Tukuy atisqaykimanjina yachakuqta yanapay
1. Bibliamanta yachakuqkunata yanapananchikpaq, ¿imatawantaq ruwananchik tiyan?
1 Bibliamanta yachakuq bautizakuyta munananpaq mana Bibliamanta payman yachachinallanchikchu tiyan. Apóstol Pabloqa, yachakuqkunata munakusqanta juk mama wawasninta imaynatachus munakusqanwan kikincharqa. Ñuqanchikpis Pablojinallataq, Bibliamanta yachakuqkunata yanapananchikrayku ‘kawsayninchikta quyta’, nisunman tukuy tiemponchikta, kallpanchikta ima churayta munananchik tiyan (1 Tes. 2:7-9).
2. ¿Imaraykutaq Bibliamanta yachakuqmanta dakunanchik tiyan, chantá imaynatá chayta ruwasunman?
2 Yachakuqmanta dakunachik. Yachakuqqa, yachakusqanmanjina kawsaspa, Bibliap nisqanta mana kasukuqkunamanta pisimanta pisi karunchakunqa (1 Ped. 4:4). Ichá kikin familiallantaq paymanta karunchakunqa (Mat. 10:34-36). Chaywanpis paymanta dakuspaqa, mana sapayakunanpaq yanapasunman. Kaymanta parlaspa unayña misionerojina llamkʼaq juk hermano, jinata yuyaychan: “Ama Bibliamanta yachachiytawan usqhayllata ripuychu. Manaqa, atikuptin tumpata qhipakuy paywan parlarinaykipaq”. Chantapis ima yanapatachus necesitasqanta allinta qhaway. Sutʼincharinapaq, unqusqa kachkan chayqa, ¿telefononiqta waqyariwaqchu chayri wasinman waturikuq riwaqchu? Chantá tantakuykunapi, ¿paywan khuska tiyarikuwaqchu, atikuptintaq wawasninta qhawaysiwaqchu?
3. ¿Imatataq ruwasunman yachakuqkuna hermanoswan khuska kaspa kallpachakunankupaq?
3 Qutuchakuypa yanapaynin. Pitachus yachachichkanki paypa wasin chayniqpi wasimanta wasi willachkaspaqa, ichapis hermanoswan khuska juk ratitullata waturikuq riwaq, hermanosta riqsichinaykipaq. Chantapis atikuptin, wakin hermanosta chayri hermanasta manachayri wakin ancianosta payman Bibliamanta yachachinaykipaq pusawaq. Astawanpis, Bibliamanta yachachiyta qallarisqaykimantapacha tantakuykunaman waqyariwaq. Ajinamanta payqa, hermanoswan khuska kaspa kallpachakunqa, imaraykuchus paykunaqa munasqa familianjina kanqanku (Mar. 10:29, 30; Heb. 10:24, 25).
4. Bibliamanta yachakuqkunata yanapaspa, ¿imatá tarisunchik?
4 Mana saykʼuspa Bibliamanta wawasninkuta yachachiq tatasqa, mayta kusikunku wawasninkuta bautizakuchkaqta rikuspa, chiqan kaqmanjinallapuni kawsachkasqankuta rikuspa ima (3 Juan 4). Bibliamanta yachakuqkunata tukuy atisqanchikmanjina yanapaspaqa, kikillantataq kusikusunchik.