Machitu hermanóy, congregacionpaj may valorniyoj kanki

Ichá qanpis chay hermana jinallataj, machuyapusqaykirayku manaña ñaupajta jinachu imatapis ruwayta atinki. Unayña Jehovata tukuy sonqo sirverqanki chaypis, ichapis kunan ruwasqaykita ñaupajta ruwasqaykiwan kikinchawaj, chayraykutaj desanimakuwaj. ¿Imataj yanapasunkiman?

¿IMATA RUWANAYKITATAJ JEHOVÁ MUNAN?

Kayta tapurikuwaj: “¿Imata ruwanaytataj Jehová munan?”. Deuteronomio 6:5 nin: “Jehová Diosniykichejtaqa munakuychej tukuy sonqoykichejwan, tukuy kausayniykichejwan, tukuy kallpaykichejwan ima”, nispa.

Chay textoqa maytapuni sonqochawanchej. ¿Imajtin? Chay texto reparachiwanchej Jehovaqa tukuy atisqallanchejta ruwananchejta munasqanta. Chayta mana qonqakunkichu chayqa, mana wajkunawan kikinchakunkichu, nitaj kunan ruwayta atisqaykita joven kashaspa ruwayta atisqaykiwan kikinchankichu.

Kaypi tʼukuriy: Joven kashaspa, ¿imaynatá Jehovata sirverqanki? Aswan sumajnintachá Jehovaman qorqanki, imaynachus chaypacha kausayniyki kasqanman jina. Kunanrí, ¿imaynatá Jehovata sirvishanki? Aswan sumajnin kajllatatajchá Jehovaman qoshanki, imaynachus kunan kausayniyki kasqanman jina. Reparanki jina imaynatachus ñaupajta sumajta Jehovata sirverqanki, ajinallatataj kunanpis sumajta Jehovata sirvishanki.

WAJKUNATA MAYTA YANAPAWAJ

Machitu kasqaykirayku imastachus mana ruwayta atisqallaykipi yuyanaykimantaqa, astawan piensariy imaynasmantachus wajkunata yanapariyta atisqaykipi. Machitu kaspaqa imastachus joven kashaspa mana ruwayta aterqankichu chay imasta ruwayta atiwaj. Kayta ruwawaj:

Wajkunaman kausayniykimanta willariy. Reparay ñaupa tiempomanta Diospa kamachisnin kayta nisqankuta:

Rey David: “Unayqa joven karqani, kunantaj viejoña kani, jinapis ni jaykʼaj rikorqanichu Diosqa cheqan runata saqerparisqanta, nitaj wawasnintapis khuyayta tʼantata mañakushajta” (Sal. 37:25).

Josué: “Noqaqa wañuy patapiña kashani. Qankunataj sumajta yachankichej tukuy sonqoykichejwan, tukuy kausayniykichejwan Jehová Diosniykichej sumaj imasta qosunaykichejta nisqanta tukuyninta juntʼasqanta. Tukuy ima nisqanpuni qankunaj allinniykichejpaj juntʼakorqa, ni ujpis qhepakorqachu mana juntʼakuspaqa” (Jos. 23:14).

Ichá qanpis joven kashaspa wajkunata kallpacharinaykipaj chayman rijchʼakojllatataj nej kanki. Jinapis Davidwan Josuewanqa chay imasta watas pasasqanman jina kausayninkupi ashkha kutista rikorqanku. Chayrayku chay nisqankoqa aswan atienekunapaj jinaraj karqa. Qanpis ashkha imaspi rikukusqaykirayku nisqasniykeqa aswan atienekunapaj jinallataj.

Unayña Jehovata sirvishanki chayqa, chayta ruwasqayki imaynatachus yanapasusqaykita, ima bendicionestachus japʼisqaykitapis wajkunaman willariy. ¿Rikorqankichu imaynatachus Jehová llajtanta mayta bendecisqanta? Ama qanllapajchu chay kachun, wajkunaman willariy. Chaywanqa paykunata kallpacharinki, qanpis aswan kusisqa kanki (Rom. 1:11, 12).

