¿Imaynatá Jehová jarkʼawanchej?

1. ¿Imajtintaj Jesús Tatanmanta mañakorqa yachachisqasninta jarkʼananta?

JESUSQA yacharqa, yachachisqasnin ashkha llakiykunasniyoj kanankuta. Wañuchinanku karqa chay diaj ñaupaj chʼisintaj, chaypi piensasharqa. Chayrayku Diosmanta mañakorqa: ‘Tatáy, mañakuyki yachachisqasniyta Kuraj Supaymanta jarkʼanaykita’, nispa. Chayta ruwarqa paykunata munakusqanrayku (Juan 17:14, 15). Jesusqa yacharqa cieloman ripojtin, Satanasqa Diosta sirviyta munajkunawan maqanakunallantapuni. Chayrayku Jehovamanta mañakorqa paykunata yanapananta.

2. ¿Imaraykutaj nisunman Jehová uyarinawanchejtapuni?

² Jehovaqa Wawanta munakusqanrayku, mañakuyninta uyarerqa. Noqanchejpis Jehovaj munayninta ruwanapaj kallpachakusun chayqa, payqa munakuwasun, yanapata mañakojtinchejtaj uyariwasun. Payqa may munakuyniyoj Tatanchej. Chayrayku cuidallawasunpuni. Mana chayta ruwanman chayqa, paypaj sajrata parlankuman.

3. ¿Imaraykutaj Jehová jarkʼanawanchejta necesitanchej?

³ Kay tiempopeqa Jehová jarkʼanawanchejta astawan necesitanchej. Satanasqa cielomanta wijchʼuchikamusqanrayku, “manchay phiñasqa” kashan (Apo. 12:12). Chayrayku wakin runaswan qhatiykachachiwanchej. Chaypajtaj paykunaman creechin, chayta ruwaspa “Diosta yupaychashasqankuta” (Juan 16:2). Diospi mana creej runaspis, mana paykuna jina kasqanchejrayku qhatiykachawanchej. Jinapis mana manchachikunchejchu. Imaraykuchus Diospa Palabran nin: “Señortajrí nisqanta juntʼanpuni. Paymin kallpachasonqachej, Kuraj Supaymantataj jarkʼasonqachej”, nispa (2 Tes. 3:3). Qhepan parrafospi yachakusun, imaynasmantachus Jehová jarkʼawasqanchejta.

JEHOVAQA MAQANAKUNA PʼACHATA QOWANCHEJ

4. Efesios 6:13-17 nisqanman jina, ¿imatataj Jehová jarkʼanawanchejpaj qowanchej?

⁴ Jehová Diosqa Satanasmanta jarkʼanawanchejpaj, maqanakuna pʼachata qowanchej (Efesios 6:13-17 leey). Chay pʼachaqa manchay sumaj, sumajtataj jarkʼawasunman. Jinapis chaypajqa, tukuysitunta churakuna tiyan, manataj orqhokunachu tiyan. Qhepan parrafospi, imaschus chay pʼacha kasqanta yachakusun.

5. ¿Imawantaj chumpi ninakun, chanta imaraykutaj churakunanchej tiyan?

⁵ Chumpeqa Diospa Palabranpi cheqa yachachiykuna. ¿Imaraykutaj chaywan matʼita chumpiykukunanchej tiyan? Imaraykuchus Satanasqa ‘llullakojkunaj tatan’ (Juan 8:44). Payqa llulleriosninwan may chhika unaytaña “jallpʼapi kaj tukuy runasta pantachishan” (Apo. 12:9). Bibliaj yachachiykunasninrí, mana paywan engañachikunapaj yanapawanchej. ¿Imaynatá churakusunman Dios qowanchej chay chumpita? Jehovamanta cheqa kajta yachakuspa, “atiyninman jina, cheqa kajman jinataj” payta yupaychaspa, tukuy imapitaj allinta purispa (Juan 4:24; Efe. 4:25; Heb. 13:18).

6. ¿Imawantaj pechera ninakun, chanta imaraykutaj churakunanchej tiyan?

