‘Qankunapura kallpachanakullaychejpuni’

1. 1 Tesalonicenses 5:11 nisqanman jina, ¿ima ruwaypitaj tukuy yanapakunchej?

ICHÁ congregacionninchejpi Tantakuna Wasita ruwarqanchej chayri allincharqanchej. Chay mosoj Tantakuna Wasipi primera vez tantakusqanchejta sumajtachá yuyarikunchej. Maytapuni Jehovaman agradecekorqanchej. Ichapis kusiymanta waqay ñawilla kasharqanchej, chayraykutaj reunionpi ñaupaj kaj takiyta mana takiytapis aterqanchejchu. Chay sumaj Tantakuna Wasisninchejqa Jehovata jatunchan. Jinapis Tantakuna Wasista ruwaymanta nisqaqa waj ruway kallantaj. Chaytaj imamanta nisqapis aswan sumaj, Jehovatataj astawanraj jatunchan. ¿Imataj chay ruway? Tantakuna Wasiman jamojkunata kallpachay. 1 Tesalonicenses 5:11 (leey) versiculopi apóstol Pablo “kallpachay” palabrata oqharisqanqa, griego parlaypi niyta munallanmantaj “wasita ruway”. Chaywanqa apóstol Pablo cristianosta nisharqa hermanosninkuta kallpachaypi “wasita ruwaypi jina” yanapakunankuta.

2. ¿Imatá kay yachaqanapi yachakusun?

² Hermanosninchejta sumajta kallpachanapajqa, qhawarina imaynatachus apóstol Pablo ruwasqanta. Payqa wajkunapaj sonqoyoj karqa. Kay yachaqanapi yachakusun imaynatachus Pablo hermanosninta yanapasqanta llakiykunata aguantanankupaj, paykunapura allinpi kanankupaj, creeypi sinchʼi sayasqa kanankupaj ima. Qhawarina imaynatachus noqanchejpis pay jina ruwasunman chayta (1 Cor. 11:1).

PABLO HERMANOSNINTA YANAPARQA LLAKIYKUNATA AGUANTANANKUPAJ

3. ¿Imatataj Pablo sutʼita yacharqa?

³ Pabloqa hermanosninta mayta munakorqa. Pay kikin ashkha llakiykunapi rikukusqanraykutaj llakiypi tarikojkunata khuyakorqa, entienderqataj. Uj pacha qolqen pisirparqa. Chayraykutaj paypaj, paywan kajkunapajpis trabajanan karqa (Hech. 20:34). Pabloj oficionqa toldosta ruway karqa. Corintoman chayaspa Aquilawan Priscilawan trabajarqa, kikin oficioyoj kasqankurayku. Jinapis “sapa samarikuna pʼunchay” judiosman, griegosman predicaj. Silaswan Timoteowan chayajtinkutaj, “Pabloqa Diospa palabranta willaspallaña purerqa” (Hech. 18:2-5). Payqa sutʼita yacharqa kausayninpeqa Diosta sirviytapuni ñaupajman churananta. Pabloqa ashkhata predicasqanrayku, paypajpis trabajakusqanrayku hermanosta kallpachayta, yuyaychaytapis aterqa. Payqa hermanosta yuyaycharqa “imaschus aswan allin imas kasqanta” reparayta yachanankuta, nisunman Jehovapaj ruwanasninkuta ruwayta mana qonqanankuta, llakiykunapi kajtinkupis chayri familiankuman imatachus necesitasqankuta qonankupuni kajtinpis (Fili. 1:10).

4. ¿Imaynatataj Pablowan Timoteowan hermanosta yanaparqanku qhatiykachasqa kashajtinku?