Wajkunata kallpachallawajtaj reunionesman rispa. Chayrayku atisqaykiman jina riypuni. Ajinamanta mana hermanosllatachu kallpachanki, qanpis kallpachasqallataj kanki. Qallariypi Conniemanta parlarerqanchej chay hermana nin: “Tantakuykunaman risqayqa yanapawan mana desanimakunaypaj. Tantakuna Wasipi hermanos maytapuni munakuwasqankuta rikuchishawajtinku, ¿imaynatataj llakikuymanri? Noqapis paykunata munakusqayta rikuchini regalitosta jaywarispa. Kallpachakunitaj Diosta yupaychay imasta paykunawan khuskapuni ruwanaypaj”.

JEHOVAQA TUKUY SONQO SIRVISQAYKITA MAYTA VALORAN

Bibliaqa ashkha runasmanta parlan, pikunatachus Jehová munakorqa mana tukuy imatapunichu ruwayta atejtinkupis. Ujninkoqa Simeón karqa. Payqa israelita karqa, allin machituña kashajtintaj Jesús nacekorqa. Payqa sapa temploman rispa rikojchá imaynatachus jóvenes chaypi ruwanasta ruwashasqankuta. Chayta rikuspa, ¿imatá yuyanman karqa? Ichapis yuyanman karqa machituña kasqanrayku Jehová niña anchatachu valorasqanta. Pero mana jinachu karqa. Jehovaqa nerqa “cheqan runa” kasqanta, ‘Diostataj manchachikusqanta’. Chantapis saqerqa Jesusta wawita kashajtin rejsinanta. Mana chayllachu Jesús Mesías kananta ninanpajpis paymanta valekorqa (Luc. 2:25-35). Chaypi reparanchej Jehovaqa Simeonpi mana machitu kasqantachu qhawasqanta, manachayqa sinchʼi creeyniyoj kasqanta. “Espíritu santotaj paypi kasharqa”.

Qantapis Jehovaqa mayta valorasunki imapi rikukuspapis tukuy sonqo payta sirvisqaykirayku. Mayta kusikun kamachisnin imastachus payrayku ruwasqankumanta. “Payqa suyan sapa uj atisqanman jina qonanta, nitaj mana atisqanman jinachu” (2 Cor. 8:12).

Chayrayku imastachus ruwayta atisqaykipi astawan yuyay. ¿Nichu predicacionpi waj jinasmanta yanapakuyta atiwaj pisi horitasllatapis? Hermanosta kallpacharillawajtaj telefononejta wajyarispa, tarjetitasta ruwapuspa ima. Juchʼuy imitasllatapis ruwasqaykeqa paykunata mayta kallpachanman. Ashkha watastaña Jehovata sirvishasqaykirayku chay imasta ruwasqaykeqa aswan sumajraj paykunapaj.

Niña kallpitayki kajtinpis ashkhataraj Jehovapaj ruwawaj. Chayta reparanki “Wañunanmanta salvan” nisqa recuadropi. Chaypeqa uj kuraj hermanitanchejmanta parlashan, payqa África orientalmanta.

Amapuni qonqakuychu chay chhika watastaña sinchʼi creeyniyoj kasqayki, Jehovata tukuy sonqo sirvisqaykipis wajkunata mayta kallpachayta atisqanta. Jehovata sirvispa unaytaña aguantasqaykirayku sumaj ejemplo kanki. Amapuni qonqakuychu Hebreos 6:10 versiculopi kayta nisqanta: “Diosqa cheqan, manataj qonqapunchu ruwasqasniykichejta, sutinta munakusqaykichejtapis. Chaytataj Diospaj tʼaqasqa kajkunata yanapaspa rikucherqankichej, kunanpis yanapashallankichejpuni”.

WAJKUNATA YANAPARISPAPUNI KAY

Investigasqankuman jina machitus wajkunata yanaparispapuni kajtinku, mana onqollankuchu, mana yuyay chinkasqachu kanku, aswan unaytataj kausanku.

Jinapis wajkunata yanapayqa mana machuyayta chinkachenqachu. Yachanchej jina jucharayku machuyanchej, wañunchejtaj (Rom. 5:12). Chaytaqa Diospa Gobiernollan chinkachenqa.

Jinapis sichus Jehovata sirvinaykipaj tukuy atisqaykita ruwallankipuni, wajkunatapis payta rejsinankupaj yanapallankipuni chayqa suyakuyniyki aswan sinchʼiraj kanqa, mana anchata onqonaykipajpis yanapasunkiman. Munasqa hermanóy, amapuni qonqakuychu Jehovaqa tukuy ima ruwasqaykita mayta valorasqanta, sinchʼi creeyniyoj kasqaykiraykutaj congregacionpaj may munasqa kasqaykita.