Mana allinta ñawiriqkunaman, ¿imaynatá Bibliamanta yachachisunman?
1. ¿Imayna runaswantaq, willaypi tinkukusunman?
1 Wakin kutiqa, mana allinta ñawiriyta yachaqkunawan willayninchikpi tinkukunchik. Chay runasmanta wakintaq, Bibliamanta yachakuyta munanku. ¿Imaynamantá chay runasman yachachisunman?
2. ¿Imaraykutaq mana allinta ñawiriqta, mana pisipaqchu qhawana tiyan, imaynatá chayta ruwasunman?
2 Ama pisipaq qhawanachu. Jehovaqa, runap sunqunta qhawan, manataq yachaywasiman risqantachus manachus (1 Sam. 16:7; Pro. 21:2). Ñuqanchikpis, mana allinta ñawiriyta yachaqkunata, mana pisipaqchu qhawanchik. Chantapis, chay runata mana pisipaq qhawaspalla, pacienciawan ima, yachachiptinchikqa, ichapis yanapayninchikta japʼikunqa (1 Ped. 3:15). Chaypaqtaq, qallariypiqa, ichapis mana allinchu kanman juk pʼitita chayri juk parrafota ñawirinantapuni ninanchikqa. Jinata ruwaptinchikqa, Bibliamanta yachakusqanmanjina, ichá pay kikinmanta Diospa Palabranpi ‘tuta pʼunchay unanchayta’ munaspa, allinta ñawiriyta munanqa (Sal. 1:2, 3).
3. ¿Imaynamantá mana allinta ñawiriqkunata yachachisunman?
3 ¿Imaynasmantá yachachisunman?. Dibujosqa, runata yachachinapaq, japʼiqananpaq ima, may sumaq yanapa. Ñawpaqtaqa, yachakuqman dibujota rikuchiy, chaymantá, imatachus chaypi rikusqanta tapuriy. Chantá, imatachus yachachiyta munachkasqaykita japʼiqananpaq, wak tapuykunatawan ruway. Tukuchanapaqtaq, chay yachachiyta sutʼinchanapaq, Bibliamanta pʼitikunata ñawiripuy. Chantapis, dibujosqa, yachakuchkasqanta yuyarichinapaq yanapawanchik. Chaywanpis, ama jukllapi achkhata yachachiychu. Imamantachus yachachichkasqaykita sutʼita yuyarichiy, amataq wak yachaqanaswan chaqruychu. Bibliamantapuni pʼitikunata ñawiripuy, chantá, yachaqanata japʼiqachkasqantachus manachus yachanaykipaqqa, tapuykunata ruway. Ajinamanta yachakuqqa, Bibliamanta astawan yachakuyta munaspa, ichapis astawan allinta ñawiriyta munanqa.
4. ¿Imaynatá yachakuqta, aswan allinta ñawiriyta yachakunanpaq yanapasunman?
4 ¿Imastaq sumaqta ñawirinanpaq yanapanman? Juk runa mana allinta ñawiriyta yachasqanqa, mana ninayanchu, ni ima yachachiyta japʼiqayta atisqanta. Chayrayku, allin kanman, juk sumaq ñawiriqta ñawirichkaptin uyarinanta ninayki. Imaraykuchus, ñawirichkasqanta ñawillawan qhatiptinpis chayri simi ukhullapi kikinta ñawiriptinpis, aswan allinta ñawiriyta yachakunman. Chantapis, Ñawiriyman qillqayman qukuy, nisqa folletowan yanapachikullanmantaq. Wakinniqpiqa, qutuchakuymanta ancianos, mana allinta ñawiriqkuna, allinta ñawirinankupaq yanapaykunata wakichinku. ¿Yanapasunkimanchu kay yuyaychaykuna? Chiqamantachá, kay yuyaychaykunawanqa, mana allinta ñawiriyta atiqkunata “Diosmanta Qhelqasqata” japʼiqanankupaq yanapasunchik (2 Tim. 3:15).