⁴ Tesalónica llajtapi congregación rikhurisqanmanta pisi tiemponman, chay lugarmanta mosoj cristianosqa sinchʼi qhatiykachasqas karqanku. Sajra runasqa Pablotawan Silastawan mana tarispa, ‘wakin hermanosta qhatataspa aparqanku llajtata kamachejkunaman’. Qhaparispataj nerqanku: ‘Paykunaqa Cesarpa kamachiykunasninman churanakunku’, nispa (Hech. 17:6, 7). Chay mosoj cristianosqa maytachá mancharikorqanku, llajtallankumantataj runas contrankupi oqharikusqankumanta. Paykunaqa ajinapi rikukuspa ichapis manaña sonqo kʼajaywanchu Jehovata sirvinkuman karqa. Pablotaj mana munarqachu ajinapi rikukunankuta. Chayrayku paywan Silaswan ripojtinkupis, mana chay mosoj congregacionta jinallatachu saqerparqanku. Aswan qhepaman Pabloqa Tesalonicamanta hermanosta yuyaricherqa: ‘Hermanonchej Timoteota qankunaman kachamorqayku kallpachasunaykichejpaj, sonqochasunaykichejpaj, ajinamantataj creeyniykichej sinchʼi kananpaj. Ajinapi mana pipis chay ñakʼariykunarayku llauchhiyananpaj’, nispa (1 Tes. 3:2, 3). Ichá Timoteopis Listrapi kashaspa qhatiykachasqallataj karqa. Payqa rikorqaña imaynatachus Pablo chay llajtamanta cristianosta kallpachasqanta, Jehovapis yanapasqanta. Chayrayku Timoteoqa Tesalonicamanta mosoj cristianosman niyta aterqa, Jehovaj yanapayninwan paykunatapis allin rinanta (Hech. 14:8, 19-22; Heb. 12:2).

5. ¿Imatataj Bryant ruwarqa uj anciano yanapasqanrayku?

⁵ ¿Imatawantaj Pablo ruwarqa hermanosninta kallpachananpaj? Paywan Bernabewanqa Listraman, Iconioman, Antioquiaman kutispa “sapa congregacionpi ancianosta churarqanku” (Hech. 14:21-23). Chay ancianosqa kay tiempopi jinallataj, maytapuni chay congregacionesmanta hermanosta kallpacharqanku. Hermano Bryantmanta parlarina. Pay nin: “15 watasniyta juntʼajtiy tatayqa wasimanta riporqa, mamaytaj congregacionmanta qharqochikorqa. Ni piniyoj jina rikhurerqani, qʼala desanimasqataj”, nispa. ¿Imataj chay jina llakiypi kashajtin payta yanaparqa? Pay nin: “Tony sutiyoj anciano parlariwajpuni tantakuykunapi, waj ratospis. Payqa willariwaj wakin hermanospa experienciasninkumanta. Chay hermanosqa llakiykunapi kaspapis kusisqallapuni kasqanku. Payqa Salmo 27:10 versiculota leeripuwaj, ashkha kutispitaj Ezequiasmanta parlariwaj. Ezequiasqa Jehovata tukuy sonqo sirvillarqapuni tatan mana chayta ruwajtinpis”, nispa. ¿Imaynatá Bryantta chay yanaparqa? Pay nin: “Tony kallpachariwasqanrayku aswan qhepaman Jehovapaj astawan llankʼarqani, may kusisqataj karqani”, nispa. Ancianos, sumajta reparaychej pikunachus Bryant jina ‘allin palabraswan’ kallpacharinata necesitashanku chaykunata kallpacharinaykichejpaj (Pro. 12:25).

6. ¿Imaynatataj Pablo Diospa ñaupa tiempo kamachisninmanta parlarispa hermanosninta kallpacharqa?

⁶ Pabloqa hermanosninta yuyaricherqa, ‘may chhika testigos’ imaymana sinchʼi llakiykunata aguantasqankuta Jehová kallpata qosqanrayku (Heb. 12:1). Payqa yacharqa Jehová Diospa ñaupa tiempomanta kamachisninpa kausayninku, chay cristianosta yanapananta mana manchachikunankupaj, ‘kausaj Diospa llajtanpitaj’ astawan yuyanankupaj (Heb. 12:22). Noqanchejtapis yanapallawasunmantaj. Tukuypis mayta kallpachakunchej Jehová imaynatachus Gedeonta, Baracta, Davidta, Samuelta, waj kamachisnintapis yanapasqanta leespa (Heb. 11:32-35). Ajinallatataj kallpachawanchej kay tiempomanta hermanosninchejpa experienciasninkupis. Ashkha hermanosqa centralninchejman ashkha cartasta apachinku, chay cartaspitaj ninku hermanospa experienciasninkuta leerispa aswan sinchʼi creeyniyoj kasqankuta.

PABLO RIKUCHERQA IMAYNATACHUS HERMANOSPURA ALLINPI KAYTA

7. ¿Imatá yachakunchej imatachus Pablo Romanos 14:19-21 versiculospi yuyaychasqanmanta?

