Jueces

9 Uj pacha Jerubaalpa wawan Abimelecqa+ Sichemman* rerqa, mamanpa hermanosninman. Abimelecqa paykunaman, mamanmanta awelonpa tukuynin familianmanpis nerqa: 2 “Ama jina kaspa, Sichempi kurajkunaman* niripuwaychej: ‘¿Jerubaalpa 70 wawasnintin+ kamachisunaykichejtachu munawajchej chayri uj runalla kamachisunaykichejtachu? Yachankichej jina, noqapis yawar masillaykichejtaj kani’,* nispa”.

3 Abimelecpa mamanpa hermanosnintaj, chayta nimorqanku Sichempi tukuy kurajkunaman. Paykunaj sonqonkutaj aysakorqa Abimelecta qhatinankupaj, imaraykuchus nerqanku: “Payqa hermanonchej”, nispa. 4 Chantaqa Baal-Beritpa+ templonmanta orqhomuspa 70 qolqesta* Abimelecman qorqanku. Chay qolqewan Abimelecqa minkʼakamorqa qhella machu machu runasta, paywan rinankupaj. 5 Chaymantaqa Ofrá+ llajtaman rerqa, tatanpa wasinman. Chaypi Abimelecqa hermanosninta uj rumi patallapi wañuracherqa,+ Jerubaalpa 70 qhari wawasninta. Jerubaalpa sullkʼa wawan Jotanlla mana wañuchisqachu karqa, pakaykukusqanrayku.

6 Chay qhepata Sichemmanta kurajkuna, chantá Bet-Milomanta kajkunapiwan, tantaykukuspa Abimelecta reyninku kananpaj churarqanku,+ uj jatun sachʼa chaynejpi, Sichempi uj pilar kasharqa chaypi.

7 Jotanqa chayta yachaytawankama, Guerizim orqo+ puntaman wicharispa paykunata qhaparimorqa: “Sichemmanta kurajkuna, uyariwaychej. Diospis qankunata uyarillasonqachejtaj.

8 ”Uj kuti, sachʼasqa uj reyta churakunankupaj* tantaykukusqanku. Olivo sachʼamantaj nisqanku: ‘Qan reyniyku kay’,+ nispa. 9 Olivo sachʼatajrí kutichisqa: ‘Sichus rey kayman chayqa,* manañachá aceitepaj aceitunasta poqoymanchu. Chay aceitewanqa Diosta jatunchanku, jinallataj runastapis. Chayrayku noqaqa mana reyniykichej kaymanchu’, nispa. 10 Chantá chay sachʼasqa higo sachʼamanñataj nisqanku: ‘Qan reyniyku kay’, nispa. 11 Higo sachʼapis kutichillasqataj: ‘Sichus rey kayman chayqa,* manañachá sumaj miskʼi poqoyniyta poqoymanchu. Chayrayku noqaqa mana reyniykichej kaymanchu’, nispa. 12 Chantataj chay sachʼasqa uva sachʼamantañataj mañakusqanku: ‘Qan reyniyku kay’, nispa. 13 Uva sachʼapis kutichillasqataj: ‘Sichus rey kayman chayqa,* manañachá uvasta poqoymanchu mosoj vinopaj. Mosoj vinoqa Diosta kusichin, runastapis. Chayrayku noqaqa mana reyniykichej kaymanchu’, nispa. 14 Chaymanta chay sachʼasqa khishkarara chʼajratañataj* nisqanku: ‘Qan reyniyku kay’,+ nispa. 15 Chay khishkarara chʼajrataj paykunata nisqa: ‘Ciertopunichus reyniykichej kanaypaj churawankichej* chayqa, jamuychej llanthuy uraman. Manachus reyniykichej kanayta munankichej chaytaj, noqamanta nina lauray llojsispa Líbano orqospi cedro sachʼasta lauraykuchun’, nispa.

16 ”Kunanqa tapurisqaykichej: ¿Allintachu, cheqan sonqowanchu Abimelectaqa reyniykichej kananpaj churarqankichej?+ ¿Khuyarqankichejchu Jerubaalta, familiantapis? ¿Ruwapususqaykichejman jinachu Jerubaalpajqa ruwaporqankichej? 17 Tatayqa madianitaspa makisninkumanta+ kacharichisunaykichejpaj maqanakusqanpi+ casi wañorqapis. 18 Kunantaj qankunaqa tataypa familianpa contranta oqharikunkichej, 70 qhari wawasnintataj uj rumi patallapi wañurachinkichej.+ Esclavanpi karqa chay wawan Abimelectaraj+ Sichempi reyniykichej kananpaj churakunkichej, hermanoykichej kasqanraykulla. 19 Sichus kunan Jerubaalpaj, familianpajpis allinta, cheqan sonqowantaj ruwashankichej chayqa, kusikuychej Abimelecwan, paypis kusikuchun qankunawan. 20 Manachus ajina chaytaj, Abimelecmanta nina lauray llojsimuspa Sichemmanta kurajkunata ruphaykuchun, jinallataj Bet-Milotapis.+ Chantá Sichempi kurajkunamanta, Bet-Milomantawan nina lauray llojsimuspa Abimelectapis ruphaykullachuntaj”,+ nispa.

