Sumaj Yachachej Jehová Diosniykumanta yachakuyku

TATASNIYMANTA MAYTA YACHAKORQANI

Tatasneyqa 1957 watapi Italia nacionmanta Canadá nacionman ripusqanku, Kindersley ranchituman, chayqa kashan Saskatchewan provinciapi. Pisi tiemponmantaj Bibliata estudiasqanku. Ajinamanta tukuy familiantin Jehová Diosta sirviyta kausayniykupi ñaupajman churarqayku. Yuyarikuni uñitamantapacha familiaywan ashkha horasta predicasqayta. Chayrayku chistakuspa niyta yachani: “8 watitasniyojña precursor auxiliar karqani”, nispa.

Tatasniypataqa pisilla qolqenku karqa, jinapis mana michʼakuspa Jehovata sirvej kanku. 1963 watapeqa Estados Unidospi uj asamblea internacional apakorqa. Tatasniytaj chay asambleaman riyta munarqanku. Chayman rinankupaj qolqeta alcanzachikunankupajtaj, ashkha imasninkuta venderqanku. 1972 watapitaj italianota parlajkunaman predicanaykupaj Trail nisqa ranchituman riporqayku. Chayqa karupi kasharqa, 1.000 kilometrospi jina, Columbia Británica provinciapi, Canadá nacionllapitaj. Tatayqa uj jatun tiendapi trabajaj llimphuchaspa, allinchaspa ima. Jehovata ñaupajman churananraykutaj wakin trabajosta mana japʼikorqachu, ashkhata paganankuta nejtinkupis.

Tatasniytaqa mayta agradecekuni kinsantin hermanosniypaj, noqapajwan sumaj ejemplos kasqankumanta. Paykunaqa yanapawarqanku wawamantapacha tukuy sonqo Jehovata sirvinaypaj, yachachiwarqankutaj Diospa Gobiernonta ñaupajman churayta, chayta ruwajtiytaj Jehová ni jaykʼaj saqerparinawanta. Chayta yachachiwasqankutaqa tukuy kausayniypi yuyarikullanipuni (Mat. 6:33).

ASTAWAN JEHOVATA SIRVIYTA QALLARINI

1980 watapi Debbie sutiyoj kʼachita hermanawan casarakorqani. Payqa sutʼita yacharqa imatachus Jehovapaj ruwayta munasqanta, iskayniykutaj astawan Jehovapaj ruwayta munarqayku. Chayrayku señorayqa casarasqaykumanta kinsa killasninman precursora regular jina sirviyta qallarerqa. Wataña casarasqa kashajtiykutaj predicajkunata necesitarqanku chay juchʼuy congregacionman riporqayku. Chaypitaj noqapis precursor regular jina sirviyta qallarerqani.

Tiemponmantaj desanimasqas kasharqayku, congregacionmantataj ripuyta munarqayku. Jinapis ñaupajtaqa superintendentewanraj parlarerqayku. Paytaj munakuywan sutʼinta kayta niwarqayku: “Qankuna problemata astawan jatunyachishankichej, mana allin imasllapi anchata yuyashankichej. Allin imasqa kanpuni, chayta reparanaykichejpaj kallpachakuychej”, nispa. Chay yuyaychawasqaykoqa maytapuni yanapawarqayku (Sal. 141:5). Chayrayku chay yuyaychawasqaykuta kasukorqaykupacha, repararqaykutaj ashkha allin imas kasqanta. Cuentata qokorqayku congregacionmanta ashkha hermanos, wawas, mana testigo qosayoj hermanaspis Jehovapaj astawan ruwayta munasqankuta. Ajinapi yachakorqayku imapi rikukuspapis allin imastapuni reparanayku kasqanta, Jehovapitaj confianayku kasqanta maychus tiemponpi ima llakiytapis allinchananta (Miq. 7:7). Jinamanta watejmanta Jehovata kusisqas sirverqayku, allintaj riwarqayku.