⁶ Pecheraqa Diospa cheqan kamachiykunasnin. ¿Imaraykutaj pecherata churakunanchej tiyan? Imaraykuchus kay mundoj sajra imasnenqa, sonqonchejta chʼichichanman. Imaynatachus pechera soldadoj sonqonta jarkʼan, ajinallatataj Dios qowasqanchej pecherapis jarkʼawasunman (Pro. 4:23). Jehovaqa payta munakunanchejta, tukuy sonqotaj sirvinanchejta munan (Mat. 22:36, 37). Satanastajrí mana chayta munanchu. Chayrayku kay mundopi imaymana sajra imasta rikuchiwanchej. Jehovataj chaykunata chejnikun (Sant. 4:4; 1 Juan 2:15, 16). Chay imaswan mana urmachiwanchej chaytaj, Jehovaj kamachiykunasninta mana kasukunanchejpaj tanqawanchej.

7. ¿Imaynatataj Dios qowasqanchej pecherata churakusunman?

⁷ ¿Imaynatá Dios qowasqanchej pecherata churakusunman? Paypa kamachiykunasnin allinninchejpaj kasqanta entiendespa, chayman jinataj kausakuspa (Sal. 97:10). Wakenqa ninku: “Diospa kamachiykunasnenqa ni imata ruwajta saqewanchejchu”, nispa. Jehovata munakojkunatajrí, mana ajinatachu yuyanchej. Astawanpis yachanchej, kamachiykunasnenqa allinninchejpaj, ‘juntʼayta atinapaj jinallataj’ kasqanta (1 Juan 5:3). Sichus uj soldado guerrapi kashaspa, pecheranta llasa kasqanraykulla orqhokunman chayqa, kausayninta wañuy pataman churanman. Kikillantaj noqanchejwanpis kanman. Bibliaj nisqanta mana kasukojtinchejqa, mana allinchu riwasun.

8. ¿Imatataj Pablo niyta munasharqa, ‘sumaj willaykunata jukʼutata jina churakuychej’ nispa?

⁸ Apóstol Pablo nerqa: “Dioswan allinyakunamanta sumaj willaykunata, jukʼutata jina chakisniykichejman churakuychej”, nispa. Chaywanqa nisharqa, Diospa Gobiernonmanta sumaj willaykunata, ima ratollapis willananchej kasqanta. Chayta ruwaspaqa creeyninchejta astawan sinchʼiyachisun. Ajinatapunitaj jallpʼantinpi predicashanchej: trabajopi, escuelapi, colegiopi, negociospi, wasimanta wasi, rantikoj rispa, mana testigo familiaresninchejta visitashaspa, rejsisqasninchejwan parlarishaspa, wasipi wisqʼasqa kashaspapis. Predicayta manchachikusunman chayqa, guerrapi kashaspa jukʼutanta orqhokoj soldado jina kasunman. Chayta ruwaj soldadoqa, chakisninta nanaykuchikuspa mana enemigosninmanta ayqekuyta atinmanchu, nitaj comandantentapis kasukuyta atinmanchu.

9. ¿Imaraykutaj jarkʼakuna escudota apaykachananchej tiyan?

⁹ Jarkʼakuna escudoqa, Jehová Diospi creesqanchej. Paypi creesqanchejrayku nisqasninta juntʼananpi atienekunchej. Chaytaj “Kuraj Supaypa laurashaj tukuy flechasninta” thasnuchinapaj yanapawanchej. ¿Imaraykutaj jarkʼakuna escudota apaykachananchej tiyan? Imaraykuchus chayqa, Diosta wasanchajkunaj yachachiyninkuta mana creenapaj yanapawanchej. Yanapallawanchejtaj runas burlakuwajtinchej mana llakikunapaj. Mana creeyniyoj kaspaqa, runas Jehovata mana kasukunapaj tanqawajtinchej, urmasunpacha. Jinapis trabajopi chayri escuelapi Jehovata kasukunchejpuni chayqa, creeyninchejwan escudowan jina jarkʼakushanchej (1 Ped. 3:15). Diosta yupaychaypi perjudicawasunman chay trabajosta mana japʼikuspapis, chay escudowan jarkʼakushallanchejtaj (Heb. 13:5, 6). Chantá runas churanakuwajtinchejpis Jehovata sirvillanchejpuni chayqa, escudowan jarkʼakushallanchejtaj (1 Tes. 2:2).