21 Chayta niytawan Jotanqa+ ayqekuspa Beerpi tiyakamorqa, hermanon Abimelecta manchachikusqanrayku.

22 Abimélec israelitasta kinsa watastaña kamachisqanmanta, 23 Diosqa saqerqa Abimelecwan Sichemmanta kurajkunawan chejninakunankuta. Sichemmanta kurajkunataj Abimelecpa contranta oqharikorqanku. 24 Tukuy chayqa karqa paganankupaj Jerubaalpa 70 qhari wawasninta mana khuyarispa wañuchisqankumanta. Abimelecqa juchayoj karqa hermanosninta wañuchisqanmanta,+ Sichemmanta kurajkunataj juchayoj karqanku Abimelecta yanapasqankumanta. 25 Sichemmanta kurajkunaqa orqo patasman runasta kacharqanku wateqamuspa Abimelecman phinkiykunankupaj. Chay runasqa chay orqospi ñanta pasajkunata suwaj kanku. Chaytataj runasqa Abimelecman willamorqanku.

26 Chaypacha Ebedpa wawan Gaalwan hermanosninwanqa Sichemman+ chayarqanku. Gaaltaj Sichemmanta kurajkunawan munachikorqa. 27 Chantá Sichemmanta runasqa, uva huertasninkuman rispa uvasta pallamorqanku. Chayta saruspa vinota ruwaytawantaj uj fiestata ruwarqanku. Chaymantataj diosninkoj templonman*+ yaykuspa mikhorqanku, tomarqanku, Abimelectataj maldicerqanku. 28 Jinapi Ebedpa wawan Gaalqa nerqa: “¿Pitaj kasqa Abimelecri? ¿Pitaj kasqa Sichempis* paykunata sirvinanchejpajri? ¿Manachu Abimelecqa Jerubaalpa+ wawallan? ¿Manachu Zebulpis yanapajnillan? ¿Ima nispataj Abimelecta sirvisunmanri? Antes Sichempa tatan Hamorpa mirayninta sirvinachej. 29 Noqachus kay llajtamanta kamachej kayman chayqa, Abimelecta cargonmanta wijchʼuyman”, nispa. Chantá Abimelecmanta burlakuspa nerqa: “Soldadosta astawan tantay, maqanakojtaj llojsimuy”, nispa.

30 Sichemmanta kuraj kamachej Zebultaj, imatachus Ebedpa wawan Gaal nisqanta yachaspa mayta phiñakorqa. 31 Chantaqa pakayllamanta* Abimelecman willachimorqa: “Ebedpa wawan Gaalqa hermanosninwan kay llajtayman jamunku. Kunantaj runasman umata satʼishanku contraykipi oqharikunankupaj. 32 Chayrayku qanwan, soldadosniykiwan tutallan jamuspa, kay llajta qayllapi pakaykukuychej. 33 Tutamantataj inti llojsimusqantawan maqanakoj llojsimuychej. Gaal soldadosninwan contraykipi maqanakoj llojsimojtintaj, imaynatapis qanqa atipanaykipuni tiyan”, nispa.

34 Ajinapi Abimelecwan tukuy soldadosninwanqa, tutan rerqanku. Tawaman tʼaqakuspataj Sichem llajta qayllapi pakaykukorqanku. 35 Ebedpa wawan Gaal llajta punkuman llojsimojtintaj, Abimelecwan soldadosninwanpis pakasqa kasharqanku chaymanta llojsimullarqankutaj. 36 Gaalqa paykunata rikuspa Zebulman nerqa: “Qhawariy runas orqosmanta uraykamushanku”, nispa. Zebultajrí kuticherqa: “Orqospa llanthusnillanta runasta jina rikushanki”, nispa.

