‘Achkha puquyniyuq kanachik’
1 Jesús yachachichkaspa, juk uva sachʼawan kikinchakurqa, Tatantaqa juk llamkʼaq runaman, discipulosnintataq puquyniyuq uva sachʼap ramasninman kikincharqa. Chay rikchʼanachinapi, Jesusqa sutʼincharqa imaraykuchus discipulosnin juk ramajina uva sachʼaman kʼaskakunanku karqa (Juan 15:1-4). Chayrayku, Jehovawan masichakuqkunaqa puquyniyuq ramajina kananku tiyan, Jesucristomanta japʼikuspa. ¿Imataq chay puquyri? Reinop puquynin, “espirituj poqoynin” ima (Gál. 5:22, 23; Mat. 24:14; 28:19, 20).
2 Espiritup puquynin. Astawan Diosman kʼaskaykukuptinchik, espiritup puquynin kawsayninchikpi rikukunqa. Chaypaqqa, ¿sapa pʼunchaychu Bibliata ñawirinchik, tʼukurinchik ima? (Fili. 1:9-11.) Diospa espiritunta mana iskaychakuspa mañakunanchik tiyan, kʼacha kaykunata puquchinapaq, jinamanta Jehovata jatunchasunchik, llaqtanpitaq wiñasunchik (Luc. 11:13; Juan 13:35).
3 Espiritup puquyninqa runaman kʼajaywan, willamunapaq yanapawanchik. Nisunman, munakuyninchik, iñiyninchik ima, runaman willamunallapaqpuni tanqawasunchik. Chantapis sunqu tiyaykusqa kay, pacienciayuq kay, khuyakuyniyuq kay, kʼacha kay, saqra munayninwan mana atipachikuq kay ima, churanakuq runakunawan mana usqhayta phiñanakunapaq yanapawasunchik. Kusiytaq, runa mana uyariwaptinchikpis Diospa munayninta ruwanallanchikpaqpuni yanapawanchik.
4 Reinop puquynin. Reinop puquynin puquchinapaq “Jesucristonejta Dios Tatanta yupaychanachej uj sumaj jaywanatapis jaywashasunman jina” Jehovap sutinta willamuspa (Heb. 13:15). Chayta allinta juntʼanapaqqa, kʼajaywan mana manchachikuspa, runaman willamunanchik tiyan. ¿Tukuy atisqanchiktachu ruwachkanchik, Reinop puquyninta puquchinallapaqpuni?
5 Jesusqa, discipulosnin mana kikintachu ruwanankuta sutʼincharqa (Mat. 13:23). Chayrayku mana wakkunawan kikinchakunanchikchu tiyan; manaqa tukuy sunquwan, atisqanchikmanjina Jehovapaq ruwananchik tiyan (Gál. 6:4, 5). Bibliata ñawiriytawan sapa juk kawsayninchikpi tʼukurinanchik tiyan, qhawanapaq imapichus astawan espiritup puquyninta, Reinop puquyninta ima, kawsayninchikpi Jehovata jatunchanapaq puquchisunman (Juan 15:8).