Primera vez precursorespaj escuelaman rerqayku chaypachaqa tawa instructores kapuwarqayku, kinsaqa waj nacionespi sirvisqanku. Paykunaqa fotosta rikuchiwarqayku, willariwarqaykutaj ima jarkʼaykunapichus rikukusqankuta, ima bendicionestachus japʼisqankutapis. Chay experienciasninkuta uyarispa noqaykupis misioneros kayta munarqayku, chaypajtaj kallpachakorqayku.

Misioneros kayta munasqaykurayku 1984 watapi Quebecman riporqayku. Chayqa Columbia Britanicamanta karupi kashan, 4.000 kuraj kilometrospi. Chaypeqa francés parlakun, chay parlaytataj yachakunayku karqa, imaynatachus kausakusqankumanpis yachaykukunayku karqa. Casi sapa kutitaj qolqe pisiwaj kayku. Uj kutipi uj runa allasqankumanta puchoj papasta pallakunaykuta saqewarqayku. Chaylla mikhunaykupaj karqa. Señorayqa sumajta yuyaychakuspa papamanta tukuy laya miskʼi mikhunitasta waykʼoj. Chay llakiykunaspi rikukuspapis, kusiywan aguantanaykupaj kallpachakorqayku. Chantapis sutʼita repararqayku Jehová sumajta cuidawasqaykuta (Sal. 64:10).

Uj diaqa mana suyashajtillayku Betelmanta wajyamuwarqayku, Canadá Betelpi yanapakunaykupaj invitawarqayku. Chaymantaqa as mana chhika kusisqachu kasharqayku, imaraykuchus Galaad Escuelaman rinaykupaj solicitudta apacherqaykuña, chaymantaj riyta munarqayku. Jinapis Betelman rerqaykupuni. Betelman chayaspañataj, Sucursalta Kamachejkunamanta hermano Kenneth Littleta tapukorqayku: “¿Galaad Escuelaman rinaykupaj solicitudniykurí?”, nispa. Paytaj niwarqayku: “Ama chaymanta llakikuychejchu. Chayman rinaykichejqa tiemponpi yachakullanqa”, nispa.

Chayta niwasqaykumanta semananmantaj uj invitación chayamuwarqayku Galaad Escuelaman rinaykupaj. Jinapis ajllanayku karqa chay escuelaman riytachus, Betelpi qhepakuytachus. Hermano Kennethtaj kayta niwarqayku: “Mayqenta ajllajtiykichejpis, asignacionniykichejpiña kashaspa wakin kutis ninkichej ‘ujnillantapis ajllasunman karqa’ nispa. Iskaynin asignaciones sumaj kanku. Mayqenta ajllajtiykichejpis Jehovaqa bendecisonqachejpuni”, nispa. Jinapi Galaad Escuelaman riyta ajllarqayku. Tukuy kausayniykupitaj repararqayku hermano Kenneth maychus kajllata niwasqaykuta. Chayrayku hermanos uj asignacionta ajllananku kajtenqa, ashkha kutispi imatachus hermano Kenneth niwarqayku chayllatataj paykunamanpis nej kayku.

MISIONEROS JINA SIRVIYKU

Mayta kusikorqayku 22 hermanoswan khuska Galaad Escuelaman risqaykumanta. Chay escuelaqa karqa clase 83, qallarerqataj 1987 watapi, abril killapi, Estados Unidospitaj ruwakorqa, Brooklyn llajtapi. Chay escuelapitaj astawan clasesta pasarqayku hermano Ulysses Glasswan hermano Jack Redfordwan ima. Chay escuelaqa phishqa killas karqa. Tiempotaj ima jina riporqa, 6 de septiembre de 1987 watapitaj graduakorqayku. Haití nacionmantaj asignawarqayku hermano Johntawan Marietawan khuska.

