¿IMATAJ YANAPAWASUNMAN NIÑA WAJKUNATA CHEJNIKUNAPAJ?

1 | Tukuyta uj rejllata qhawana

Biblia nin:

‘Diosqa tukuy runasta uj rejllata qhawan. Payqa allinpaj qhawan mayqen nacionllamantapis payta manchachikojta, allin kajtataj ruwajtaʼ (HECHOS 10:34, 35).

¿Ima niytá munan?

Jehováa Diosqa runaspa sonqonkuta sumajta rejsin. Manataj qhawanchu ima llajtamantachus, yanitachus chayri gringuituchus kasqankuta. Bibliaqa nin: “Runaqa ñawisninpa rikusqallanta qhawan, Jehová Diostajrí runaj sonqonta qhawan”, nispa (1 Samuel 16:7).

Kayta ruwawaj:

Runaspa sonqonkuta mana rejsiyta atispapis Jehová Dios jina tukuyta uj rejllata qhawasunman. Mana yuyanachu tukuy runas sajras kasqankuta. Astawanqa kallpachakuna mana kikinchu kasqanchejta yuyanapaj. Sonqonchejpi pitapis llajtanrayku chayri imayna rijchʼayniyojchus kasqanrayku chejnikuyta qallarishanchej chayqa, Jehová Diospa yanapayninta mañakuna tukuy runasta uj rejllata qhawanapaj, sonqonchejmantapis sajra yuyaykunata orqhonapaj (Salmo 139:23, 24). Jehová Diosqa chayta ruwanapaj yanapawasunpuni (1 Pedro 3:12).

a Diospa sutenqa Jehová(Salmo 83:18).

‘Ni jaykʼaj allinta kausakorqanichu uj yuraj runitawan. Kunanqa niyman mundontinmanta hermanosniy kapuwasqanta’ (TITUS).

Experiencia: TITUS

Manaña wajkunata chejnikunchu

Titusqa uj pandillapi kasharqa, chay pandillapi kajkunataj sajras karqanku. Chay lugarpi leyes mana tukuypajchu kikin kasqanraykutaj ashkhas sufrej kanku. Chayrayku chay pandillamanta kajkunaqa rabiasqas kasharqanku. Titus nin: “Hotelesman, fiesta wasisman rej kayku wajkunawan maqanakunallapaj. Imaraykuchus chay lugarespeqa yana runitasta mayta chejnikoj kanku”, nispa. Titusqa reparakun wajkunata chejnikusqanrayku rabianwan atipachikusqanta. Pay nillantaj: “Piwanpis siminakuspaqa qharipis warmipis kachun maqajpacha kani”, nispa.

Titusqa Jehovaj testigosninwan Bibliata estudiayta qallarejtin kausayninta cambiarqa. Bibliata leesqan kausayninpi mayta yanaparqa. Tumpamantawan kay jallpʼapi ‘manaña wañuy, nitaj llakiypis, nitaj waqaypis, nitaj nanaypis kananta’ yachakusqan, sonqonman chayarqa (Apocalipsis 21:3, 4).

Titusqa qallariypi kausayninta mana cambiayta atillarqachu. Pay nin: “Imatachus piensasqayta imaynachus kasqaytapis mana cambiayta atillarqanichu”, nispa. Hechos 10:34, 35 versiculospi yachakorqa, tukuy runasta uj rejllata qhawananta. Chaytaj Titusta mayta yanaparqa.

Titus nillanpuni: “Rikorqani Jehovaj testigosnenqa maymanta kajtinkupis, imayna rijchʼayniyoj kajtinkupis purajmanta munanakusqankuta. Chaytaj reparachiwarqa cheqan religionpuni kasqankuta. Niraj bautizakushajtiy uj gringuito hermano wasinman wajyariwarqa mikhurikunapaj. Chaytaj mana creenapaj jina karqa, imaraykuchus ni jaykʼaj allinta kausakorqanichu uj yuraj runitawan, ni khuska mikhunaykuytapis yuyarqanichu. Kunanqa niyman mundontinmanta hermanosniy kapuwasqanta”, nispa.