Aswan sumaj yachachejkuna kana: Mayllapipis kashaspa willayta qallariy

¿Imaraykutaj ruwananchejpuni tiyan? Wasimanta wasi willashaspaqa, wakin runasta mana wasinkupichu taripanchej. Jinapis ichá autopi rishaspa, hospitalpi kashaspa, llankʼaypi samarishaspa, escuelapi recreoman llojsispa chayri mayllapipis kashaspa, paykunaman Diospa Reinonmanta willarisunman. Imajtinchus Diosqa munan tukuy runas salvakunankuta (1 Tim. 2:3, 4). Chayrayku mayllapipis kashaspa, paykunaman qayllaykuspa willarinapacha.

¿Imaynatá ruwasunman?

Sumajta reparay. Uj runaman niraj qayllashaspa, tapurikuy: “¿Uyariyta munananpaj jinachu kashan? ¿Ashkha ruwanasniyojchu kashan?” Wakin willajkunaqa, kʼachamanta parlaspa qallarinku, chay runapis kʼachallamantataj kutichin chayqa, astawan parlarinku.
Parlariyta manchikunki chayqa, Diosmanta yanapata mañakuy (Neh. 2:4, 5; Hech. 4:29, 30).
Parlapayariyta qallarinaykipaj ichá napaykuriwajraj. Jesuspis samariamanta warmiwan parlashaspa, mana Diospa Reinomantarajchu willayta qallarerqa (Juan 4:7). Wakin kutispi sumajta ruwanki neyqa may allin. Ichá ajinata niwaj: “Wawitasniyki may kʼachaspuni kanku”. Tapuykunastapis ruwawaj, ichá ajinata nispa: “¿Noticiasta uyarerqankichu?”
Paywan parlariyta qallariytawankama, allinllamanta Diospa Reinomanta willariy. Chantaqa kʼachamanta, astawan yachakuyta munananpaj jina parlariy. Sutʼincharina, familiamanta parlarishanki chayqa, ichá niwaj: “Wawasta allinta uywanapaj uj sumaj yuyaychayta leerqani”. Noticiasmanta parlarishanki chayqa, ichá niwaj: “Kay tiempopeqa llakiykunallamanta uyarinchej, niraj unaychu uj sumaj willaykunata uyarispa kusikorqani”. Diospa Reinonmanta parlarejtiykikama, mana uyarisuyta munan chayqa, ama llakikuychu.
Tratadosta chayri waj publicacionestapis, astawan yachakuyta munajkunaman jaywanaykipaj apakuy.

Killantinta chayta ruway:

Sapa semana mayllapipis kashaspa, uj runallawanpis parlarinaykipaj kallpachakuy.