Tapuykuna

◼ Hospitalesta chayri machu runasta qhawanapaq wasista, llulla religión apaykachaptin, ¿allinchu kanman Jehovamanta sutʼinchaqkuna chaykunaman rinanku?

Wakin hospitalesta, machu runasta qhawanapaq wasista ima, llulla religionniqta apaykachakun, chaywanpis, wakinqa, mana chay religionpi kanankupaqchu ruwakun (Apo. 18:2, 4). Astawanpis religionniqta chay hospitalesta, machu runasta qhawanapaq wasista ima, sayarichikun chaymanta qullqita japʼinankupaq. Wakin hospitalespataqa, chay llulla religionpa sutillanña qhipakun, wakinkunapitaq chay religionmanta kaqkuna chaypi llamkʼachkanku.

Chayrayku, sapa juk allinta tʼukurichun religionniqta apaykachakuq, hospitalesman, chayri machu runasta qhawakun wasisman, rinantachus manachus. Ichá wakinqa, riyta atisqallankuta ninqanku, chaywanpis mana tukuychu jinata yuyanqanku (1 Tim. 1:5). Chayrayku, imatachus ruwananchikta yachanapaq, allin kanman kaykunata qhawarinanchik.

Ichapis maypichá tiyakunki chaypi, llulla religionniqta apaykachasqa hospitallla kanman. Chayri, wak hospital kaptinpis, llulla religionniqta apaykachasqa hospital allinta jampisqankumanta sumaq riqsisqa kanman. Chantapis ichá chay hospitalllapi doctores chay unquyniykimanta jampisunkuman, chayri chay hospitalllamanta doctores operayta atinkuman. Ichapis religionniqta apaykachasqa hospitalpi, yawarta mana churachikuyta munaqkuta uyarinku, wak hospitalestaq, mana chayta munankuchu. Kaykunata qhawasqanchikpi, ñawpaqtaqa tʼukurina chayman rinachus kasqanta manachus.

Llulla religioniqta apaykachasqa hospitalman, chayri machu runasta qhawanapaq wasisman riptiykiqa, ichá wak hospitalestajinalla qhawanki, maypichus pagasqaykirayku jampisunku chayri qhawasunku. Chantapis chay hospitalta chayri machu runasta qhawanapaq wasis, religionniqta apaykachasqa kaqkunaman rispaqa, qamta jampisusqallankumanta, chayri qhawasusqallankumanta pagachkanki, mana chay llulla religionta yanapanaykipaqchu.

Chaywanpis ñawpaqtaqa allinta tʼukurinayki tiyan, chay llulla religionman mana chhapukunaykipaq. Manallataq allinchu kanman, chaypi llamkʼaqkunata, chayri chay lugarta waturiq jamuqkunata, ‘Padre’ chayri ‘Hermana’ nispa ninayki (Mat. 23:9). Chaykunaman rispaqa, allinta yachanayki tiyan, qullqirayku jampichkasusqankuta, chayri qhawachkasusqankuta, mana paykunaman chhapukunaykipaqchu.

Chay hospitalman rispaqa, chaypi llamkʼaqkunaman Jehovamanta sutʼinchaq kasqaykita, chantapis ancianos waturikuq jamunankuta munasqaykita ima, willanayki tiyan. Jinata ruwasqaykiqa, Diosta yupaychayniykipi kallpachasqa kanallaykipaqpuni yanapasunqa (1 Tes. 5:14).

Machu runasta qhawanapaq wasipi, juk hermano kaptinqa, qutuchakuymanta hermanos, ancianos, familianku ima, allinta qhawarinanku tiyan, Diosta yupaychayninpi kallpachasqa kanallanpaqpuni, astawanraq, chay wasi religionniqta apaykachakuptinqa. Chayta ruwaptinkuqa, chay hermanosta mayta kallpachanqanku, chantapis chay llulla religionpa yupaychayninman, mana chhapukunankupaq, yanapanqanku.

Kaykunata nikusqanmanjina, sapa juk allinta qhawarichun, chay llulla religionniqta apaykachasqa, hospitalesman chayri machu runasta qhawanapaq wasisman, rinantachus manachus (Gál. 6:4,5).