37 Aswan ratonmantaj Gaalqa nillarqataj: “Qhawariy jallpʼaj chaupinmantapis runas uraykamushallankutaj, wakintaj Meonenimpi jatun sachʼa kashan chay ñanninta jamushanku”, nispa. 38 Zebultaj kuticherqa: “Kunanqa parlay á simisapa. ¿Nichu nisharqanki ‘pitaj kasqa Abimélec payta sirvinanchejpajri’ nispa?+ ¿Manachu qanqa kay runaspa contranpi asikuspa parlasharqanki? Kunanqa riy á paykunawan maqanakoj”, nispa.

39 Chantá Gaalqa Sichemmanta kurajkunaj ñaupaqenkuta llojserqa Abimelecwan maqanakoj. 40 Abimelectaj Gaalta qhatiykorqa, Gaaltaj paymanta ayqekorqa. Chay pʼunchayqa may chhika runas wañorqanku, cuerposninkutaj llajta punkukama mastʼalla kasharqa.

41 Abimelecqa Arumallapipuni tiyakorqa. Zebultajrí+ Gaaltawan hermanosnintawan Sichemmanta wijchʼorqa. 42 Qʼayantenqa runas Sichem llajtamanta llojserqanku. Abimelectaj chayta yacharqa. 43 Chayrayku soldadosninwan rerqa. Soldadosninta kinsaman tʼaqaspataj pakaykukorqanku. Chantá runas llajtamanta llojsimushasqankuta rikuytawan, maqanakoj llojsimuspa paykunata wañuracherqanku. 44 Abimelecqa paywan kasharqanku chay soldadosninwan, llajta punkupi sayaykamorqanku. Chay ujnin iskay tʼaqastaj, maqanakuspa wañuracherqanku llajtamanta tukuy llojsejkunata. 45 Abimelecqa tukuy chay diantinta Sichem llajtamanta runaswan maqanakorqa, paykunata atipaykunankama. Abimelecqa chay llajtamanta runasta qʼalata wañuracherqa, llajtata thuñiykorqa,+ chantá kachita chay llajtaman qhallaykorqa.*

46 Sichem torremanta kurajkunaqa, chayta yachaytawankama pakaykakamorqanku El-Berit*+ santoj templonpi, maypichus uj pakakuna karqa chaypi. 47 Abimelectaj Sichem torremanta kurajkuna chaypi pakakushasqankuta yachaytawankama, 48 paywan kasharqanku chay runaswan Zalmón orqoman wicharerqa. Chaypitaj Abimelecqa uj sachʼaj ramanta uj hachawan kʼutuspa lijrariykukorqa. Paywan kasharqanku chay runastataj nerqa: “Usqhayta, qankunapis kikillantataj ruwaychej”, nispa. 49 Chayta nejtin paykunapis sachʼa ramasta kʼutullarqankutaj. Chayta lijrariykukuspataj Abimelecpa qhepanta rerqanku. Temploj pakakunanman chayaspataj, chay ramaswan muyuykuchispa ninata japʼiykucherqanku. Ajinamanta Sichem torrepi kaj tukuy runas wañorqanku. Tukuyninpeqa wañorqanku uj 1.000 jina, qharis, warmis ima.

50 Chaymanta Abimelecqa Tebezmanñataj rerqa. Chay llajtata muyuykuspataj japʼikaporqa. 51 Chay llajta chaupipeqa uj sumaj jarkʼachasqa torre karqa. Chay llajtamanta tukuy runastaj chayman pakakoj ayqekorqanku: qharis, warmis, llajtamanta kurajkuna ima. Sumajta wisqʼaykakamuytawantaj torre pataman wicharerqanku. 52 Abimelectajrí chay torrekama chayarqa. Ninawan japʼiykuchinanpajtaj punkuman qayllaykorqa. 53 Chayllapi uj warmi uj molino rumita* kachaykamorqa Abimelecpa umanman. Chay rumitaj umanta lajrarparerqa.+ 54 Paytaj usqhayta wajyarqa armasninta apaj yanapajninta, nerqataj: “Espadaykita orqhokuspa wañuchiway, ama pipis ninanpaj ‘Abimelectaqa uj warmilla wañuchisqa’ nispa”. Ajinapi chay yanapajnenqa espadawan tʼojsirpaspa Abimelecta wañucherqa.

55 Israelitasqa Abimélec wañusqanta rikuytawan, wasisninkuman kutiporqanku. 56 Ajinamanta Diosqa Abimelecwan pagachikorqa, chay 70 hermanosninta wañuchispa tatanpaj contranpi mana allinta ruwasqanmanta.+ 57 Diosqa Sichemmanta runaswanpis pagachikullarqataj, tukuy sajra kajta ruwasqankumanta. Ajinamanta paykunapi juntʼakorqa Jerubaalpa+ wawan Jotanpa+ maldecisqan.