10. ¿Imawantaj ninakun salvacionmanta montera, chanta imaraykutaj churakunanchej tiyan?

¹⁰ Salvacionmanta monteraqa, Jehová wiñay kausayta qonawanchejta suyakusqanchej. Payqa niwanchej, munayninta ruwajtinchej chay premiota qonawanchejta, wañupojtinchejtaj kausarichimunawanchejta (1 Tes. 5:8; 1 Tim. 4:10; Tito 1:1, 2). Imaynatachus cascoqa soldadoj umanta jarkʼan, ajinallatataj salvacionmanta monterapis yuyayninchejta jarkʼan. Chay monteraqa, yuyayninchejta Diospa nisqasninpi churanapaj yanapawanchej, problemasninchejmanta mana anchata llakikunapajpis. ¿Imaynatá chay monterata churakusunman? Jehová Dios jina yuyaspa. Chayrayku qolqepi atienekunamantaqa, Diospi atienekunchej (Sal. 26:2; 104:34; 1 Tim. 6:17).

11. ¿Imawantaj ninakun Diospa atiyninpa espadan, chanta imaraykutaj apaykachananchej tiyan?

¹¹ Diospa atiyninpa espadanqa, Biblia. Diospa Palabranqa, llulla yachachiykunata sutʼiman orqhon. Chay jinamantataj runasta yanapan, pantasqa yachachiykunamanta, millay viciosmantawan kacharichikunankupaj (2 Cor. 10:4, 5; 2 Tim. 3:16, 17; Heb. 4:12). ¿Imaynatá chay espadata sumajta apaykachasunman? Bibliata sapallanchejpi sumajta estudiaspa, Diospa llajtan yachachiwasqanchejman jina ruwaspa ima (2 Tim. 2:15). Jehovaqa mana maqanakuna pʼachallatachu qowanchej, manaqa waj yanapastawan. Qhepan parrafospi mayqenkunachus chaykuna kasqankuta qhawarisun.

MANA SAPANCHEJCHU MAQANAKUSHANCHEJ

12. ¿Pikunawan Jehová yanapachiwanchej, chanta imaraykutaj?

¹² Sumaj soldadoqa yachan, sapallanqa mana ashkha soldadosta atipayta atinanta. Chayrayku soldado masisninwan yanapachikun. Ajinallataj noqanchejwanpis. Sapallanchejmantaqa mana Satanasta, nitaj payman ujchasqa kajkunata atipayta atisunmanchu. Chayrayku Jehovaqa, mundontinpi hermanosninchejwan yanapachiwanchej (1 Ped. 2:17).

13. Hebreos 10:24, 25 nisqanman jina, ¿imaynatataj reuniones kallpachawanchej?

¹³ Jehová Diosqa reunionesnejta yanapallawanchejtaj (Hebreos 10:24, 25 leey). Tukuypuni maykʼajllapis llakisqa kanchej. Ajina kashajtinchej reuniones mayta kallpachawanchej. Chaypeqa hermanospa, hermanaspa comentasqankuta uyarinchej. Chantapis discursosta, rikuchiykunata ima uyarillanchejtaj. Chaykunaqa Jehovata sirvinallapajpuni kallpachawanchej. Mana chayllachu, niraj reunión qallarishajtin, reunión pasaytapis hermanosninchejwan parlarikuspa kallpachanakunchej (1 Tes. 5:14). Chantapis reunionespeqa, wajkunata yanaparispa kusikunchej (Hech. 20:35; Rom. 1:11, 12). Reunionesqa aswan sumajta predicanapaj, yachachinapaj ima yanapallawanchejtaj. Chaypeqa Bibliata estudiachinapaj publicacionesta sumajta apaykachayta yachakunchej. Chayrayku reunionespaj sumajta wakichikuna. Reunionpi kashaspataj sumajta atiendena. Chantá imatachus chaypi yachakusqanchejman jina ruwana. Chay imasta ruwaspaqa, “Cristo Jesuspa sumaj soldadon” kasunchej (2 Tim. 2:3).

