Runa japʼiqananpaqjina yachachina
1. Allinta yachachinapaq, ¿imaynatá yachachina tiyan?
1 Allinta yachachinapaqqa, runas japʼiqanankupaqjina yachachina. Sumaq Yachachiq Jesusqa, ajinata yachachirqa. Ñuqanchikpis ‘allinta yachachiyta’ munaspaqa, Jesusmanta yachakunanchik tiyan (2 Tim. 4:2; Juan 13:13).
2. ¿Imaynatá runap sunqunman chayanapaq yachachina tiyan?
2 Japʼiqanankupaqjina parlana. Mana entiendeyta atinapaqjina wakin yachachiykunataqa, Jesús Urqupi yachachirqa. Chay yachachiykunataq, runa japʼiqananpaqjinalla (Mat. 5-7, tʼaqas). Jesuspa yachachisqanta uyariqkunaqa, “mayta tʼukorqanku”, presochayta munaq soldadospis, jinata nirqanku: “Mana jaykʼaj pi runapis parlarqachu chay runa jinaqa”, nispa (Mat. 7:28, 29; Juan 7:46). Chaytaq, kayta yachachiwanchik: Diosmanta yachachisqanchik runap sunqunman yaykunanpaqqa, riqsisqa rimaykunallawan, riqsisqa kikinchaykunallawan ima, yachachina kasqanta.
3. Willaypi runa allinta uyarikuptinkupis, ¿imatá mana ruwanachu? ¿Imaptintaq?
3 Yuyayninpi japʼiqananpaqjinalla yachachina. Jesusqa, pikunamanchus yachachinanpiraq tʼukuriq, chaymanjinalla yachachinanpaq (Juan 16:12). Ñuqanchikpis, familiaresninchikman, allinta uyarikuqnaman chayri wawasman Diosmanta willachkaspaqa, Jesusjina ruwananchik tiyan. Allinta uyarichkawasqanchikta reparaspapis, mana achkhata jukllapi yachachinachu. Imaraykuchus, chay runa, Jehovamanta yachakuytapuni munan chayqa, pisimanta pisi yachakullanqa (Juan 17:3; 1 Cor. 3:6).
4. Bibliamanta yachachichkaspa, ¿achkhatachu sutʼinchana tiyan?
4 Imachus sutʼinchana kasqallanta sutʼinchana. Jesusqa, yachachichkasqanmanta imatachus sutʼinchanan karqa, chayllata sutʼincharqa. Tʼukurinallapaq, ‘tukuy pʼampasqa kaqkuna, kawsarimunankuta’ yachachichkaspaqa, mana wak yachachiykunamantawanchu parlarqa nitaq jukllapichu tukuy imamanta sutʼincharqa (Juan 5:28, 29). Ñuqanchikpis, Bibliamanta yachachichkaspaqa, ima publicacionwanchus yachachichkanchik, chayllamanta sutʼinchana tiyan, manataq wak imasmantawanchu.
5. Runa japʼiqananpaqjina yachachiptinchik, ¿ima kanqa?
5 Jehová Diosninchik tukuy imata japʼiqananchikpaqjinalla yachachiwasqanchikmanta, ¡payman mayta agradecenchik! (Mat. 11:25.) Chayrayku, ñuqanchikpis kikinta yachachinanchik tiyan, jinata ruwaptinchikqa, runap sunqunman chayasunchik.