⁷ Hermanosta kallpachallanchejtaj congregacionpi tukuywan allinpi kanapaj kallpachakuspa. Hermanosninchejwan mana kikintachu yuyajtinchejpis, mana saqenchejchu chay tʼaqanachinawanchejta, nitaj nisqanchejtapuni valechiyta munanchejchu hermanospa nisqanku Bibliaj nisqanman mana churanakunchu chayqa. Qhawarina imachus Romamanta congregacionta pasasqanta. Chay congregacionmanta wakin hermanosqa judíos karqanku, wakintaj waj nacionesmanta. Manaña Moisespa Leyninpa atiyninpichu kasqankurayku, tukuy mikhunasta mikhuyta atillajña kanku (Mar. 7:19). Chayrayku wakin judío cristianosqa tukuy imata mikhullajña kanku, wakin judío cristianostaj manapuni chayta allinpajchu qhawarqanku. Chayrayku congregacionpi tʼaqanakus karqa. Pablotaj hermanospura allinpi kananku may importante kasqanta reparanankupaj nerqa: “Sichus aychata mikhusqayki, vinota ujyasqayki chayri waj imata ruwasqaykipis hermanoykita pantachin chayqa, allin kanman chaykunata mana ruwanayki”, nispa (Romanos 14:19-21 leey). Pabloqa chayta nispa hermanosninta reparachisharqa chay chʼajwasqa paykunapaj mana allinchu kasqanta, nitaj congregacionpajpis. Paypis wajkunata mana pantachinanrayku, wakin imasta manaña ruwarqañachu (1 Cor. 9:19-22). Noqanchejpis mana nisqanchejtapunichu valechiyta maskʼasun chayqa, Pablo jinallataj hermanosta kallpachasun, paykunawantaj allinta kausakusun.

8. ¿Imatá Pablo ruwarqa congregacionpi hermanos allillanpipuni kanankupaj?

⁸ Hermanosninchejwan aswan importante imasmanta mana kikintachu yuyajtinchej, ¿imatá ruwasunman? Paykunawan allillanpipuni kanapajqa imatachus Pablo ruwasqanta qhawarina. Chay tiempopeqa mana judío kajkuna cristianosman tukusharqanku. Congregacionmanta wakintaj paykuna circuncidakunankupuni kasqanta nej kanku. Chaytataj ichapis nej kanku mana runaswan qhawarachikunankupaj (Gál. 6:12). Pablo chay yuyasqankuwan manapuni de acuerdochu kajtinpis, mana yuyasqanman jinapunichu hermanosta ruwachiyta munarqa. Manaqa kʼumuykukoj sonqowan chay problemata Jerusalenpi kaj apostolesman, ancianosman ima aparqa (Hech. 15:1, 2). Chayta ruwasqanwan congregacionmanta hermanosta yanaparqa allillanpipuni kanankupaj, kusisqataj kanankupaj (Hech. 15:30, 31).

9. ¿Imatá ruwasunman Pablo jina ruwanapaj?

⁹ Mayqen hermanollawanpis mana kikintachu yuyasqanchejrayku phiñanakunapaj jina kashanchej chayqa, Jehová congregacionta cuidanankupaj churan chay hermanoswan yanapachikusunman. Ajinamanta hermanoswan allillanpipuni kasun. Publicacionesninchejpi, Jehovaj llajtan kamachiykunata qowasqanchejpipis, Bibliaman jina sumaj yuyaychaykunata tarisun. Chay yuyaychaykunaman jina ruwasun, manataj yuyasqanchejman jinallachu chayqa, congregacionpi allinpi kanapaj yanapakusun.

10. ¿Imaynamantawán Pablo yanapakullarqataj hermanospura allinpi kausakunankupaj?

¹⁰ Pabloqa waj jinasmantapis yanapakullarqataj hermanospura allinpi kausakunankupaj. Hermanospa pantasqankumanta parlananmantaqa, allin ruwasqasninkumantapuni parlaj. Romanosman Cartata qhelqayta tukuchashaspa ashkha hermanospa, hermanaspa sutisninkuta oqharerqa. Paykunamantataj allinta parlarqa chayri imastachus allinta ruwasqankuta nerqa. ¿Imaynatá noqanchejpis Pablo jina ruwasunman? Hermanospa allin ruwasqasninkumanta parlana. Ajinamanta hermanosta yanapasun astawan munanakunankupaj, aswan sumaj amigostaj kanankupaj.

