‘Allin kaqta ruwanapaq wakichisqa kaychik’
1 Jesusqa, manaraq willaq richkaptinku discipulosninta wakichinanpaq tiempochakuq (Mat. 10:5-14). Mana tiempoyuq kaspapis, wasimanta wasi willaq rinapaq maykʼa minutosllatapis wakichikuptinchik, allinta runaman willamusun (2 Cor. 9:6).
2 ¿Imaynatá wakichikusun? Ñawpaqtaqa, ima librostachus, ima revistastachus runaman jaywamusun, chaykunata sumaqta riqsina tiyan. Chantapis, willanchik chaypi imayna runaschus kasqankupi, tʼukurina. ¿Imastaq paykunata llakichin? ¿Imayna religionniyuq runastataq tarisunman? Reinomanta Willayninchikpi, Razonamiento a partir de las Escrituras libropi ima, runaman willanapaq yanapaykunata tarisunman.
3 Willayta Yachanapaq Tantakuypi, runaman willachkaspajina rikuchisqankuta, sumaqta uyariy, yanapallawanchiktaq. Chantapis runaman willamuq risqanchikrayku, tiempo pasasqanmanjina, manaña achkhatachu wakichikusun; chaywanpis willayninchik aswan sumaq kananpaq kallpakullasunmanpuni, sapa kuti willaq lluqsiptinchik tʼukurispa imatachus runaman willananchikta. Chantapis, maletinninchikpi chayri carteranchikpi, imachus willanapaq necesitasqanchikta, qhawaykurisunman.
4 ¿Imatá ruwasunman imatachus runaman willananchikta yuyarinapaq? Jatunmanta kutin kutita imamantachus runaman willananchikta, parlasunman. Wakin hermanosqa, familiapi Bibliamanta yachakuchkaptinku runaman willachkaspajina ruwaspa wakichikunku. Wakintaq, imatachus willanankuta, juk hojapi qillqanku, niraq punkuta takachkaspataq, yuyarinankupaq chay qillqasqankuta qhawarinku.
5 ¿Imaraykutaq wakichikuna? Wakichikusqanchikqa, sumaqta willanapaq, kusikunapaq ima, yanapawanchik. Jinallataq, runaman willachkaspa mana kharkatisunchu. Chantapis, runata allinta uyarisun, nitaq llakikusunchu imatachus ninanchikmanta. Imamantachus revistas, libros ima parlasqanta yachayqa, kusiywan kaykunata runaman jaywanapaq, yanapawasun.
6 Bibliaqa, ‘tukuy allin kaqta ruwanapaq wakichisqas kananchikta’, niwanchik (Tito 3:1, MOSOJ TESTAMENTO). ¿Kanmanchu imallapis allin willaykunata willaymanta aswan sumaq? Sumaqta wakichikuspaqa, Jehová Diosta, willasqanchikta uyariqkunata ima, allinpaq qhawasqanchikta, rikuchisun (Isa. 43:10).