¿Willaypi hermanosninchejta yanaparisunmanchu?
1. Willaypi, ¿imaynatá Pablo jina ruwasunman?
1 Pabloqa, cristiano masisninwan willashaspa “purajmanta kallpachanaku[yta]” munaj (Rom. 1:12). Noqanchejrí, willaypi kashaspa hermanosninchejta kallpachanapaj, yanapanapaj, ¿imatapis ruwanchejchu? Paykunawan purinallamantaqa, aswan sumajta willanapaj chayri yachachinapaj imachus yanapawasqanchejta willarina.
2. ¿Imaynasmantá willaypi hermanosninchejta kallpachasunman? ¿Imaraykutaj?
2 Kallpacharina. Wakin hermanos willayta manchachikunku. Chaytaj uyankupi, parlayninkupi reparakun. Paykunaman kallpachanapaj jina imatapis nisunman. ¿Imatawan ruwasunman? Uj hermano, pichus qotuchakuykunata waturin, piwanchus willan chayman niyta yachan: “Noqapis runawan parlariyta manchachikuni, chaywanpis Jehovaj yanapanta mañakuni”, nispa. Waj hermanotaj nin: “Manchachikushasqayta mana reparachikunaypaj, asirispa parlayta qallarini. Wakin kutitaj, asirinaypajpis Diosmanta mañakuni”, nispa. Mana manchachikunapaj, ¿imallapis yanapawarqanchejchu? Chayta hermanosninchejman willarisunman.
3. Willaj chayri yachachej rispa, ¿imastá noqanchejwan rej hermanoman willarisunman?
3 Imachus yanapawasqanchejta willarina. Ima tapuyllapis chayri ima kasqanmanta parlariyllapis, ¿sumajta willanapaj yanapawarqanchejchu? Publicacionespi willanapaj yuyaychaykunaman imata yaparisqanchej, ¿yanapawarqanchejchu? Chayta noqanchejwan willaj hermanoman willarina (Pro. 27:17). Yachakuyta munajman kutishaspa, imatachus yachachiyta munasqanchejta, imaynatachus chayta ruwananchejta ima, noqanchejwan rej hermanoman willarisunman. Bibliamanta yachakojman yachachiytawantaj, imaraykuchus uj versiculota leerisqanchejta, chantá imaraykuchus ajinata yachachisqanchejta willarisunman.
4. ¿Imaraykú hermanosninchejta yachachina tiyan?
4 Ñaupa tiempomanta cristianosqa, mana runasllatachu yanapaj kanku. Astawanpis purajmanta kallpachanakoj kanku (Hech. 11:23; 15:32). Chayrayku Pabloqa, Timoteoman yachacherqa, kikinta wajkunaman yachachinantapis nillarqataj (2 Tim. 2:2). Noqanchejpis, yachakusqanchejta hermanosninchejman yachachisunman. Jinamanta sonqo kʼajaywan willanqanku, aswan sumaj yachachejkunataj kanqanku. Astawanpis Jehovata kusichisun (Heb. 13:16).