¿Yacharqankichu?

¿Imajtintaj Esteban mana manchachikorqachu juchachashajtinku?

ESTEBANTAQA Jatun Juntamanta kajkuna juchacharqanku. Chay Jatun Juntamanta kajkunaqa atiyniyoj runas karqanku, tukuyninkutaj 71 karqanku. Paykunataqa kuraj kaj sacerdote Caifás wajyacherqa. Caifasllataj Jesusta wañuchinankupaj juiciota ruwarqa (Mat. 26:57, 59; Hech. 6:8-12). Estebanta juchachanankupajqa llulla testigosta wajyakorqanku. “Jatun Juntapi tukuy tiyashajkunataj Estebanta allinta qhawarispa, rikorqanku uyanqa uj angelpa uyanman rijchʼakusqanta” (Hech. 6:13-15).

Estebanqa niraj Jatun Juntaman pusasqa kashajtin, mayta congregacionpi Diospa atiyninwan llankʼarqa. Jatun Juntaman munajta mana munajta pusajtinkutaj Dios atiyninwan yanaparqa mana manchachikunanpaj (Hech. 6:3-7). Chantapis Diosqa Estebanta juchachashajtinku atiyninwan sonqocharqa, yanaparqataj (Juan 14:16). Hechos capítulo 7 nisqanman jina, Estebanqa juiciopi Ñaupa Testamentomanta 20 versiculosta jina yuyarikorqa (Juan 14:26). Chantapis Estebanpa creeynin astawan sinchʼiyarqa, juiciopi kashaspa mosqoypi jina Jesusta Diospa pañanpi sayashajta rikuspa (Hech. 7:54-56, 59, 60).

Noqanchejtapis ichá Diospa sutinrayku runas qhatiykachawasun chayri ñakʼarichiwasun (Juan 15:20). Ajinapi rikukojtinchejqa Jehová Dios atiyninwan yanapawasunchej. Chaypajqa Bibliata estudianallapuni, predicamunallapuni, tantakuykunaman rinallapuni, congregacionpi ruwanasninchejtapis ruwanallapuni. Ajinamanta qhatiykachasqa kashajtinchej Jehová Dios kallpachawasunchej, sonqonchejtapis tiyaykuchenqa (1 Ped. 4:12-14).