14. ¿Pikunawantaj Jehová yanapachillawanchejtaj?

¹⁴ Jehovaqa may chhika atiyniyoj angeleswan yanapashawanchej. Unay tiempopi, uj angellla may chhika soldadosta wañuracherqa (Isa. 37:36). Kunanqa piensarina imatachus may chhika ángeles ruwayta atisqankupi. Chay chhika angelestaqa, ni mayqen runapis, ni pi supaypis atipayta atinmanchu. Jehová Dios noqanchejwan kajtenqa, ni pi atipayta atiwasunmanchu (Jue. 6:16). Chayrayku trabajomanta, colegiomanta compañerosninchej, chayri mana testigo familiaresninchej, imata niwajtinchej chayri imata ruwawajtinchej, chaypi piensarinanchej tiyan. Noqanchejqa mana sapanchejchu maqanakushanchej, manaqa Comandantenchej Jehovata kasukushanchej.

JEHOVAQA JARKʼALLAWASUNPUNI

15. Isaías 54:15, 17 nisqanman jina, ¿imaraykutaj Satanaswan paypa makinpi kajkunawan mana chʼinyachiyta atiwasunchu?

¹⁵ ¿Imaraykutaj Satanaspa makinpi kajkuna chejnikuwanchej? Imaraykuchus noqanchejqa mana politicaman chhapukunchejchu, nitaj guerraman rinchejchu. Astawanpis Diospa Gobiernollan allin kausayta apamunanta willanchej. Chantapis Jehovaj sutinmanta parlanchej, kamachiykunasnintataj kasukunchej. Mana chayllachu, runasman willanchej kay mundota kamachej Satanasqa, llullataj, runa wañuchitaj kasqanta (Juan 8:44). Chantapis Satanaspa mundon tumpitamantawan chinkachisqa kananta willamunchej. Jinapis Satanaswan, paypa makinpi kajkunawanqa, ni jaykʼaj chʼinyachiwasunchu. Noqanchejqa tukuy imaynamanta willaspa, Jehová Diosta jatunchallasunpuni. ¿Imaraykutaj chayta ninchej? Imaraykuchus Satanás churanakuwajtinchejpis, Jehová yanapawasqanchejrayku Gobiernonmanta mundontinpi willashallanchejpuni (Isaías 54:15, 17 leey).

16. ¿Imaynasmantá Jehová manchay ñakʼariy tiempopi salvawasun?

¹⁶ ¿Imastaj tumpamantawan kanqa? Jehovata tukuy sonqo sirvejtinchej, payqa manchay ñakʼariy tiempopi iskaynejmanta salvawasun. Ñaupajtaqa salvawasun gobiernos Jatun Babiloniata, nisunman llulla religionesta chinkachishajtinku (Apo. 17:16-18; 18:2, 4). Chantá Satanaspa mundonmanta puchojkunata Armagedonpi chinkachishajtin salvallawasuntaj (Apo. 7:9, 10; 16:14, 16).

17. ¿Imaraykutaj Jehovaj qayllallanpipuni kananchej tiyan?

¹⁷ Jehovaj qayllallanpipuni kajtinchejqa, Satanasqa mana wiñaypaj ñakʼarichiwasunchu. Astawanpis pay wiñaypaj chinkachisqa kanqa (Rom. 16:20). Chayrayku Jehová qowanchej chay maqanakuna pʼachata, tukuysitunta churakuna, amataj orqhokunachu. Amallataj Satanaswan, paypa makinpi kajkunawan ima sapallanchej maqanakunachu. Hermanosninchejwan yanapachikuna. Chantapis Comandantenchej Jehovata kasukuna. Chayta ruwasun chayqa, munakuyniyoj Tatanchej Jehovaqa kallpachawasun, jarkʼawasuntaj (Isa. 41:10).