Bibliaj nisqanman jinapuni ruwasunchej.

Chaywanpis mana tukuymanchu Bibliata estudiay gustawanchej, nitaj estudianapaj tiempochakuyta atillanchejchu. Jinapis Bibliata estudianapuni tiyan. Chaypajtaj yanapawasunchej, “Estudianapaj yuyaychaykuna” nisqa yachaqana. Chaypeqa Bibliata sumajta estudianapaj ashkha yuyaychaykuna kashan.

Uj salmista nerqa: “Kamachisqasniykej ñanninta pusaway, imaraykuchus chaypi kusikuyneyqa kashan”, nispa (Sal. 119:35). Noqanchejpis Bibliata estudiaspaqa kusisqa kasunman. Bibliata estudiallasunpuni chaytaj, ashkha perlasta jina sumaj yachachiykunata tarisun.

Noqanchejqa mana Josué jinachu jatun cargoyoj kanchej. Chaywanpis llakiykunasninchejta atipananchej tiyan. Chayrayku Josué jina Bibliata estudiananchej tiyan, yachakusqanchejman jinataj kausakunanchej tiyan. Ajinallamanta tukuy ima ruwasqanchejpi allin riwasunchej.

ESTUDIANAPAJ YUYAYCHAYKUNA

Niraj estudiashaspa Diosmanta mañakuna. Bibliaqa Diospa yuyaychasqan kasqanrayku yanapawasunman. Chayrayku Bibliata leenapajqa, Diospa yanapanta mañakuna, ajinallamanta leesqanchejta entiendesun, yuyarikusun, chayman jinataj ruwasun (Esd. 7:10).
Leeshaspa tapurikuna. Bibliata chayri publicacionesta leeshaspaqa kay jinata tapurikuna: “¿Imatataj kay leesqay Jehová Diosmanta yachachiwan? ¿Imaynatataj kay versículos sutʼinchan Jehová Dioslla sumaj kamachej kasqanta? ¿Imaynatá kay versiculoswan wajkunata yanapariyman?”, nispa.
Estudiasqanchejpi tʼukurina. Bibliata leeytawan tʼukurina chay versículos llakichiwasqanchejpichus chayri kusichiwasqanchejpichus. Piensarinataj ajinapi rikukusqanchejpiñachus chayri rikukushasqanchejpichus manachayri rikukunanchejpichus. Piensarinallataj imaynatachus leesqanchejman jina ruwanapi (Job 23:5; Sal. 49:3). Chantapis piensarina imajtinchus Jehová Diosta kasukunapuni kasqanpi, wajkunamantaj chayta sutʼinchayta atisqanchejpichus manachus (Deu. 32:28, 29).
Rikushasunmanpis jina leena. Bibliapi pimantachus leeshanchej chay runata rikushasunmanpis jina leena, lugarninpitaj churakuna. Tʼukurinataj imapichus piensashasqanpi, imatachus rikushasqanpi, imastachus uyarishasqanpi, ima qʼapaykunatachus sienteshasqanpi, llakisqachus chayri kusisqachus kashasqanpipis. Joseta hermanosnin ismaelitasman vendeykusqankumanta leeshaspaqa, chayta rikushasunmanpis jina leena (Gén. 37:18-28). Ajinata leespaqa Bibliata allinta entiendesun.
Bibliata estudianapaj ima yanapaschus kan chaywan yanapachikuna. Parlayninchejpi ima yanapaschus tiyan tukuy chaykunata allinta rejsina. Mana chay yanapasta allinta apaykachayta yachaspaqa wajkunawan yanapachikuna. Por ejemplo kay yanapas tiyapuwanchej: Índice de las publicaciones Watch Tower nisqa libro, Jehovaj testigosnin yachaqanasta maskʼanankupaj nisqa libro ima. Chay librosqa casi tukuy imamanta parlashan, wakin versiculostapis sutʼinchashan. Yanapachikullasunmantaj Bibliata estudianapaj yanapa nisqa folletowanpis. Chay folletopeqa tiyan unay tiempomanta mapas, fechas. Chay folleto parlallantaj unay tiempo qolqemanta, midinasmanta, waj imasmantawan.
Anotakuna. Chayqa yanapawasun yachakusqanchejta mana qonqapunapaj. Chantapis imatachus yachakusqanchejta wajkunaman willarina. Predicacionpipis imatachus yachakusqanchejmanta parlarisunman. Kay yuyaychaykunaman jina ruwaspaqa yachakusqanchejta yuyarikullasunpuni, wajkunatapis yanaparisun.