1962 watapeqa Haití nacionmanta qhepa kaj misionerosta wijchʼupusqanku. Chaymantapachataj noqayku primeros misioneros jina chay nacionman chayarqayku. Graduakusqaykumanta kinsa semanasninman uj juchʼuy congregacionpi sirviyta qallarerqayku. Chay congregacionqa lomas chaupipi kasharqa, 35 publicadoresniyoj. Jovenesllaraj kasqaykurayku ashkha imasta yachakunayku karqa. Iskaynitullaykutaj misionerospaj wasipi tiyakorqayku. Haití nacionmanta runasqa manchay pobres karqanku, casi tukuyninkutaj mana leeyta yacharqankuchu. Chay nacionpi sirvishajtiykoqa ashkha chʼajwas karqa, wakin militarestaj a la fuerzalla gobernaj yaykorqanku. Chʼajwasta ruwajkunataj ninasta japʼichispa bloqueaj kanku. May sinchʼi muyoj wayraspis karqa.

Haitipeqa hermanosmanta mayta yachakorqayku. Sutʼita repararqayku ashkha hermanos ima problemapi rikukuspapis mana llakiywan atipachikusqankuta, Jehová Diosta munakusqankuta, predicacionmanpis llojsisqankutapuni, kusisqastaj kasqankuta. Uj hermanaqa kurajsituña karqa, nitaj leeyta yacharqachu, jinapis 150 textosta jina de memoria yacharqa. Sapa día problemasta rikusqaykurayku astawan kallpachakoj kayku runasman willamunaykupaj Diospa Gobiernollan tukuy chay llakiykunasta chinkachinanta. Mayta kusikuyku ñaupaj estudiosniykumanta wakenqa precursores regulares, precursores especiales, ancianos ima kasqankumanta.

Haitipeqa Trevor sutiyoj joventa rejserqani. Payqa mormón religionmanta misionero karqa, paywantaj ashkha kutista Bibliamanta parlarerqayku. Watasninmantaj uj cartata apachimuwarqa. Chaypi nisqantaj mayta kusichiwarqa, cartanpeqa kayta niwarqa: “Qhepan asambleapi bautizakusaj, Haitimantaj kutimuyta munani, maypichus mormón jina karqani chaypi precursor especial jina sirvinaypaj”, nispa. Ajinapunitaj karqa, payqa señoranwan khuska Haití nacionpi ashkha watasta Jehovata sirverqa.

EUROPAPI CHANTÁ AFRICAPI SIRVIYKU

Tiemponmantaj Europaman kachawarqayku, maypichus testigos ñaupajta prohibisqas kasharqanku chay lugaresman. Chaypachataj watejmanta predicayta qallarisharqanku. 1992 watapi Liublianapi (Eslovenia) sirviyta qallarerqayku. Tatasneyqa chay qayllapi wiñakusqanku niraj Italiaman ripushaspa. Chay lugaresqa ñaupajta Yugoslavia sutikorqa. Chayashajtiykutaj chaypi guerra kasharqa. Tukuy chay lugarespi predicakunanmanta encargakusharqanku Viena sucursalmanta hermanos (Austria), Zagreb oficinaspi (Croacia), Belgrado oficinaspi yanapakoj hermanos ima (Serbia). Chayasharqayku chaypacha nikorqa Yugoslaviamanta partikorqanku chay nacionespi, sapa ujninpi Betel kananta.

Chaypi sirvishajtiykoqa esloveno parlayta yachakunayku karqa, culturankumanpis yachaykukunayku karqa. Chay llajtayoj runasqa niwaj kayku: “Parlayniykutaqa mana facilta yachakullankuchu”, nispa. Ajinapunitaj karqa, mana yachakuyta atillarqaykuchu. Jinapis mayta kusikorqayku hermanos tukuy sonqo kasukusqankuta rikuspa, Diospa llajtan imatapis uj jinata ruwanata nejtinkoqa chay ratopacha kasukoj kanku. Sutʼitataj repararqayku kasukusqankurayku Jehová paykunata bendecisqanta. Reparallarqaykutaj Jehovaqa munakuywan maychus tiemponpi tukuy imata allinchasqantapuni. Esloveniapeqa ashkha imasta yachakorqayku. Ñaupa wataspi imastachus yachakusqaykoqa yanapawarqayku chaypi sirvishajtiyku ashkha imasta aguantanaykupaj.

