Leejkunaj tapuyninku

Uj cristiano matrimonionpi mana khuchichakuy kajtillan divorciakojtin, wajwantaj casarajtin, ¿imaynatá hermanos qhawanku ñaupaj matrimonionta qhepa matrimoniontawan?

Congregacionmanta hermanosqa, chay hermano ñaupaj matrimonionta tukuchisqanta reparanqanku watejmanta casarasqanrayku, qhepa matrimoniollantañataj valechenqanku. Imajtinchus hermanos ajinata yuyasqankuta yachanapajqa, qhawarisunchej imatachus Jesús nisqanta divorciakuymanta watejmanta casarakuymantawan.

Jesusqa Mateo 19:9 versiculopi nerqa ima casollapichus uj cristiano divorciakuyta atisqanta. Chaypi nin: “Pillapis warminmanta divorciakuspa wajwan casaraykun chayqa, qhenchachakun. Warmin khuchichakuy juchaman urmajtillan divorciakuyta atin”, nispa. Jesuspa nisqanmantaqa kayta yachakunchej: 1) Biblia nisqanman jina qhariwarmimanta mayqennillankupis khuchichakuy juchapi urmajtillanku divorciakuyta atisqankuta. 2) Uj qhari matrimonionpi mana khuchichakuy jucha kajtillan warminmanta divorciakuspa wajwan casarakun chayqa, qhenchachakusqanta.a

Jesuspa nisqan, ¿ninayanchu uj qhari khuchichakuy juchapi urmaytawan divorciakuspa, wajwan watejmanta casarakuyta atisqanta? Wakinpi atikunman, wakinpitaj mana. Qosa khuchichakuy juchapi urman chayqa, mana juchayoj warmin nenqa perdonanantachus manachus. Warmi mana perdonajtin, leyesman jinataj divorciakojtinkoqa, chay divorcio papelesninkuta tramitayta tukuytawan, wajwan casarakuyta atinkuman.

Jinapis ichá mana juchayoj warmeqa qosanta perdonayta munanqa, nitaj divorciakuyta munanqachu. Chaywanpis, ¿imataj kanman khuchichakuy juchapi urmaj qosa, manañapuni warminwan kayta munaspa, warmin mana munashajtillan paymanta divorciakojtin? Chay khuchichakoj qhareqa warmin perdonayta munasqanrayku, manataj paymanta divorciakuyta munasqanrayku, Biblia nisqanman jina mana wajwan watejmanta casarayta atinchu. Chay runa manapuni Bibliaj nisqanta kasuyta munaspa wajwan casaraykun chayqa, watejmanta qhenchachakun. Ancianosqa chay runata juchanmanta juzganankupaj, ujtawan comité judicialta ruwanallankutaj tiyan (1 Cor. 5:1, 2; 6:9, 10).

Uj qhari Biblia nisqanman jina mana casaranan kashajtin wajwan casaraykun chay, ¿imaynatataj hermanos qhawanku ñaupaj matrimonionta, qhepa matrimoniontawan? ¿Biblia nisqanman jina ñaupaj matrimonion valeshallanpunichu? ¿Mana juchayoj warmi niyta atinmanrajchu qosan karqa chay runawan kutinakunankuta chayri manaña kutinakunankuta? Chay runaj qhepa kaj matrimonionta, ¿qhenchachakuyta jinachu hermanos qhawankuman?

Kunankamaqa hermanosqa qhepa matrimoniota qhenchachakuyta jina qhawarqanku, chay runaj ñaupaj warmin kausakushasqanrayku, nitaj piwanpis casarakusqanrayku, nillataj khuchichakuy juchapi urmasqanrayku. Jesusqa wajwan casaraymanta parlashaspa, mana parlarqachu juchallikojpa mana juchayoj warminmanta. Astawanpis payqa sutʼincharqa, sichus uj runa mana Bibliaj nisqanman jina divorciakuspa wajwan casaraykun chayqa qhenchachakusqanta. Chayrayku uj runaj divorciakusqan, wajwan casaraykusqanpis Jesús nisqanman jina qhenchachakuywan ninakun. Ajinamantataj ñaupaj matrimonionqa niña valenchu.

Uj qhari warminmanta divorciakuytawan wajwan casaraykuspaqa ñaupaj matrimonionta tukuchan. Chayrayku mana juchayoj ñaupaj warmenqa manaña niyta atinchu paywan kutinakunantachus manachus. Congregacionmanta hermanospis imaynatachus chay runaj qhepa matrimonionta qhawasqankoqa, mana chay mana juchayoj ñaupaj warmin wañupusqanmantachu kanqa, nitaj casarakusqanmantachu, nillataj khuchichakuy juchapi urmasqanmantachu.b

Qallariypi parlarerqanchej, uj runa qhenchachakusqanrayku divorciakusqanmanta. Jinapis, ¿imataj kanman uj runa mana qhenchachakuspalla warminmanta divorciakojtin, watejmantataj casaraykojtin? Chanta, ¿imataj kanman uj runa divorciakuytawanraj khuchichakuy juchapi urmajtin, ñaupaj warmin perdonayta munashajtinpis waj warmiwan casaraykojtin? Chay iskay imasmanta mayqellantapis ruwaj runaqa divorciakuspa, watejmantataj casaraykuspa qhenchachakun. Ajinamantataj ñaupaj kaj matrimonionqa manaña valenchu, qhepa kaj matrimoniollanña leyesman jina valen. 15 de febrero de 1980 watamanta La Atalaya revistaj 30 paginanpi nerqa, “chay jina casopi watejmanta casaraykoj runaqa, niña atinchu warminmanta divorciakuspa ñaupaj warminwan kutinakuyta. Imajtinchus ñaupaj kaj matrimonionqa divorciakusqanrayku, qhenchachakusqanrayku, watejmantataj wajwan casaraykusqanrayku tukukorqa”.

Kay mosoj sutʼinchayqa qhariwarmi kausayta mana pisipajchu qhawachishan, nillataj nishanchu qhenchachakoyqa mana sinchʼi juchachu kasqanta. Uj cristiano Bibliaj nisqanta mana valechispa warminmanta divorciakojtin, wajwantaj casaraykojtin, ancianosqa comité judicialta ruwananku tiyan, qhenchachakuy juchapi urmasqanrayku. (Chay runaj qhepa kaj warmin cristiana chayqa, ancianosqa waj comité judicialta ruwanallankutaj tiyan, qhenchachakuy juchallapitaj urmasqanrayku). Chay mosoj matrimonionkuta mana qhenchachakuyta jinachu qhawana kajtinpis, chay runaqa congregacionpi ruwanasta, ashkha watasta mana japʼiyta atenqachu. Chaytaj kanqa imastachus ruwasqanta wajkuna qonqanankukama. Chantapis ancianosqa congregacionpi niraj ima ruwanatapis qoshaspa, ñaupaj warmin imaynachus kashasqanpi sumajta piensarinanku tiyan. Divorciakushajtinku juchʼuy wawasta saqerparqa chayqa, paykunapipis piensarinallankutaj tiyan (Mal. 2:14-16).

Bibliaj nisqanta mana kasukuspa divorciakuytawan casarakoyqa, ashkha llakiykunata apamun. Chayrayku cristianosqa qhariwarmi kausayta Jehová jina jatunpaj qhawanapaj kallpachakunchej (Ecl. 5:4, 5; Heb. 13:4).