¿Imaraykú Jehovaj testigosnin tantakuna wasisninkuta mana iglesia nispa sutichankuchu?

Biblia griego qallupi qhelqakushajtin “iglesia” nisqa palabraqa, uj qotu runas Diosta yupaychajkunamanta parlanapaj oqharikoj, nitaj uj tantakuna wasimanta parlanapajchu.

Sutʼincharinapaj, apóstol Pablo Romamanta cristianosman uj cartata qhelqashajtin, Aquilaman, Priscilamanpis napaykunata chayacherqa, chantá nerqa: “Paykunaj wasinkupi iglesiatapis sutiypi napaykullaychejtaj”, nispa (Romanos 16:5). Kaytaj sutʼita rikuchiwanchej Pabloqa napaykunata uj qotu runasman apachisqanta, pikunachus Aquilaj, Priscilaj wasinkupi tantakusharqanku chaykunaman.a

Chayrayku, iglesia nispa tantakuna wasiykuta sutichanaykumantaqa, Tantakuna Wasi nispa sutichayku.

¿Imarayku Tantakuna Wasi nispa sutichanku?

Ashkha imasrayku ajinata sutichayku, sutʼincharinapaj:

• Chay lugarqa uj salón jina, tantakunapajtaj.

• Jehová Diosta yupaychanapaj tantakuyku, Paymantataj tukuyman willayku (Salmos 83:18; Isaías 43:12).

• Chantapis tantakuyku, Diospa Reinonmanta yachakunaykupaj, Jesusqa chay reinomanta parlarqa (Mateo 6:9, 10; 24:14; Lucas 4:43).

Wajyarisqataj kanki wasiyki qayllapi kaj Tantakuna Wasiykuman jamunaykipaj, ajinamanta yachanki imaynachus Jehovaj testigosninpa tantakuyniyku kasqanta.