Waqcha runaspaq juk suyakuy
1 Jesusqa, kay Jallpʼapi kachkaptin, waqcha runasmanta khuyakurqa. Runasta mikhuchirqa, sanoyachirqa ima, chantapis, ‘waqchasman evangeliomanta willayta’ maskʼallarqataq (Mat. 11:5). Kunan pʼunchaypipis, willayninchikqa, waqcha runasta, wak runastapis yanapallantaq (Mat. 24:14; 28:19, 20).
2 Chiqa suyakuy. Runasqa, tukuy sunqunkuwan llulla religionman qullqinkuta qunku, llulla religionta apaykachaqkuna “kaywanqa allinta risunqachik” nispa nisqankurayku. Chaywanpis, Biblia nisqanmanjina, Diospa Reinonlla waqchayayta, tukuy ñakʼariykunata ima, chinkachinqa (Sal. 9:18; 145:16; Isa. 65:21-23). Chayrayku, Bibliap nisqanta runasman yachachispaqa, juk suyakuyta quchkanchik, ‘sunqunkupi Diosmanta mana pisisqas kanankupaq’, yanapachkallanchiktaq (Mat. 5:3 Dios Paralapawanchej).
3 Fariseosqa, Jesuspa tiemponpi, waqcha runasta chiqnisqankurayku ‛am ha·’á·rets (“jallpʼamanta runas”), nispa sutichaq kanku. Jesuspaqri, waqcha runaspa kawsaynikuqa, may jatunpaq qhawasqa karqa (Sal. 72:13, 14). Jesusjina yuyananchikpaqqa, waqcha runasmanta khuyakunanchik tiyan, kʼachamanta paykunawan parlaspa, llakiyninkumanta sunqunchikpi nanachikuspa ima (Pro. 14:31). Chayrayku, mana jaykʼaq waqcha runasta chiqnikusunchu, manaqa Diospa Reinonmanta paykunaman willamullasunpuni, imaptinchus paykunaqa, allinta uyarikuchkanku.
4 Bibliap yanapaynin. Bibliap yachachisqanqa, waqcha runasta yanapan mana astawan waqchayanankupaq. Bibliaqa, qhilla runa, machaykuq runa, qullqi munapayaq runa, kʼuyunata pitaq runa ima, mana kananchikta kamachiwanchik. Jinamanta, qullqinchikta qhasi mana kaqpi mana usuchinchikchu (Pro. 6:10, 11; 23:21; 2 Cor. 7:1; Efe. 5:5). Astawanpis, Bibliaqa mana suwa kananchikta, imapipis “tukuy sunquwan” llamkʼananchikta kamachiwanchik, jinamanta runap ñawpaqinpi allin qhawasqa kasunchik (Col. 3:22, 23; Heb. 13:18). Achkha patrones ninku: “Pillapis paypaq llamkʼananpaq juk runata akllachkaspa, ñawpaqta, mana suwa kananta, nitaq llulla kananta qhawarin.”
5 Jehovaqa sunqunta nanachikun, waqcha runap ñakʼariyninta rikuspa. Chayrayku, juk chhikamantawan Churin Jesucristoqa ‘waqcha runasta salvanqa paymanta mañakuqkunata’ (Sal. 72:12). Jina kaptin, kusiywan waqchasman tukuy runasmanpis, kay suyakuywan sunquchallananchikpuni kachun.