JOVENESPA TAPUKUYNINKU
¿Imaraykutaj Diosmanta mañakuna tiyan?
Ashkha jóvenes Diosmanta mañakusqankuta ninku. Jinapis mana sapa diachu Diosmanta mañakusqankuta ninku. Ichapis wakin jovenesqa jinata ninku: “Diosmanta mañakoyqa, llakiyniyta qonqarinallaypajchá yanapawanman”, nispa. ¿Jinachu kanman? Kaypi chayta yachakunki.
¿Imataj Diosmanta mañakuy?
Diosmanta mañakuspaqa chayri orakuspaqa, paywan parlarinchej. Jehová Dios cielopiwan jallpʼapiwan tukuy imata ruwarqa. Chayrayku tukuymanta aswan patapi kashan. Jinapis “payqa mana karupichu kashan sapa ujninchejmanta” (Hechos 17:27). Biblia niwanchej: “Diosman qayllaykuychej, paytaj qankunaman qayllaykamusonqachej”, nispa (Santiago 4:8).
¿Imatá ruwawaj Diosman qayllaykunaykipaj?
Orakuy. Ajinamanta Dioswan parlarinki.
Bibliata estudiay. Ajinamanta Dios qanwan parlarin.
Orakunki, Bibliatapis estudianki chayqa, Jehová Diosman astawan qayllaykunki.
Jeremy nin: “Aswan Patapi kaj Dioswan parlarikoyqa, may sumajpuni”, nispa.
Miranda nin: “Imaynachus kashasqayta Jehová Diosman willakuspaqa, payman astawan qayllaykuni”, nispa.
¿Dios uyariwanpunichu?
Ichá qanqa Diospi creenki. Wakin kutispis paymanta mañakunki. Jinapis ichá ninki: “¿Dios uyariwashanmanpunichu pero?”, nispa. Biblia niwanchej, ‘Diosqa runaspa mañakuyninkuta uyarisqantapuni’ (Salmo 65:2). Chantá nillawanchejtaj, Diosman tukuy llakiyninchejta willakunanchejta. Imaraykuchus payqa noqanchejmanta “llakikun” (1 Pedro 5:7).
Kaypi piensariy: Amigosniykiwanqa sapa kutichá parlarikunki. Dioswanpis kikillantataj parlarikunayki tiyan. Paywan parlarishaspaqa, sutinta oqharispa parlapayay (Salmo 86:5-7; 88:9). Bibliaqa niwanchej: “Mana saykʼuspa Diosmanta mañakullaychejpuni”, nispa (1 Tesalonicenses 5:17).
Moises nin: “Orakuspaqa Tatay Jehovawan parlarikuni, sonqoypi kaj chhikatataj payman willakuni”, nispa.
Karen nin: “Jehová Diosmanqa tukuy imata willakuni. Imaynatachus mamaywan, sumaj amigosniywanpis parlarikuni, ajinata paywan parlarikuni”, nispa.
¿Imasmantataj Dioswan parlariyman?
Biblia nin: “Tukuy imapaj Diospa yanapayninta mañakuychej. Paymantaqa tukuy sonqo mañakuychej, rogakuspa, graciasta qospataj”, nispa (Filipenses 4:6).
Problemasniykitapis Diosman willakuyta atillawajtaj. Biblia nin: “Tukuy llakiyniykita Jehová Diosman saqepuy”, nispa (Salmo 55:22).
Jinapis mana allinchu kanman, Dioswan problemasnillaykimanta parlarinayki. Chantelle sutiyoj sipas nin: “Yanapata mañakunallaypaj orakuyman chayqa, mana Jehová Diosta sumaj amigoyta jinachu qhawashayman. Noqamantaqa ñaupajta payman agradecekunaraj tiyan. Ashkha imasmantataj Jehová Diosman agradecekusunman”, nispa.
Kaypi piensariy: ¿Imasmantataj Jehová Diosman agradecekuwaj? Ima kinsa imasmantachus kunan día Diosman agradecekunaykipi piensariy.
Anita nin: “Uj tʼikitallata rikuspapis, orakushaspa Jehová Diosman ‘gracias’ nisunman”, nispa.
Brian nin: “Bibliamanta ima versiculochus gustawasqanchejpi piensarina, manachayrí Jehovaj mayqen tʼukuna ruwasqanpipis. Chaykunamantataj Jehová Diosman graciasta qona”, nispa.