Japʼiqanankupaqjina yachachina
1. Diospa Palabranta maychus kaqta yachachinapaq, ¿imaynatá yachachinanchik tiyan?
1 Sumaq wakichisqa willaqkunaqa, apóstol Pablojina ‘chiqa kaq Palabrata maychus kaqta yachachinapaq’, mana Diospa Palabranmanta ñawiripuyllachu kasqanta sumaqta yachanku (2 Timoteo 2:15). Diospa Palabranmanta yachachichkaspa, ¿runas japʼiqanankupaqjinachu yachachichkanchik? (Hech. 28:23.)
2. Runas Diospa Palabranta may jatunpaq qhawanallankupaqpuni, ¿imaynatá yanapasunman?
2 Diospa Palabranmantapuni ñawiripuna. Ñawpaqtaqa, Biblia Diospaq yuyaychasqanpuni kasqanta rikuchinanchik tiyan, ajinamanta yachachiykunasninta may jatunpaq qhawanqanku. Ñuqanchik Diospa Palabranpi atienekusqanchikqa, uyariqkuna ñawiripusqanchikta sumaqta uyarinawanchikpaq yanapanman (Heb. 4:12). Ichapis nisunman: “Kaymanta imatachus Dios yuyasqanta yachayqa, mayta yanapawarqa. Qhawarina imatachus Palabranpi nisqanta.” Atikusqanmanjina Diospa Palabranmantapuni ñawiripunanchik tiyan.
3. Juk pʼitita ñawiriytawan uyariq japʼiqananpaq, ¿imatá ruwasunman?
3 Chaymantataq, Bibliap pʼitisninta sumaqta sutʼinchana. Wakin runasqa, juk pʼitita ñawiripuptinchik mana chay rato japʼiqayta atillankuchu. Chayrayku, chay pʼiti imamantachus parlachkasqanta sutʼinchananchik tiyan (Luc. 24:26, 27). Ima yachachiykunatachus japʼiqananta munasqanchikta, allinta sutʼinchana. Astawanpis tapuykunata ruwayqa, yachakuq japʼiqachkasqantachus manachus yachananchikpaq yanapawasun (Pro. 20:5; Hech. 8:30).
4. Runas japʼiqanankupaqjina yachachinapaq, ¿imastawantaq ruwananchik tiyan?
4 Bibliap yachachiykunasninwan tʼukurichina. Chantapis, yachakuqpa sunqunpi, yuyayninpi imachus kasqanta yachananchik tiyan. Ajinamanta chay pʼiti imaynatachus kawsayninpi yanapananpaq sutʼinchariyta atisun. Diospa Palabran nisqanmanjina sutʼita yachachisun chayqa, ichapis yachachisqanchikta tukuy sunquwan japʼikunkuman, jinamantataq yuyasqankuta tikrachinkuman (Hech. 17:2-4; 19:8). Sutʼincharinapaq, Romanos 10:13 pʼitita ñawiripuytawankama, pillawanpis allinta parlarinapaqqa, sutinta yachay may allinpuni kasqanta nisunman. Chaymantataq tapurisunman: “Mañakuchkaspa Diospa sutinta uqhariptiyki, payman astawan qayllaykunaykipaq, ¿yanapasunkimanchu?”. Yachakuq chay pʼitita kawsayninpi ruwananpaqjina sutʼinchaptinchikqa, Bibliap yachachiykunasnin may sumaq kasqan rikukunqa. Diospa Palabranmanta runas japʼiqanankupaqjina yachachiptinchikqa, llampʼu sunqu runas kawsaq, chiqa Diosta yupaychanankupaq jamunqanku (Jer. 10:10).