Chantá 2000 watapi Costa de Marfilman kachawarqayku, chayqa Africapi kashan. Jinapis chaypi guerra civil kasqanrayku, noviembre de 2002 watapi Sierra Leona nacionman ayqechiwarqayku. Chaypeqa 11 watastapuni guerra civil kasqa, chaypachasllataj tukukusqa. Kaymanta jinalla Costa de Marfilmanta ripusqaykurayku sonqoyku mayta nanarqa. Jinapis imastachus ñaupa wataspi yachakusqaykoqa yanapawarqayku kusisqallapuni kanaykupaj.

Sierra Leonapeqa ashkha watasta guerras kajtinpis, mayta kusikorqayku runas Bibliamanta yachakuyta munasqankumanta, hermanospis may kʼachas kasqankumanta. Paykunaqa wajchas kaspapis jaywarikuyta yachaj kanku. Uj hermanaqa señorayman ropasta regalayta munarqa. Señoraytaj kʼachallamanta “mana” nerqa. Hermanataj jaywaytapuni munaspa señorayman nerqa: “Guerra kashajtin waj nacionesmanta hermanos tukuy imawan yanapawarqayku. Kunanqa noqaykuñataj qankunata yanapayta munayku”, nispa. Chayrayku paykuna jina ruwanaykupaj kallpachakorqayku.

Tiemponmantaj Costa de Marfil nacionman kuterqayku. Jinapis watejmanta chʼajwas rikhurisqanrayku maqanakuykunas karqa. Chayrayku noviembre de 2004 watapi helicopteropi ayqechiwarqayku. Sapa pasajeromantaj qʼepita 10 kilosllata apajta saqewarqayku. Chay chʼisitaj francesespa cuartelninkupi pampapi puñorqayku. Qʼayantintaj avionpi Suiza nacionman apawarqayku, sucursalmantaj casi chaupi tutataña chayarqayku. Chaypitaj Sucursalta Kamachejkunamanta hermanos, Escuela de Entrenamiento Ministerialmanta instructorespis señorankuwan khuska suyashawasqayku, chunka makiwan japʼikunawaykupaj. Qʼoñi mikhunitata jaywawarqayku, may chhika suizo chocolatestapis.

Ghana nacionman uj tiempollapaj kachawarqayku. Costa de Marfilpi manaña chʼajwas kajtintaj chayman kuterqayku. Chay llakiy tiempospi waj ladosman ayqekushajtiyku, pisi tiempollapaj asignacionesta japʼishajtiyku ima hermanosqa may munakuywan yanapawarqayku. Jehovaj llajtanpi munanakunanchejta kamachiwajtinchejpis, señoray Debbiewan noqawanqa chayta tukuy sonqo ruwanaykuta nikorqayku. Chay mana allin tiempospeqa cheqamantapuni ashkha sumaj imasta yachakorqayku, chaytaj yanapawayku Jehovata sirvinallaykupajpuni.

ORIENTE MEDIOMAN KACHAWAYKU

2006 watapi centralninchejmanta uj carta chayamuwarqayku, chaypitaj nishawarqayku Oriente Medioman rinaykuta. Chayman ripuspaqa yacharqayku waj parlaykunata yachakunayku kasqanta, waj culturasman yachaykukunayku kasqanta, waj llakiykunatapis aguantanayku kasqanta. Chay lugarespi runasqa politicaman, religionmanpis manchay satʼisqas kasharqanku. Chayrayku ashkha imastaraj yachakunayku karqa. Jinapis mayta kusikorqayku hermanos congregacionespi ashkha parlaykunata parlasqankumanta, Diospa llajtanpa kamachiykunasninta kasukusqankurayku ujchasqa kasqankumantapis. Ashkha hermanosmanqa familiaresninku, escuelamanta compañerosninku, trabajomanta compañerosninku, vecinosninkupis churanakoj kanku. Chayta mana manchachikuspa aguantasqankoqa tʼukunapaj jina karqa.

