Willayninchejpi sumaj yuyayniyoj kana
1. ¿Imaraykutaj willaypi kashaspa, sumaj yuyayniyoj kana tiyan?
1 Diospa kamachisnenqa, “kay pachapi may sajra juchasapa runaspa chawpimpi” runasman willashanku, ‘ovejas jinataj atojkunaj chaupinkupiʼ kanku (Mat. 10:16; Fili. 2:15). Tukuynejpi chʼajwas, chʼampaykuna, rikukushan chayri runasta ñakʼarichinankupaj qolqerayku suwashanku, chaytaj runas “sajra kasqankumanta aswan sajraman” tukushasqankuta rikuchin (2 Tim. 3:13). Bibliaj yuyaychaykunasninmanta, ¿mayqentaj “sumaj yuyayniyoj ka[napaj]” yanapawasunchej? (Mat. 10:16.)
2. ¿Ima kutistaj ripuna allin kanman, Diosmanta wajnejpi willamunallapajpuni?
2 Allin yuyaywan imatapis ruwana. Proverbios 22:3, “sajra kajta rikuspa” pakakuyqa, sumaj kasqanta rikuchin. Chayrayku imapajpis wakichisqapuni kana tiyan. Willanchej chaypi ichá mana sajra ruwaykunas rikukuyta yachanchu, chaywanpis chayqa, ichá mana suyasqallanchej tijrakunman. Ichapis callepi kashajtinchej mana suyashajtillanchej ashkha policías chayaykamunkuman chayri ichá ashkha runas tantaykakamunkuman. Chayri ichá uj vecino chay lugarmanta ripunanchejta niwasunman. Chaypi qhepakunamantaqa, allin kanman usqhayllata ripunanchej, Diosmanta wajnejpi willamunallapajpuni (Pro. 17:14; Juan 8:59; 1 Tes. 4:11).
3. ¿Imaynatá Eclesiastés 4:9 willayninchejpi yanapawasunman?
3 Ama sapallanchej willaj rinachu. Eclesiastés 4:9 nin: “Aswan walej iskay ukhu kayqa sapalla kanamanta nisqaqa”, nispa. Willanchej chaypi, sapallanchej willashaspa, ichá ni ima llakiypi rikukunchejchu, ¿chaywanpis ajinallapunichu kanman? Wakin lugarespi ichá ni imapis kanchu. Chaywanpis ichá waj lugarespi uj hermana chayri wayna sapallan willananqa manaña allinchu kanman, astawanraj chʼisisnin. Llakiypi mana rikukunapajqa, aswan allin kanman iskay ukhu willaj llojsinanchej (Ecl. 4:10, 12). Tukuypis, willayman llojsejkunata qhawarinapuni, ripunapajtaj mayqen hermanollamanpis willanapuni tiyan.
4. ¿Imatá tukuypis willaypi jarkʼakunapaj ruwayta atinchej?
4 Ancianosqa, ‘allinninchejpaj qhawashallawanchejpuni’ chayrayku willanchej chaypi imaynatachus chantá imasmantachus jarkʼakunata yuyaychayta atiwanchej (Heb. 13:17). Yuyaychawasqanchejta, llampʼu sonqowan kasukusun chayqa, Jehová bendeciwasun (Miq. 6:8; 1 Cor. 10:12). Willanchej chaypi, sumaj yuyaywan allinta willanallapuni.