11. ¿Imaynatataj allinyakapusunman piwanpis phiñanasqa kashanchej chay?

¹¹ Wiñay tukusqa cristianospis wakin kutisqa mana de acuerdo churakuyta atillankumanchu, chayri phiñanakunkuman ima. Chay pasarqa Pablotawan Bernabetawan, sumaj amigos kajtinkupis. Misioneros jina ujtawan viajananku kashajtin, ujqa Marcosta pusayta munarqa, ujnintaj mana. “Chayrayku paykunapura sinchʼita phiñanakuspa tʼaqanakorqanku” (Hech. 15:37-39). Jinapis Pablo, Bernabé, Marcos imaqa allinyakaporqanku. Ajinamanta rikucherqanku paykunapajqa congregacionpi hermanos allinpi, ujchasqataj kananku may importante kasqanta. Aswan qhepamantaj Pabloqa Bernabemanta, Marcosmantapis allinta parlarqa (1 Cor. 9:6; Col. 4:10). Noqanchejpis congregacionmanta mayqen hermanollawanpis phiñasqa kashanchej chayqa, allinyakapuna, allin imasta ruwasqantataj reparayta yachana. Ajinamanta congregacionpi tukuywan allinpi, ujchasqataj kasunchej (Efe. 4:3).

PABLO HERMANOSNINTA YANAPARQA SINCHʼI CREEYNIYOJ KANANKUPAJ

12. ¿Ima llakiykunapitaj hermanosninchej rikukunku?

¹² Hermanosta kallpachallanchejtaj sinchʼi creeyniyoj kanankupaj yanapaspa. Wakenqa aguantanku mana testigo familiaresninku, trabajomanta chayri escuelamanta compañerosninku burlakusqankuta. Wakintaj sinchʼi onqosqas kashanku chayri sonqo nanasqas. Wakintajrí ichapis unayña bautizakorqanku, suyakushallankupunitaj kay mundoj tukukuynin chayamunanta. Tukuy chaykunaqa hermanosninchejpa creeyninkuta pruebaman churanman. Pabloj tiemponpi congregacionmanta hermanospis ajinallapitaj rikukorqanku. ¿Imatataj Pablo ruwarqa paykunata kallpachananpaj?

13. Cristianosmanta wajkuna burlakojtinku, ¿imaynatá Pablo paykunata yanaparqa?

¹³ Pabloqa Diospa Palabranwan hermanosninpa creeyninkuta kallpacharqa. Ichapis judío cristianosqa ni imata niyta atejchu kanku, familiaresninku judiospa religionninku cristiano kaymanta aswan sumaj kasqanta nejtinku. Pablo hebreosman qhelqasqantaj maytachá paykunata kallpacharqa (Heb. 1:5, 6; 2:2, 3; 9:24, 25). Chay cristianosqa Pablo imatachus nisqanwan kutichiyta atinkuman karqa. Noqanchejrí, ¿imaynatá hermanosninchejta yanapasunman wajkuna paykunamanta burlakojtinku? Yachachisunman imaynatachus publicacionesninchejwan yanapachikuspa creeyninkumanta sutʼinchayta. Jóvenes Diospuni tukuy imata ruwasqanta sutʼinchayta atinankupaj, ¿Es la vida obra de un Creador?, chantá El origen de la vida. Cinco cuestiones dignas de análisis nisqa folletoswan sutʼinchanankupaj yanaparisunman.

14. ¿Imatá Pablo ruwarqa ocupasqa kaspapis?

