Willayta Yachanapaq Tantakuypaq wakichikuna
1. Willayta Yachanapaq Tantakuy, ¿imapaqtaq wakichiwanchik? Chantá, sumaqta yachakunanchikpaq, ¿imatá ruwasunman?
1 Willayta Yachanapaq Tantakuyqa, Diosmanta sumaqta willamunapaq wakichiwanchik. Kay tantakuypiqa, Bibliamanta yachachinapaq, Diospa Reinonmanta, saqra runas tukuchisqas kananmanta willanapaq ima, yachakunchik (Mat. 28:19, 20; Mar. 13:10; 2 Ped. 3:7). Chayrayku, sumaqta yachakunapaqqa, allin wakichisqas, tapuykunaman kutichiyta munaspa ima, rinanchik tiyan.
2. Umallirichiy kaptin, ¿imaynatá wakichikusunman?
2 Umallirichiy. Juk umallirichiy kaptinqa, maymantachus chay umallirichiy urqhukunanqa, programapi willakuchkan. Ajinamanta, sapa jukninchik programata qhawarispa ñawpaqmanta wakichikusunman, Bibliap pʼitisninta maskʼarisunman, imaynatachus willaypi yanapanawanchikpi ima, tʼukurisunman.
3. Tapuykunaman kutichinapaq, ¿imaynatá wakichikusunman?
3 Tapuykunawan ukhunchanapaq. Kayta wakichikuqqa, qallarinanpaq juk chhikanta parlan, kikillantataq tukuchananpaqpis, chantá Torremanta Qhawaq revistatajina ukhunchakun. Chaypaqtaq, sapa parrafop kutichiyninta marcaykuna, ajinamanta tapumuptinku, pisi parlaykunallapi sumaqta kutichinapaq wakichisqa kasun.
4. Uyariqkunawan ukhunchakunan kaptin, ¿imaynatá wakichikusunman?
4 Uyariqkunawan ukhunchanapaq. Kayta wakichikuq hermano, umallirichiytajina ruwanan kaptinpis, uyariqkuna kutichinankupaq, tapuykunata ruwanqa. Chay tapuykunataq, kutichiyta atinankupaqjina kanan tiyan. Chayrayku, ñawpaqmanta Bibliap pʼitisninta ñawiriptinchik, imachus sutʼinchakunan kasqanta marcaptinchik ima, umallirichiq tapumuptin kutichinapaq, wakichisqa kasun.
5. Rikuchiykunamanta sumaqta yachakunapaq, ¿imatá ruwasunman?
5 Rikuchiykuna. Wakin kutiqa, tantakuypi yachakuchkasqanchikwan imaynatachus runaman willamunata rikuchinapaq, rikuchiykunata ruwakun, chaypaqtaq, juk ancianota, juk precursorta chayri wak hermanota ruwananta ninku. Jina kaptinqa, chay rikuchiyta imaynatachus ruwanankupi tʼukurispa wakichikusunman. Chantá, chay rikuchiy ruwakuchkaptintaq, imaynatachus parlayniykimanjina ruwanaykipi tʼukuriy. Chay rikuchiypi ima publicacionmantachus parlakunqa, chayta apakuy. Chantapis, tatasqa, familiapi Diosta yupaychanapaq chʼisipi, tantakuypi rikusqankumanjina wakin rikuchiykunata ruwallankumantaq.
6. Willayta Yachanapaq Tantakuypaq, ¿imaraykutaq sumaqta wakichikunanchik tiyan?
6 Willayta Yachanapaq Tantakuypi yachachikuchkasqanta sumaqta japʼiqanapaqqa, allinta wakichikuna. Jinamanta hermanosninchikwan puraqmanta kallpachanakusun (Rom. 1:11, 12). Ñapaqmanta kay tantakuypaq wakichikuptinchikqa, runasman Diosmanta willanapaq sumaq wakichisqas kasunchik (2 Tim. 3:17).