CRISTIANO KAUSAYNINCHEJ
Pabloqa “Diosman graciasta qorqa, kallpachakorqataj”
Pablo Romaman chayashasqanta yachaspa, hermanosqa 64 kilometrosta jina payta taripaj rerqanku. “Pablotaj paykunata rikuspa Diosman graciasta qorqa, kallpachakorqataj” (Hch 28:15). Apóstol Pabloqa congregacionesta kallpachaspa purej. Jinapis chay kutipeqa preso kasharqa. Chayrayku payñataj kallpachasqa kayta necesitarqa (2Co 13:10).
Kunanpis congregacionesta waturej hermanosqa, kallpachanawanchejpaj waturikoj jamuwanchej. Jinapis paykunaqa, noqanchej jinallataj saykʼukunku, llakikunku, kallpachanatataj necesitanku. Congregacionesta waturej hermano, señoranwan congregacionninchejta visitarishajtin, ¿imaynatá paykunata kallpachasunman? ¿Imatá ruwasunman “purajmanta kallpachanakunanchejpaj”? (Ro 1:11, 12).
Predicacionman ñaupajsituta chayana. Congregacionesta waturej hermanoqa, jamusqan semanapi predicaj llojsejtinchej mayta kallpachakun (1Te 1:2, 3; 2:20). Chayrayku allin kanman, chay killa precursor auxiliar kananchej. Chantapis waturej hermanowan chayri señoranwan predicasunman, manaqa estudionchejman pusasunman. Wakenqa piensanku mana allintachu chayri pisi tiempollataraj predicasqankuta. Chayraykutaj waturej hermanowan predicayta manchachikunku. Jinapis ama manchachikunachu, paykunaqa tukuywan predicaspa mayta kusikunku.
Wajyarikuyta yachana. ¿Imaynatá waturikoj hermanonchejta señorantawan munakusqanchejta rikuchisunman? Wasinchejpi alojasunman chayri mikhoj jamunankupaj invitarisunman. Paykunaqa mana sumaj mikhunatapunichu waykʼunanchejta suyanku (Lu 10:38-42).
Yuyaychawasqanchejta japʼikuna, kasukunataj. Congregacionesta waturej hermanoqa, munakuywan yanapawanchej Jehová Diosninchejta aswan sumajta sirvinanchejpaj. Wakin kutistaj ichá kʼamiwasun ima (1Co 5:1-5). Paykunata tukuy sonqo kasukojtinchejqa, kusiywan llankʼallanqankupuni (Heb 13:17).
Agradecekuna. Congregacionesta waturej hermanoman señoranman ima, mayta yanapawasqanchejmanta agradecekuna. Manachayrí uj cartitapi chayri uj tarjetitapi agradecekusqanchejta nina (Col 3:15).