2012 watapi Tel Aviv (Israel) llajtapi asamblea especial apakorqa, chaymantaj rerqayku. Chay lugarpeqa 33 watapi Pentecostés Fiesta ruwakusqanmantapacha manaraj chay chhika runas Jehovata yupaychanankupaj tantakorqankuchu. Chayrayku chay tantakoyqa mana qonqanapaj jina karqa.

Chay wataspeqa maypichus Jehovaj testigosnin prohibisqas kashanku chay nacionman visitanaykupaj kachawarqayku. Chaymanqa wakin publicacionesta aparqayku, predicaj llojserqayku, juchʼuy asambleasmanpis rerqayku. Armasqa soldadosqa tukuynejpi purisharqanku, controlasharqankutaj. Jinapis wakin publicadores acompañawarqayku, yanapawarqaykutaj mana reparachikuspa purinaykupaj, nitaj manchikunaykupaj. Chay nacionpeqa pisilla publicadores karqanku.

AFRICAMAN KUTICHIWAYKU

2013 watapi Congo-Kinsasa sucursalman kachawarqayku chaypi yanapakunaykupaj. Chay nacionqa jatun, ashkha kʼachitu lugaresniyojtaj. Jinapis sapa kuti wañuchinaku chʼajwas tiyan, runastaj manchay pobres kanku. Chayman kachashawajtiyku nerqayku: “Africata rejsinchejña, yachanchejña imaynachus jaqaypi kausay kasqanta”, nispa. Jinapis ashkha imastaraj yachakunayku karqa. Wakin lugaresmanqa mana auto ñan chayajchu, ni puentespis kajchu, chay lugaresmantaj rej kayku. Chaywanpis hermanos allin imasta ruwasqankupi tʼukurerqayku. Paykunaqa pobres kaspapis kusiywan llakiyninkuta aguantasharqanku, tukuy sonqo predicaj kanku, tukuy atisqankutataj ruwaj kanku reunionesman, asambleasmanpis rinankupaj. Rikorqaykutaj chay nacionpi Jehovaj bendicionninwan llajtanman ashkha runas yaykumushasqankuta. Congo-Kinsasapi kashaspa ashkha sumaj imasta yachakorqayku, sumaj amigostataj tarerqayku.

2017 tukukuyta Sudáfrica Betelman asignawarqayku. Tukuy sirvisqayku sucursalesmanta kay sucursal aswan jatun karqa. Chaypeqa ni jaykʼaj ruwasqayku ruwanasta asignawarqayku. Chaypipis ashkha imasta yachakunallaykutaj karqa. Imastachus ñaupaj wataspi yachakusqaykoqa mayta yanapawarqayku. Betelpeqa ashkha hermanos may chhika watastaña tukuy sonqo Jehová Diosta sirvishanku, paykunataqa mayta munakuyku. Sudáfrica Betelmanta hermanosqa may ujchasqas kanku tukuy ladomanta kajtinkupis, imaymana culturayoj kajtinkupis, chay jina ujchasqa kasqankoqa may tʼukunapaj. Jehová Diospa kamachisnenqa mosoj runa kaywan pʼachawan jina pʼachallikusqanchejrayku, Bibliaj nisqanman jinataj kausakusqanchejrayku Jehovaj bendicionninta japʼinchej, chayrayku allinta apanakunchej.

Tukuy kay wataspeqa señoraywan imaymana asignacionespi sirverqayku, waj jina culturasman yachaykukorqayku, waj parlaykunatapis yachakorqayku. Wakin imasta ruway mana facilchu kajtinpis, sutʼita repararqayku Jehovaqa llajtannejta, hermanosnejta ima mayta munakuwasqaykuta (Sal. 144:2). Imaymana asignacionespi sirvispa imastachus yachakusqaykoqa yanapawarqayku Jehovata aswan sumajta sirvinaykupaj.

Mayta agradecekuni tatasniy sumajta yachachiwasqankumanta, munasqa señoray Debbie mayta yanapawasqanmanta, mundontinmanta hermanos noqapaj sumaj ejemplos kasqankumantapis. Imapis qhepaman kajtin, señoraywanqa Jehová Diosmanta yachakullasqaykupuni, payqa Sumaj Yachachiwajniyku.