Kawsayninchikta Jehovap llamkʼayninpi tukuchispa mayta kusikunchik
1 Apóstol Pabloqa Jehovap llamkʼayninpi ‘kawsayninta tukuchisqanmanta’ mayta kusikurqa (2 Cor. 12:15). Kunanqa payjina achkha Jehovamanta sutʼinchaqkuna precursoresjina sinchita llamkʼachkanku. Wakinkunaqa familiankupaq achkha ruwana kaptinpis, chayri unqusqa kachkaptinkupis, tukuy atisqankumanjina, Diospa Reinomanta willaq rillankupuni. ¿Manachu kay hermanosninchikta rikuspa mayta kallpachakunchik?
2 Runa masinchikta munakuna. Tukuy atisqanchikwan Diospaq llamkʼaspa, payta, runa masinchiktapis munakuspaqa, Diospa ñawpaqinpi allin qhawasqa kasunchik. Apóstol Pablo kawsayninta Diospa llamkʼayninpi tukuchisqanrayku kusiywan jinata nirqa: “Chayrayku, kunanqa sutʼinta niykichej: Pillapis chinkayman rejtenqa, mana juchayojchu kasaj”, nispa (Hech. 20:24, 26; 1 Tes. 2:8). Chayrayku runaman, tukuy atisqanchikwan willamuptinchikqa, saqra runa mana tikrakuptin, wañusqanmanta mana juchayuqchu kasun (Eze. 3:18-21).
3 Tukuy imata runata yanapanapaq ruwaptinchikqa, kusiyta taripasunchik (Hech. 20:35). Juk hermano nirqa: “Jehovapaq llamkʼaytawan tutayachkaptin wasiyman saykʼusqa kutipuni, jinapis may kusisqa kani. Chayrayku Jehovaman pachis nini kayjina kusiyta quwasqanmanta, chaytataq mana pipis qhichuwanmanchu” nispa.
4 Diosta munakuy. Diosta kusichiyta munasqanchikrayku, kawsayninchikta paypa munayninta ruwaspa tukuchisunchik. Chantapis Diosta munakusqanchikrayku kamachiwasqanchikta kasukunchik, chayrayku runaman willaq, yachachiq ima rinchik (1 Juan 5:3). Runa mana uyariyta munaptinpis kusisqallapuni Diospaq llamkʼanchik.
5 Kunan cosecha tiempopi kasqanchikrayku, Diospaq llamkʼayninchik mana pisiyananchu tiyan (Mat. 9:37). Juk runaqa cosecha tiempopi sinchita llamkʼan puquykunata, manaraq ismuchkaptin uqharinanpaq, ¿ichari? Kikillantaq runaman willaspapis; pisi tiempollaña kasqanrayku mayta kallpachakuspa runaman willamunanchik tiyan (Luc. 13:24; 1 Cor. 7:29-31).