“Yugoyman churakuychej”
1 Kay pachaqa, llakiykunamanta, ñakʼariykunamanta ima, juntʼa kachkan, chaywanpis Jesús yugonpi samariyta maskʼanapaq waqyawasqanchikta kasukuspa, samariyta tarinchik (Mat. 11:29, 30). Chantapis, chay yugopi samariyta tarinchik, Reinomanta allin willaykunata willamuspa, chaytaq mana kusichillawanchikchu, manaqa, runastapis Jesuspa chhalla yugonpi samariyta tarinankupaq yanapanchik (Mat. 24:14; 28: 19, 20).
2 Willayninchik runata samarichin. Jesusqa, mana qʼipinchikmanta paypa qʼipintawan qʼipinanchiktachu nichkarqa. Manaqa, llasa qʼipinchikta wikchʼuspa paypa chhalla qʼipinta qʼipirikunanchikta, nichkarqa. Chay qʼipinta qʼipirikusqanchikrayku, manaña anchata llakikunchikchu, nitaq mana suyakuyniyuq kanchikchu, nitaq qhapaqyayta munaspa tuta pʼunchay llamkʼanchikchu (Luc. 21:34; 1 Tim. 6:17). Sapa pʼunchay kawsananchikpaq llamkʼaptinchikpis, Diosta yupaychayta kawsayninchikpi ñawpaqman churanchik (Mat. 6:33). Willayninchik, kallpachanawanchikpaq manataq llasa qʼipijina kananpaq, imachus ñuqanchikpaq aswan allin kasqanta sutʼita yachana tiyan (Fili. 1:10).
3 Runaqa, imatachus sunqunpi kasqanmanta parlan (Luc. 6:45). Cristianosqa, Jehovata munakunchik, Reinonniqta tʼinkanawanchikta nisqantaq, sunqunchikta juntʼan. Chayrayku, “sonqo tiyaykuy allin willaykunata” willayqa, kallpachawanchik, willamuchkaspataq llakiyninchikta qunqanchik (Rom. 10:15). Imallatapis kutin kutita ruwaptinchik, astawan allinta ruwanchik, astawantaq kusikunchik. Chayrayku, willamunapaq astawan tiempochakuyqa, astawan kallpachawasun. ¡Pillapis willasqanchikta uyarispa Diosman kutirikuptin, mayta kallpachakunchik! (Hech. 15:3.) Llamkʼayninchik Diosta kusichisqanta mana qunqaptinchik, runa mana uyariptin, churanakuptinpis, willayninchikqa samariyjina kallanqapuni, runas Diosmanta yachakuyta munaptinkutaq Diospa bendicioninrayku kanqa (Hech. 5:41; 1 Cor. 3:9).
4 Jesuspa waqyarisqanta uyarikuptinchik, Jehovamanta sutʼinchaqkunajina paywan khuska llamkʼaspa, kusikunchik (Isa. 43:10, Qheshwa Biblia; Apo. 1:4, 5). ¡Mana imapipis chayjina samariyta tarisunmanchu!