Tapuykuna

◼ Uj runa bautizakunanpaj, ¿mashkha unaytataj tantakuykunaman, willayman ima rinan tiyan?

Kausayninchejpi ni ima ajllasqanchejpis, bautizakuyta ajllasqanchejwan kikinchakunmanchu. Chayrayku ancianos, uj runa bautizakunanpaj wakichisqaña kasqanta manaraj nishajtinku, payqa Diospa kamachiykunasninta rejsinan tiyan. Chantapis chay kamachiykunaman jina kausayta munasqanta rikuchinan tiyan.

Diosqa, cristianosta tantakunanchejta kamachiwanchej. Chayrayku bautizakuyta munajqa, tantakuykunaman riyman yachasqa kanan tiyan (Heb. 10:24, 25). Chaypi tapuykunaman kutichinanpajpis kallpachakun. Diosmanta Parlayta Yachanapaj tantakuypi ichá umallirichinña, jinapis bautizakunanpajqa, mana chaypi qhelqasqapunichu kanan tiyan.

Cristianosqa runaman willamunapaj, yachachinapaj ima kamachisqa kanchej. Chayrayku bautizakuyta munajqa, willayman llojsinanpuni tiyan (Mat. 24:14; 28:19, 20). ¿Mashkha killastataj willaj llojsinan tiyan? Sonqo kʼajaywan sapa killa willamuyta munasqanta rikuchinanpajqa, killas pasanan tiyan (Sal. 78:37). Chaywanpis mana ashkha tiempopunichu kanan tiyan. Ichapis uj mashkha killaslla necesitakonqa. Chantá, ¿mashkha horastataj killapi willanan tiyan? Mana ima kamachiypis chaypaj kanchu. Ancianosqa sapa runaman jina allin yuyaywan tʼukurinanku tiyan (Luc. 21:1-4).

Ancianosqa (pisi ancianosniyoj qotuchakuykunapitaj siervos ministeriales), bautizakuyta munajwan tantakushajtinku, ni mayqen runapis kikinchu kasqanta yuyarinanku tiyan. Chayrayku uj runa bautizakunanpaj jinañachus kasqantaqa, allin yuyaywan reparananku tiyan. Bautizakuyta munajqa, Jehovaj testigon kayta munasqanta rikuchinan tiyan. Chantapis Diospa llajtanwan tantakuyta, willayman llojsiyta ima jatunpaj qhawanan tiyan. Ancianosqa mana suyanankuchu tiyan, chay runa wiñay tukusqa cristiano jina chayri watastaña yachachejkuna jina kananta. Bautizakunanpaj manaraj wakichisqachu kasqanta reparajtinkutaj, imaspirajchus llankʼanan kasqanta kʼachamanta Bibliawan sutʼinchananku tiyan. Chantá ñaupajman rinallanpajpuni yanapanqanku.