¹⁴ Pabloqa hermanosninta nerqa ‘allin ruwaykunata’ ruwaspa munakuyninkuta rikuchinankuta (Heb. 10:24). Payqa mana simillamantachu chayta nerqa, manaqa ruwasqasninwan chayta rikucherqa. Judeamanta cristianos sinchʼi yarqhaypi kashajtinku, yanapata apajkunamanta ujnenqa Pablo karqa (Hech. 11:27-30). Pabloqa predicaspa, yachachispa ima ocupasqa kaspapis, wajcha cristianosta imaynallamantapis yanapananpaj kallpachakojpuni (Gál. 2:10). Ajinamanta hermanosta yanaparqa Jehová cuidananpi astawan atienekunankupaj. Noqanchejrí, ¿imaynatá kay tiempopi hermanosninchejta astawan sinchʼi creeyniyoj kanankupaj yanapasunman? Tiemponchejwan, kallpanchejwan, imastachus ruwayta yachasqanchejwan llakiypi kaj hermanosta yanapakoj rispa, jallpʼantinpi Bibliamanta yachachinapaj qolqesitunchejwan yanapakuspa ima. Chaykunata, waj imastawan ruwaspaqa hermanosninchejta yanapanchej Jehová ni jaykʼaj paykunata saqerparinanpi atienekunankupaj.

15, 16. ¿Imaynamantataj creeypi llauchʼiyapoj hermanosta yanapasunman?

¹⁵ Pabloqa creeypi llauchʼiyapojkunata yanapallarqapuni. Paykunata khuyakorqa, chantapis kallpachananpaj jina, munakuywantaj paykunata parlarqa (Heb. 6:9; 10:39). Hebreosman Cartata qhelqashaspa ashkha kutispi “noqanchej” nispa nerqa, manataj “qankuna” nerqachu. Ajinamanta paypis yuyaychasqanman jinallataj ruwanan kasqanta nisharqa (Heb. 2:1, 3). Pablo jinallataj noqanchejpis creeypi llauchʼiyapojkunata yanapallaytapuni munanchej. Chayrayku paykunamanta llakikusqanchejta reparanankupaj kallpacharinchej, ajinamantataj munakusqanchejta rikuchinchej. Imatachus hermanosninchejta nisqanchejqa paykunata mayta yanapanman, jinapis kʼachamanta, munakuywan chayta ninanchej tiyan.

¹⁶ Pabloqa hermanosninta nillarqataj Jehovaqa allin imasta ruwasqankuta mana qonqapusqanta (Heb. 10:32-34). Noqanchejpis pay jinallataj ruwasunman creeypi llauchʼiyapoj hermanosta yanaparispa. Imaynamantachus Jehovata rejsisqankuta willarinawanchejta nisunman, chayri nisunman ima kutispichus Jehová yanapasqanpi piensarinankuta. Ajinata parlarishaspa yuyarichisunman Jehovaqa mana qonqapusqanta ñaupajpi payta munakusqankuta, nitaj aswan qhepamanpis saqerparinanta (Heb. 6:10; 13:5, 6). Ajinata parlarisqanchejqa chay munasqa hermanosninchejta yanapanman Jehovata sirvillaytapuni munanankupaj.

“QANKUNAPURA SONQOCHANAKULLAYCHEJPUNI”

17. ¿Imastá ruwasunman hermanosninchejta aswan sumajta kallpachanapaj?

¹⁷ Watas pasasqanman jina construccionpi trabajaj runasqa aswan sumajta ruwayta yachanku. Noqanchejpis hermanosta aswan sumajta kallpachayta yachakusunman. Hermanosninchej pruebasta aguantayta atinankupaj, Jehovaj ñaupa tiempo kamachisninmanta parlarispa kallpachana. Hermanospura allinpi kausakunapajqa allin ruwasqasninkumanta parlana, phiñanakoj jina kashajtinchej allinchayta maskʼana, piwanpis phiñanasqaña kajtinchejtaj allinyakapuna. Chantapis hermanosninchejpa creeyninkuta kallpachana Bibliaj yachachiykunasninmanta paykunawan parlarispa, imaynallamantapis yanaparispa, creeypi llauchʼiyapojkunata kallpacharispa ima.

18. ¿Imatataj ruwayta munanki?

¹⁸ Diosta yupaychanapaj wasista ruwajkunaqa sonqo juntʼasqas, kusisqastaj kanku. Noqanchejpis ajinallataj sientekusunman hermanosninchejpa creeyninkuta kallpachaspa. Diosta yupaychana wasisqa tiempowan thantakapunku. Hermanosninchejta kallpachasqanchejtaj mana uj ratollapajchu kanman, manaqa wiñaypaj. Chayrayku tukuy atisqanchejta kallpachakuna 1 Tesalonicenses 5:11 nisqanman jina ruwanapaj. Chaypi nin: “Qankunapura sonqochanakullaychejpuni, kallpachanakuychejtaj”, nispa.