¿IMATAJ YANAPAWASUNMAN NIÑA WAJKUNATA CHEJNIKUNAPAJ

4 | Diospa yanapayninta maskʼana

Biblia nin:

“Diospa espiritunpa poqoynenqa: munakuyniyoj kay, kusikuyniyoj kay, sonqo tiyaykusqa kay, pacienciayoj kay, kʼacha sonqoyoj kay, kʼacha kay, creeyniyoj kay, llampʼu sonqoyoj kay, munayninchejwan mana atipachikoj kay ima” (GÁLATAS 5:22, 23).

¿Ima niytá munan?

Dios yanapawasunman manaña pitapis chejnikunapaj. Diospa atiynillanwan kʼacha runasman tukusunman, sapallanchejmantaqa mana atisunmanchu. Chayrayku manaña pitapis chejnikunapajqa Diospa yanapayninta maskʼana. Chayta ruwasun chayqa, apóstol Pablo jinallataj nisun. Pay nerqa: “Tukuy imapaj kallpayoj kani, Dios atiyta qowasqanrayku”, nispa (Filipenses 4:13). Chantá niyta atisun: “Noqataqa Jehová Diosniy yanapawan”, nispa (Salmo 121:2).

Kayta ruwawaj:

“Jehovaqa uj phiña runamanta llampʼu sonqoyoj runaman tukuchiwan” (WALDO).

Jehová Diosmanta tukuy sonqo espíritu santota mañakuna. Kʼacha runa kananchejpajpis yanapanawanchejta mañakuna (Lucas 11:13). Manaña pitapis chejnikunapajqa munakuyniyoj kay, sonqo tiyaykusqa kay, pacienciayoj kay, munayninchejwan mana atipachikoj kay ima yanapawasun. Chay kʼacha kaykunamanta Bibliapi yachakusunman, chayman jinataj kausakunapaj kallpachakusunman. Chantapis kʼacha runas kanankupaj kallpachakojkunawan astawan masichakusunman, paykunataj yanapawasunman munakuyta rikuchinapaj, allin ruwaykunatataj ruwanapaj (Hebreos 10:24).

Experiencia: WALDO

Sajra kausayninta cambiarqa

Waldoqa wawa kashaspa mayta sufrerqa, chayraykutaj sajra runaman tukorqa. Pay nin: “Drogasta vendejkunawan sapa kuti maqanakoj kani. Chayrayku wañuchinawankupaj qhawawaj kanku. Uj kutipi, chayta ruwananpaj uj runaman pagaykusqanku. Wañuymanta lluspʼispapis, cuchillowan tʼojsiykuwarqapuni”, nispa.

Waldoj señoranqa Jehovaj testigosninwan Bibliamanta yachakuyta qallarerqa, paytaj chaymanta mayta phiñakorqa. Pay nin: “Paykunata rikuyta má atejchu kani, millay palabraswantaj qhapariykoj kani. Paykunarí, ni jaykʼaj phiñakojchu kanku. Chaytaj mayta tʼukuchiwarqa”, nispa.

Tiemponmanqa Waldopis Bibliamanta yachakuyta qallarerqa. Pay nin: “Bibliaj nisqanman jina kausayta mana atillarqanichu. Sonqoyta ni jaykʼaj ñitʼiykukuyta atinayta yuyaj kani”, nispa. Jinapis Waldoqa Bibliapi uj imata yachakusqan sonqonmanpuni chayarqa.

Pay nin: “Uj kuti Bibliamanta yachachiwaj Alejandro, Gálatas 5:22, 23 versiculosta leerichiwarqa. Chantá niwarqa chay versículos nisqanman jina kʼacha runa kanaypajqa espíritu santopi atienekunayta, nitaj noqapichu. Chaytaj cambianaypaj yanapawarqa”, nispa.

Waldoqa Jehová Diospa yanapayninwan manaña pitapis chejnikorqachu. Pay nin: “Familiaresniy, ñaupa amigosniypis kausayniyta cambiasqaymanta tʼukunku”, nispa. Chantapis nin: “Jehovaqa uj phiña runamanta llampʼu sonqoyoj runaman tukuchiwan”, nispa.